Buddy Movie First Look : తక్కువ అంచనా వేయకండి - 'బడ్డీ'తో బాక్సాఫీస్‌కు గురి పెట్టిన అల్లు శిరీష్!

Allu Sirish Birthday : అల్లు శిరీష్ కథానాయకుడిగా రూపొందుతున్న తాజా సినిమా 'బడ్డీ'. ఈ రోజు ఆయన పుట్టినరోజు సందర్భంగా ఫస్ట్ లుక్ విడుదల చేశారు. 

అల్లు శిరీష్ 'బడ్డీ' ఫస్ట్ లుక్ 

కథానాయకుడిగా అల్లు శిరీష్ (Allu Sirish) ప్రయాణం మిగతా హీరోల కంటే కాస్త భిన్నమైనదని చెప్పాలి. ఆయన క్వాంటిటీ కంటే క్వాలిటీకి ఎక్కువ ప్రాముఖ్యం ఇస్తుంటారు. డిఫరెంట్ సబ్జెక్టులు చేయడానికి ఆసక్తి చూపిస్తుంటారు. ఇంట్రెస్టింగ్ క్యారెక్టర్లు చేసే అల్లు శిరీష్... ఇటీవల 'ఊర్వశివో రాక్షసివో' సినిమాతో మంచి హిట్ అందుకున్నారు. అందులో వినోదానికి, నటీనటుల ప్రతిభకు ప్రశంసలు దక్కాయి. ఇప్పుడు కొత్త సినిమాతో అల్లు శిరీష్ ప్రేక్షకుల ముందుకు రావడానికి రెడీ అయ్యారు. 

అల్లు శిరీష్ & 'బడ్డీ'
అల్లు శిరీష్ కథానాయకుడిగా రూపొందుతోన్న తాజా సినిమా 'బడ్డీ' (Buddy Movie). తమిళ చలన చిత్ర పరిశ్రమలో అగ్ర నిర్మాణ సంస్థల్లో ఒకటైన స్టూడియో గ్రీన్‌ పతాకంపై ఈ సినిమా తెరకెక్కుతోంది. ఈ రోజు అల్లు శిరీష్ (Allu Sirish Birthday) సందర్భంగా ఫస్ట్ లుక్ విడుదల చేశారు. 

Buddy Movie First Look Review : 'బడ్డీ' ఫస్ట్ లుక్ చూస్తే... అల్లు శిరీష్ తుపాకీ పట్టుకుని కనిపిస్తున్నారు. ఆయన పక్కన టెడ్డీ బేర్ ఉంది. దాని లుక్ కొంచెం డిఫరెంట్ గా ఉంది. ఈ పోస్టర్ చూస్తే ఆయన బాక్సాఫీస్‌కు గురి పెట్టినట్లు ఉంది.  

'బడ్డీ'ని ప్రముఖ నిర్మాత కె.ఇ. జ్ఞానవేల్ రాజా నిర్మిస్తున్నారు. ఈ చిత్రంలో గాయత్రి భరద్వాజ్, గోకుల్ కీలక పాత్రల్లో నటిస్తున్నారు. 'బడ్డీ' ఏ సినిమాకూ రీమేక్ కాదని ప్రీ లుక్ విడుదల చేసినప్పుడు అల్లు శిరీష్ తెలిపారు. ఫస్ట్ లుక్ మాత్రమే కాదు... ఈ రోజు ఫస్ట్ వీడియో గ్లింప్స్ కూడా విడుదల చేశారు. అది చూస్తే... 

తక్కువ అంచనా వేయండి...
త్వరలో మీకే అర్థం అవుతుంది!
'మీరు ఏం చేస్తారో? ఎలా చేస్తారో? నాకు అనవసరం. ఈ చావు ఎంత భయంకరంగా ఉండాలంటే... విన్న ప్రతి ఒక్కడి ఇంట్లో వణుకు పుట్టాలి. సరిగ్గా చూసుకోండి' అని వాయిస్ ఓవర్ వినపడుతుంటే... మెట్రోలో చాలా మంది ముసుగు వేసుకున్న వ్యక్తులు (రౌడీలు) కనబడతారు. డైలాగ్ పూర్తి అయిన తర్వాత 'వాంటెడ్' పోస్టరులో 'టెడ్డీ బేర్' ఫోటో ఉంటుంది. అది చూసి అందరూ నవ్వుతారు. కాసేపటికి రౌడీల ముందు నిలబడిన వ్యక్తి వెనుక ఓ డోర్ ఓపెన్ అవుతుంది. అందులో బోలెడు డబ్బు ఉంటుంది.  

నవ్విన ప్రతి ఒక్కరికీ ఆ ముసుగు వీరుడు ఓ మాట చెబుతాడు. 'అంత తక్కువ అంచనా వేయకండి. ఇప్పుడే మొదలైంది కదా! త్వరలో మీకే అర్థం అవుతుంది' అంటాడు. ఆ తర్వాత టెడ్డీని ఇంట్రడ్యూస్ చేశారు. అదీ మెట్రోలోనే! ఆ రౌడీల నుంచి టెడ్డీని కాపాడుతున్న హీరో (అల్లు శిరీష్)ను ఇంట్రడ్యూస్ చేశారు. మెట్రోలో రౌడీలను ఊచకోత కోశారు. దాంతో ముసుగు వీరుడు 'సిటీలో ఉన్న మనవాళ్ళు అందరినీ రమ్మను' అని ఫోన్ చేస్తాడు. అటు నుంచి 'బొమ్మ కోసం అంత మంది ఎందుకు?' అని ప్రశ్న! 'ఆ బొమ్మ ఒంటరిగా లేదు. దాని వెనుక ఒకడు ఉన్నాడు' అని సమాధానం. మొత్తం మీద గ్లింప్స్ ఆసక్తికరంగా ఉంది. 

'బడ్డీ' చిత్రానికి సామ్ ఆంటోన్ దర్శకత్వం వహించారు. సెన్సేషనల్ మ్యూజిక్ డైరెక్టర్ హిప్ హాప్ తమిళ సంగీతం అందించగా, రూబెన్ ఎడిటింగ్ నిర్వహించారు. ఇంకా ఈ చిత్రానికి స్టంట్ కొరియోగ్రాఫర్: ఆర్ శక్తి శరవణన్, ఆర్ట్ డైరెక్టర్: సెంథిల్ రాఘవన్.