Skeleton Found In Hospital: 24 ఏళ్లుగా తెరవని లిఫ్ట్.. తెరిచాక చూస్తే అందులో అస్థిపంజరం.. ఇంతకీ ఏం జరిగింది?

పనిచేయకుండా పోయిన లిఫ్ట్‌ను దాదాపు రెండున్నర దశాబ్దాల తర్వాత తెరిచిన సిబ్బంది అందులోని దృశ్యాలను చూసి షాక్ అయ్యారు. అందులో ఓ వ్యక్తి అస్థిపంజరం బయటపడింది.  

లిఫ్ట్ లో అస్థిపంజరం(ఫైల్ ఫొటో)

ఓ ఆస్పత్రిలో దాదాపు 24 ఏళ్లుగా మూసి ఉన్న ఎలివేటర్‌ని రెండు మూడు రోజుల క్రితం తెరిచారు. అయితే అందులో ఓ అస్థిపంజరం కనిపించి భయభ్రాంతులకు గురి చేసింది. విషయం పోలీసులు తెలియడంతో వారు అక్కడకు చేరుకుని దర్యాప్తు ప్రారంభించారు. 

ఉత్తరప్రదేశ్‌ బస్తి జిల్లా కైలీ ప్రాంతంలో 1991 సంవత్సరంలో 500 పడకలతో ఓపెక్‌ ఆస్పత్రిని ప్రారంభించారు. ఈ క్రమంలో ఆస్పత్రిలో ఉన్న ఎలివేటర్‌ పాడు కావడంతో ఆరు సంవత్సరాల తర్వాత అంటే 1997లో మూసి వేశారు. అప్పటి నుంచి క్లోస్‌ చేసి ఉన్న ఈ ఎలివేటర్‌ని 24 ఏళ్ల తర్వాత అంటే ఈ ఏడాది సెప్టెంబర్‌ 1న తెరిచారు. ఈ క్రమంలో దానిలో వారికి ఓ అస్థిపంజరం దర్శనమిచ్చి భయభ్రాంతులకు గురి చేసింది. 
ఈ విషయం పోలీసులకు తెలియడంతో వారు ఆస్పత్రి వద్దకు చేరుకుని దర్యాప్తు ప్రారంభించారు. ప్రస్తుతం ఫోరెన్సిక్‌ సిబ్బంది ఈ మిస్టరీని ఛేదించే పనిలో ఉన్నారు. ఈ అస్థిపంజరం పురుషుడిదిగా గుర్తించారు. ఇక పోలీసులు గత 24 ఏళ్లుగా ఈ ప్రాంతంలో నమోదైన మిస్సింగ్‌ పర్సన్స్‌ ఫిర్యాదులను పరిశీలిస్తున్నారు.

ప్రస్తుతం పోలీసులు పని చేయని లిఫ్ట్‌లోకి ఈ వ్యక్తి ఎందుకు వెళ్లాడు... అతడే లోపలికి వెళ్లాడా.. లేక ఎవరైనా అతడిని హత్య చేసి ఆ తర్వాత మృతదేహాన్ని తీసుకువచ్చి.. దీనిలో పడేశారా.. లేక పొరపాటున సదరు వ్యక్తి లిఫ్ట్‌లో ఇరుక్కుపోయి.. ఊపిరాడక చనిపోయి ఉంటాడా అనే కోణాల్లో దర్యాప్తు చేస్తున్నారు. డీఎన్‌ఏ రిపోర్ట్‌ వస్తే దీనికి సంబంధించి మరిన్ని వివరాలు తెలుస్తాయంటున్నారు పోలీసులు.

'దీనికి సంబంధించి ఎవరైనా రాతపూర్వక ఫిర్యాదు ఇస్తే.. మేం కేసు నమోదు చేస్తాం. ప్రస్తుతం పోలీసులు పలు కోణాల్లో ఈ కేసును దర్యాప్తు చేస్తున్నారు. ఈ మగ అస్థిపంజరం వెనక ఉన్న మిస్టరీని పరిష్కరించడానికి జిల్లాలోని 24 పోలీసు స్టేషన్ల పోలీసులు పని చేస్తున్నారు అని తెలిపారు.'బస్తి జిల్లా ఎస్పీ తెలిపారు.

Also Read:cమీరు ఇన్ స్టాలో ఉన్నారా? అయితే న్యూడ్ కాల్స్ రావొచ్చు.. తర్వాత పోర్న్ వీడియోల్లో మీ ఫేస్ ఉండొచ్చు