మధ్యప్రదేశ్‌ బాలిక అత్యాచార ఘటనలో ముగ్గురు అరెస్ట్, బాధితురాలు ఎక్కిన ఆటోలో రక్తపు మరకలు

Ujjain Crime News: ఉజ్జెయిన్ బాలిక అత్యాచార ఘటనలో పోలీసులు ముగ్గురిని అరెస్ట్ చేశారు.

ఉజ్జెయిన్ బాలిక అత్యాచార ఘటనలో పోలీసులు ముగ్గురిని అరెస్ట్ చేశారు.

Ujjain Crime News: 

ముగ్గురు అరెస్ట్..

మధ్యప్రదేశ్‌లోని ఉజ్జెయిన్‌లో ఓ 13 ఏళ్ల బాలికపై సామూహిక అత్యాచార ఘటన సంచలనమైంది. ఆమె రోడ్డు మీద నడుచుకుంటూ సాయం కోసం వేడుకున్న విజువల్స్‌ షాక్‌కి గురి చేశాయి. ఇప్పటికే ఈ ఘటనపై విచారణ ప్రారంభించిన పోలీసులు కీలక వివరాలు వెల్లడించారు. ఈ కేసులో ఓ ఆటోడ్రైవర్‌ని అరెస్ట్ చేశారు. ఆ ఆటోలో రక్తపు మరకలు కనిపించడాన్ని చూసి ఆరా తీశారు. ఆ తరవాత అదుపులోకి తీసుకున్నారు. జీవన్ ఖేరి అనే ఓ ఏరియా వద్ద బాధితురాలు ఇదే ఆటోని ఎక్కినట్టు CC కెమెరాలో రికార్డ్ అయిందని పోలీసులు వెల్లడించారు. ఈ ఫుటేజ్ ఆధారంగానే ఆటో డ్రైవర్‌ని అరెస్ట్ చేశారు. ఆ ఆటోలో రక్తపు మరకలు కనిపించాయి. వాటిని సేకరించి ఫోరెన్సిక్ పరీక్షలకు పంపారు. ఇదే కేసుతో సంబంధం ఉన్న మరో ముగ్గురినీ అదుపులోకి తీసుకున్నారు. అయితే...వీళ్ల వివరాలు మాత్రం పోలీసులు వెల్లడించలేదు. బాధితురాలు సాయం కోసం వీధుల్లో తిరిగిన ప్రాంతానికి 8 కిలోమీటర్ల దూరంలో CC కెమెరాలో ఆ బాధితురాలు ఆటో ఎక్కిన విజువల్స్ రికార్డ్ అయ్యాయి. ఆ పరిసర ప్రాంతాల్లోనూ పోలీసులు విచారణ కొనసాగిస్తున్నారు. ఈ ప్రక్రియ పూర్తైన తరవాతే మిగతా వివరాలు వెల్లడిస్తామని తెలిపారు. 

పోలీసులకు కాల్ చేసిన పూజారి..

ఈ ఘటన జరిగిన రోజున ఉదయం 9.30 నిముషాల ప్రాంతంలో బాలికను ఆ దారుణ స్థితిలో చూసినట్టు ఆమెని కాపాడిన పూజారి వెల్లడించారు. ఆమె ఒంటినిండా రక్తం ఉందని, సరిగ్గా మాట్లాడలేకపోతోందని వివరించారు. 

"బాలికకు తీవ్ర రక్తస్రావం అవుతోంది. సరిగ్గా మాట్లాడలేకపోతోంది. కళ్లు ఉబ్బిపోయాయి. వెంటనే పోలీసులకు కాల్ చేశాను. ఆమె ఒంటి మీద ఓ టవల్ కప్పాను. ముందుగా  హెల్ప్‌లైన్‌కి కాల్ చేశాను. కానీ కలవలేదు. ఆ తరవాత దగ్గరి పోలీస్ స్టేషన్‌కి కాల్  చేశాను. పరిస్థితి ఇలా ఉందని వివరించాను. 20 నిముషాల్లో పోలీసులు ఆశ్రమానికి వచ్చారు"

- బాలికను చూసిన పూజారి 

ఇదీ జరిగింది..

సామూహిక అత్యాచారానికి గురైన 12 ఏళ్ల బాలిక రోడ్డుపై అర్ధనగ్నంగా నడుచుకుంటూ వచ్చిన దృశ్యాలు అక్కడి CC కెమెరాలో రికార్డ్ అవడం సంచలనమైంది. చాలా దారుణమైన స్థితిలో ఉన్న ఆ బాలిక రోడ్డుపై నడుచుకుంటూ ఇంటింటికీ తిరుగుతూ సాయం కోసం అభ్యర్థించడం కలిచివేసింది. ఆమెను అలాంటి స్థితిలో చూసినా ఎవరూ సాయం చేయలేదు. ఓ వ్యక్తి ఆమెని చూసి కూడా పట్టించుకోకుండా అలాగే ముందుకు వెళ్లిపోవడం CC కెమెరాలో రికార్డ్ అయింది. ప్రస్తుతం ఈ వీడియోలు రాష్ట్రంలో సంచలనం సృష్టిస్తున్నాయి. ఉజ్జెయిన్ నుంచి 15 కిలోమీటర్ల దూరంలో ఉన్న బద్నాగర్ రోడ్‌ వద్ద ఈ ఘటన జరిగింది. తన ఒంటిని కప్పుకునేందుకు నానా ఇబ్బందులు పడుతూ రోడ్డుపై నడుచుకుంటూ వెళ్లిపోయింది. చివరకు ఓ ఆశ్రమం వద్దకు చేరుకుంది. ఆమెని చూసిన ఓ పూజారి వెంటనే ఆమె శరీరాన్ని కప్పాడు. ఆమెపై అత్యాచారం జరిగిందని గుర్తించాడు. వెంటనే స్థానిక ఆసుపత్రికి తీసుకెళ్లాడు. అన్ని పరీక్షలు చేసిన వైద్యులు అత్యాచారం జరిగినట్టు ధ్రువీకరించారు. గాయాలు చాలా తీవ్రంగా ఉండడం వల్ల మెరుగైన చికిత్స కోసం ఇండోర్‌కి తరలించారు. అప్పటికే చాలా రక్తం పోయింది. పోలీసులే ముందుకొచ్చి ఆమెకి రక్తదానం చేశారు.