అవికా గోర్ '1920 హారర్ ఆఫ్ ది హార్ట్' ట్రైలర్ చూశారా - వెన్నులో వణుకు పుట్టడం ఖాయం!

హీరోయిన్ అవికా గోర్ తాజాగా '1920 హారర్ ఆఫ్ ది హార్ట్' అనే సినిమాతో బాలీవుడ్ ఎంట్రీ ఇస్తోంది. తాజాగా ఈ చిత్రానికి సంబంధించిన ట్రైలర్ ని రిలీజ్ చేశారు మేకర్స్.

Photo Credit: Avika Gor/Instagram

‘చిన్నారి పెళ్లికూతురు’ అనే సీరియల్ తో చైల్డ్ ఆర్టిస్టుగా తెలుగు ప్రేక్షకులకు బాగా దగ్గరైన అవికాగోర్ ఆ తర్వాత రాజ్ తరుణ్ సరసన 'ఉయ్యాల జంపాల' సినిమాతో తెలుగు వెండితెరకి హీరోయిన్గా ఎంట్రీ ఇచ్చింది. మొదటి సినిమాతోనే తన అందం, అభినయంతో మంచి సక్సెస్ అందుకున్న ఈ ముద్దుగుమ్మ ఆ తర్వాత 'లక్ష్మీ రావే మా ఇంటికి', 'సినిమా చూపిస్త మామ', 'ఎక్కడికి పోతావు చిన్నవాడా', 'రాజుగారిగది' వంటి సినిమాలతో టాలీవుడ్ లో హీరోయిన్ గా మంచి గుర్తింపు తెచ్చుకుంది. రీసెంట్ గా 'పాప్ కార్న్' అనే సినిమాతో ప్రేక్షకులను పలకరించిన అవికా గోర్ ఇప్పుడు ఏకంగా బాలీవుడ్ లో గ్రాండ్ ఎంట్రీ ఇవ్వబోతోంది. అది కూడా ఓ హారర్ ఫిలింతో కావడం విశేషం. బాలీవుడ్ ప్రముఖ దర్శకుడు విక్రమ్ భట్ డైరెక్టర్ చేసిన హారర్ మూవీ ‘1920’ బాక్స్ ఆఫీస్ వద్ద ఎలాంటి సెన్సేషన్ క్రియేట్ చేసిందో చెప్పనక్కర్లేదు. 2008లో వచ్చిన ఈ సినిమా మంచి సక్సెస్ను సాధించింది.

అయితే ఇప్పుడు ఈ సినిమాకు కొనసాగింపుగా '1920 హారర్స్ ఆఫ్ ది హార్ట్' అనే సినిమాని తెరకెక్కిస్తున్నారు. ఈ సినిమాలో అవికాగోర్ లీడ్ రోల్ పోషిస్తుంది. ఈ సినిమాకు విక్రమ్ భట్ కుమార్తె కృష్ణ భట్ దర్శకత్వం వహిస్తున్నారు. విక్రమ్ భట్ నిర్మాతగా వ్యవహరిస్తున్నారు. ఇక ఈ మూవీకి ప్రముఖ రచయిత దర్శకుడు మహేష్ కథను అందిస్తున్నారు. ఇప్పటికే తెలుగులో 'రాజు గారి గది 3' సినిమాలో అవికాగోర్ దెయ్యం గా భయపెట్టిన విషయం తెలిసిందే. ఇక ఇప్పుడు 1920 హారర్ ఆఫ్ ది హార్ట్ అనే సినిమాతో బాలీవుడ్ లో అడుగు పెట్టబోతోంది. తాజాగా ఈ సినిమాకు సంబంధించిన ట్రైలర్ ని విడుదల చేశారు మేకర్స్. ఇక ఈ ట్రైలర్ అయితే వెన్నులో వణుకు పుట్టించేలా ఉంది. ముఖ్యంగా టైలర్ లో చూపించిన విజువల్స్, సౌండ్ ఎఫెక్ట్స్, బ్యాక్ గ్రౌండ్ స్కోర్ అన్నీ కూడా భయపెట్టే విధంగా ఉన్నాయి. ఇక ట్రైలర్ చివరలో కట్ చేసిన షాట్ తో మరింత భయపెట్టే ప్రయత్నం చేశారు. దీంతో ప్రస్తుతం ఈ ట్రైలర్ కి మంచి రెస్పాన్స్ వస్తోంది.

ఇక జూన్ 23న ఈ సినిమా హిందీ తో పాటు తమిళ, తెలుగు భాషల్లోనూ విడుదల కాబోతోంది. ఈ మూవీ ట్రైలర్ ని రిలీజ్ చేస్తూ దర్శకురాల కృష్ణ భట్ తన సోషల్ మీడియా వేదికగా సినిమా గురించి పలు ఆసక్తికర పోస్టులు పెట్టింది. ఈ మేరకు తన పోస్టులో పేర్కొంటూ.. "నా జీవితాన్ని మార్చేసి నన్ను దర్శకురాలుగా మార్చిన చిత్రం 1920. మళ్లీ దశాబ్దం తర్వాత నేను 1920 హారర్ ఆఫ్ ది హార్ట్ ని అవికా గోర్ తో డైరెక్ట్ చేస్తున్నాను. ఈ సినిమా చేయడం ఎంతో ఉత్సాహంగా అనిపించింది. ఈ సినిమాని నాపై ఉన్న ప్రేమతో నా గురువులు విక్రమ్ మరియు మహేష్ భట్ రాసి, నిర్మిస్తున్నారు" అంటూ పోస్ట్ చేసింది. మరి ఈ సినిమా దర్శకురాలిగా కృష్ణ భట్ కి, హీరోయిన్ గా అవికా గోర్ కి ఎలాంటి సక్సెస్ను అందిస్తుందో చూడాలి. ఇక అవికాగో రీసెంట్ గా తెలుగులో 'పాప్ కార్న్' అనే సినిమా చేసింది. మురళీ గంధం దర్శకత్వంలో సాయి రోనక్ హీరోగా నటించిన ఈ మూవీ ఆశించిన స్థాయి విజయాన్ని అందుకోలేకపోయింది.