Bigg Boss 8 Telugu Elimination 3rd week: బిగ్ బాస్‌ని తిడితే ఊరుకుంటారా... నిజంగా బయటకు గెంటేస్తున్నారు, ఈ వారం ఎలిమినేషన్ ఇతడిదే!

Bigg Boss 8 Telugu Elimination This Week: గేమ్ ఆడేటప్పుడు నోరు అదుపులో పెట్టుకోవడం చాలా ముఖ్యం. లేకపోతే ఏం జరుగుతుందో చెప్పడానికి ఈ వారం 'బిగ్ బాస్ 8' తెలుగు ఎలిమినేషన్ ఉదాహరణ.

అభయ్ నవీన్

Source : https://www.instagram.com/abhainaveen

Bigg Boss 8 Telugu Elimination This Week 3: పవర్ స్టార్ పవన్ కళ్యాణ్ మాటల మాంత్రికుడు త్రివిక్రమ్ శ్రీనివాస్ కలయికలో వచ్చిన 'అత్తారింటికి దారేది' సినిమాలో ఓ డైలాగ్ ఉంటుంది. 'జీతాలు ఇచ్చే వాడి మీద జోకులు వేస్తే జీవితం తలకిందులు అయిపోతుంది' అని! అభయ్ నవీన్ అలియాస్ అభయ్ బేతిగంటి పరిస్థితి చెప్పడానికి ఇప్పుడు ఆ డైలాగ్ సరిగ్గా సరిపోతుంది.‌ ఎందుకు అంటే...

మూడో వారం ఎలిమినేట్ అయ్యేది అతడే!
స్టార్ మా టీవీ ఛానల్ బిగ్ బాస్ షో మొదలుపెట్టి మూడు వారాలు పూర్తి కావస్తుంది.‌ మొదటివారం ఇంటి నుంచి బెజవాడ బేబక్క ఎలిమినేట్ అయ్యారు. ఆ తర్వాతి వారం ఆర్జే శేఖర్ బాషా ఇంటి నుంచి బయటకు వచ్చారు. ఇప్పుడు మూడో వారం ఆట తుది దశకు చేరుకుంది. మరి ఈ వారం బయటికి ఎవరు వస్తున్నారో తెలుసా? అభయ్ నవీన్ అలియాస్ అభయ్ బేతిగంటి.

అవును... బిగ్ బాస్ 8 నుంచి మూడో వారం ఎలిమినేట్ అయ్యే కంటెస్టెంట్ అభయ్ నవీన్ అని ఇన్‌సైడ్ వర్గాల టాక్. ఇంటి నుంచి బయటకు రావడానికి అతని ఆట కంటే ఒక విధంగా అతని నోటి దురుసు, ఆటలు ఆడే సమయంలో చూపించిన ప్రవర్తన కారణమని చెప్పాలి. 

ఆట ఆడించే వాడినే తిడితే ఎలా అభయ్ నవీన్?
అభయ్ నవీన్ ఎలిమినేషన్ కావడం వెనుక కారణాలు ఏమిటి? అని ఆరా తీస్తే... విశ్లేషణ చేస్తే... బిగ్ బాస్ మీద నోరు జారడం ప్రధాన కారణం కింద కనిపిస్తుంది. బిగ్ బాస్ ఇంటిలో బిగ్ బాస్ పెట్టిన రూల్స్ ప్రతి ఒక్కరూ పాటించాల్సిందే. అయితే అభయ్ నవీన్ ఆ రూల్స్ మీద మండిపడ్డాడు. ఏకంగా బిగ్ బాస్ మీద బూతులు తిడుతూ విరుచుకుపడ్డాడు. ఒక్కసారి, రెండు సార్లు కాదు ఈ విధంగా నాలుగు ఐదు సార్లు జరిగింది.

అభయ్ నవీన్ ప్రవర్తన పట్ల హోస్ట్ నాగార్జున సైతం ఆగ్రహం వ్యక్తం చేశారు. అతనికి రెడ్ కార్డ్ చూపించారు. బిగ్ బాస్ మీద తర్వాత తర్వాత వారాల్లో ఎవరైనా నోరు జారితే ఏం జరుగుతుందో అభయ్ నవీన్ ఎలిమినేషన్ ద్వారా మిగతా కంటెస్టెంట్లకు ఒక క్లారిటీ వచ్చి ఉండాలి.

బయటకు వచ్చిన తర్వాత అయినా సైలెంట్ అవుతాడా?
బిగ్ బాస్ రియాల్టీ షో ఫాలో అయ్యే వీక్షకులకు వచ్చే మొదటి సందేహం... అభయ్ నవీన్ బయటకు వచ్చిన తర్వాత ఏం చేస్తాడు? అని! షో మధ్యలో ఒకటి రెండు సార్లు బయటకు వెళ్లిన తర్వాత కూడా బిగ్ బాస్ పట్ల తన ప్రవర్తన ఇదే విధంగా ఉంటుందని అభయ్ నవీన్ తెలిపాడు. ఈ మాటలు అని వారం కూడా గడవకముందే అతడిని బయటకు పంపించేశారు. ఇక బయటకు వచ్చిన తర్వాత ఏ విధంగా రెచ్చిపోతాడు? ఎలా చెలరేగుతాడు? అనేది చూడాలి.