Telangana Municipal Elections 2026: తెలంగాణ మున్సిపల్‌ ఎన్నికల్లో మేయర్‌, ఛైర్‌పర్సన్లను ఎలా ఎప్పుడు ఎన్నుకుంటారు? 

Telangana Municipal Elections 2026: మున్సిపల్ ఎన్నికల్లో మరో కీలక ప్రక్రియ మేయర్, ఛైర్‌పర్సన్ ఎన్నిక. దీని కోసం రాష్ట్ర ఎన్నికల సంఘం ఏర్పాటు చేసింది. ఈ ప్రాసెస్ ఎలా ఉంటుందో చూద్దాం.

తెలంగాణ మున్సిపల్‌ ఎన్నికల్లో మేయర్‌, ఛైర్‌పర్సన్లను ఎలా ఎప్పుడు ఎన్నుకుంటారు? 

Source : ABPLIVE AI

Show Quick Read

Key points generated by AI, verified by newsroom

• మేయర్, ఛైర్పర్సన్ ఎన్నికల పరోక్ష ప్రక్రియ ఫిబ్రవరి 16న జరుగుతుంది.
• క్యాంపు రాజకీయాలపై నిషేధం, ఎన్నికల పారదర్శకతకు వీడియో రికార్డింగ్.
• అభ్యర్థులకు ముందస్తు సమాచారం, ప్రత్యేక సీటింగ్, చేతులెత్తే విధానంలో ఓటింగ్.
• ఓట్లు సమానమైతే, లాటరీ ద్వారా విజేతను నిర్ణయిస్తారు.

Telangana Municipal Elections 2026: తెలంగాణ రాష్ట్రంలో మున్సిపల్ ఎన్నికల సందడి కీలక దశకు చేరుకుంది. ఇప్పటికే ఓట్ లెక్కింపు ప్రక్రియ ముగిసిన, వార్డుల వారీగా విజేతలు ఎవరో తేలిపోవడంతో ఇప్పుడు అంది దృష్టి అత్యుత్తమమైన మేయర్‌, ఛైర్‌పర్సన్‌ పదవులై పడింది. రాష్ట్రంలోని 7 నగరపాలక సంస్థలకు మేయర్లను, ఉప మేయర్లను, అలాగే 116 మున్సిపాలిటీలకు ఛైర్‌పర్శన్లు, వైస్‌ ఛైర్‌పర్సన్‌లను ఎన్నుకునేందుకు రాష్ట్ర ఎన్నికల సంఘం ముహూర్తం ఖరారు చేసింది.  నెల 16న పరోక్ష ఎన్నికల ప్రక్రియ నిర్వహించేందుకు సర్వం సిద్ధమైంది. 

ఈ కీలక ఎన్నికల నిర్వహణకు సంబంధించి రాష్ట్ర ఎన్నికల సంఘం అత్యంత కఠినమైన నిబంధనలను పారదర్శకమైన విధానాలను అమలులోకి తెచ్చింది. క్షేత్రస్థాయిలో ఎటువంటి అవాంఛనీయ ఘటనలు జరగకుండా ప్రజాస్వామ్యబద్ధంగా ఎన్నికలు పూర్తి చేసేందుకు అధికారులు ప్రత్యేక చర్యలు చేపట్టారు.

ముందస్తు సమాచారం అందజేత 

ఎన్నికల ప్రక్రియలో భాగంగా, శనివారం నాడే అన్ని జిల్లాల కలెక్టర్‌లకు ఎన్నికల సంఘం స్పష్టమైన ఆదేశాలు జారీ చేసింది. ఎన్నికల్లో పాల్గొనే కార్పొరేటర్లు, కౌన్సిలర్‌లతోపాటు ఎక్స్‌ అఫీషియో సభ్యులకు, సంబంధిత రాజకీయ పార్టీల అధ్యక్షులకు ముందస్తుగా సమాచారం అందించాలని కలెక్టర్లను ఆదేశించింది. ఈ ఎన్నికల నిర్వహణ బాధ్యతను జిల్లా కలెక్టర్లకు, లేదా ఆయన నామినేట్ చేసిన గెజిటెడ్‌ అధికారికి అప్పగించారు. 

క్యాంపు రాజకీయాలపై నిషేధం

మున్సిపల్ ఎన్నికల సమయంలో సాధారణంగా కనిపించే క్యాంపు రాజకీయాలకు చెక్‌ పెట్టేలా ఎన్నికల సంఘం కీలక ఆదేశాలు ఇచ్చింది. ఎన్నికైన ప్రతినిధులను వారి ఇష్టానికి వ్యతిరేకంగా రహస్య ప్రాంతాల్లో లేదా క్యాంపుల్లో నిర్బంధించినట్టు సమాచారం అందితే వెంటనే విచారణ జరిపి వారిని విడుదల చేయాలని పోలీసులు, రెవెన్యూ యంత్రాంగాన్ని ఆదేశించింది. సభ్యులు ఎటువంటి భయబ్రాంతులకు గురి కాకుండా, స్వేచ్ఛగా తమ ఓటు హక్కును వినియోగించుకునేలా అనుకూల వాతావరణాన్ని కల్పించాల్సిన బాధ్యతను కలెక్టర్లు, పోలీసు కమిషనర్లకు అప్పగించారు. ఎవరైనా తమకు ప్రాణ హాని ఉందని రక్షణ కోరితే వారికి తగిన భద్రత కల్పించాలని స్పష్టం చేశారు. 

పారదర్శకత కోసం వీడియో చిత్రీకరణ 

ఎన్నికల ప్రక్రియలో ఎలాంటి అక్రమాలకు తావులేకుండా ఉండేందుకు, సమావేశ మందిరంలో జరిగే ప్రతి అంశాన్ని వీడియో చిత్రీకరించాలని నిబంధన విధించారు. జిల్లా కలెక్టర్‌ అనుమతి ఉన్న చోట ఈ ప్రక్రియను ప్రత్యక్ష ప్రసారం చేసేందుకు కూడా అవకాశం కల్పించారు. సమావేశ మందిరం లోపల ఓటింగ్ సరళిని ప్రభావితం చేసే ఎటువంటి ప్రయత్నాలు అనుమతించబోరు. 

సమావేశ మందిరంలో ఎవరు సీటు ఎక్కడ?

ఎన్నికలు జరిగే హాలులో గందరగోళం లేకుండా ఉండేందుకు పక్కా సీటింగ్ ప్లాన్ రూపొందించారు. వేదికపై ఎన్నికల నిర్వహణ అధికారి, పరిశీలకుడు మాత్రమే కూర్చొంటారు. ఎక్స్‌ అఫీషియో సభ్యులైన ఎంపీలు, ఎమ్మెల్యేలు, ఎమ్మెల్సీల కోసం ప్రత్యేకంగా సీట్లు కేటాయిస్తారు. గుర్తింపు పొందిన జాతీయ, రాష్ట్ర స్థాయి రాజకీయ పార్టీల సభ్యులకు విడివిడిగా స్థలాలు కేటాయిస్తారు. స్వతంత్రులకు ప్రత్యేక సీట్లు ఉంటాయి. ప్రతి గ్రూప్‌ ముందు ఒక డిస్‌ప్లే బోర్డు ఉంటుంది. ఎవరు ఎక్కడ కూర్చోవాలో గుర్తించేలా ఏర్పాట్లు చేస్తారు. 

ఓటింగ్ విధానం ఎలా జరుగుతుంది?

ఈసారి మేయర్, ఛైర్‌పర్సన్‌ ఎన్నికను చేతులెత్తే విధానం ద్వారా నిర్వహించనున్నారు. ముందుగా మేయర్ లేదా ఛైర్‌పర్సన్ ఎన్నికల జరుగుతుంది. ఈ ప్రక్రియ పూర్తి అయిన తర్వాత వైస్‌ చైర్మన్‌, డిప్యూటీ మేయర్ ఎన్నిక జరుగుతుంది. ఒక వేళ మొదటి పదవికి ఎన్నిక పూర్తి కాకపోతే రెండో పదవికి ఎన్నిక నిర్వహించకూడదని రూల్స్‌ స్పష్టంగా చెబుతున్నాయి. పోటీ చేసే అభ్యర్థులు కచ్చితంగా సమావేశంలో ఉండాలి. తమ సమ్మతిని తెలియజేయాలి. 

ఓట్లు సమానమైతే లాటరీ ద్వారా నిర్ణయం 

ఒకవేళ ఇద్దరు అభ్యర్థులకు సమానంగా ఓట్లు వచ్చినట్టైతే విజేతను లాటరీ విధానంలో నిర్ణయిస్తారు. దీని కోసం ప్రత్యేక ప్రక్రియను రూపొందించారు. పోటీలో ఉన్న ఇద్దరు అభ్యర్థుల పేర్లు తలా ఐదు కాగితపు స్లిప్పులపై రాస్తారు. ఆ స్లిప్పులన్నీ ఒకే పరిమాణం, ఒకే రంగులో ఉంటాయి. వాటిని రెండుసార్లు మడిచి, ఎవరు గుర్తు పట్టలేని విధంగా అందరి ముందు ఒక డబ్బాలో వేస్తారు. బాగా కలుపుతారు. అధికారి తీసిన మొదటి స్లిప్పులో ఎవరి పేరు ఉంటే వాళ్లే విజేత అవుతారు. 

మరిన్ని చదవండి

కరిగిపోతున్న బీఆర్ఎస్ ఓటు బ్యాంక్ - కేటీఆర్ సంతృప్తి వెనుక అసలు నిజమెంత?

మున్సిపల్ ఫలితాలు రేవంత్ పాలకు రిఫరెండమేనా? చరిత్ర చెప్పేది మాత్రం భిన్నం !