Crime News: ప్రాణం తీసిన జ్యోతిషం పిచ్చి- భర్తతో గొడవపడి భార్య ఆత్మహత్య

జ్యోతిషం పచ్చని కుటుంబంలో చిచ్చుపెట్టింది. ఆలుమగల మధ్య అగ్గి రాజేంసింది. భార్య ఆత్మహత్య చేసుకునే వరకు వెళ్లింది. ఇంతకీ అసలు ఏం జరిగింది...? జ్యోతిషం ప్రాణం తీయడమేంటి..?

ప్రాణం తీసిన జ్యోతిషం పిచ్చి- భర్తతో గొడవపడి భార్య ఆత్మహత్య

Hyderabad Crime News: జ్యోతిషం (Astrology) పిచ్చి.. మహిళ ప్రాణం తీసింది. ఎప్పుడు ఏం జరుగుతుందో ఏమో... భర్త వదిలేస్తాడేమో అన్న భయం ఆమెను పట్టిపీడించింది. ఆ  ఆలోచన మనుసులో పెట్టుకుని... తరచూ భర్తతో గొడవపడుతూ వచ్చేది. ఆమె తీరుతో విసిగిపోయిన భర్త చేయిచేసుకున్నాడు. దీంతో తీవ్ర మనస్తాపం చెంది.. ఆత్మహత్య  చేసుకుందా ఇల్లాలు. ఈ విషాద సంఘటన హైదరాబాద్‌లోనే జరిగింది.

హైదరాబాద్‌ (Hyderabad)లోని అంబర్‌పేట(Amberpet)లో ఉండే చందు-స్వరూప దంపతుల కుమార్తె బబిత (28)కు.. ఐదేళ్ల క్రితం బాలంరాయికి చెందిన సాఫ్ట్‌వేర్‌ ఉద్యోగి రామకృష్ణ అలియాస్‌  రాము(31)తో పెళ్లి జరిగింది. కానాజిగూడలోని ఇందిరానగర్‌లో వీరు కాపురం ఉంటున్నారు. వీరికి మూడేళ్ల బాబు ఉన్నాడు. ఆదివారం (జనవరి 7వ తేదీ) బాబు పుట్టిన రోజు వేడుకలు ఘనంగా నిర్వహించారు భార్యాభర్తలు. బర్త్‌డే వేడుకలకు బంధుమిత్రులంతా హాజరయ్యారు. బబిత తల్లిదండ్రులు మాత్రం హాజరుకాలేదు. సోమవారం (జనవరి 8వ తేదీ) ఉదయం బబిత భర్త విధులకు వెళ్లాడు. తర్వాత రెండు గంటలకు అంగన్‌వాడీ కేంద్రం నుంచి చిన్నారి ఇంటికి వచ్చాడు.. తన తల్లి ఇంట్లో ఫ్యానుకు వేలాడుతుండటం చూసి కింది పోర్షన్‌లో ఉన్న బాబాయికి చెప్పాడు. వెంటనే ఆమె దించి.. ప్రైవేటు ఆసుపత్రికి తరలించారు. కానీ, అప్పటికే బబిత మృతిచెందింది. బబిత తల్లిదండ్రులు ఆమె భర్త రాముపై దాడిచేశారు. అదనపు కట్నం వేధింపులతోనే మృతి చెందిందని పోలీసులకు ఫిర్యాదు చేశారు. 

అయితే అత్తింటివారి వారు చెప్తున్నది వేరేలా ఉంది. బబితకు జ్యోతిష్యంపై నమ్మకం ఎక్కువ. జ్యోతిషం నమ్మొద్దని బబితను ఆమె భర్త రాము పదేపదే కోరేవాడు. ఈ విషయంలో ఇటీవల వారి మధ్య వాగ్వాదం జరిగింది. రాము అందరిముందు బబితను కొట్టాడు. దీంతో మనస్తాపం చెంది ఆత్మహత్య చేసుకుని ఉంటుందని చెప్తున్నారు. పోలీసులు విచారణలోనూ ప్రాథమింగా ఇదే తేలింది.

అసలు ఏం జరిగిందంటే...?
బబితకు ఉన్న జ్యోతిషం పిచ్చే కొంపముంచింది. ఆమెకు జ్యోతిషం అంటే ఎంతో నమ్మకం. ఎప్పుడూ యూట్యూబ్‌లో జ్యోతిషం వీడియోలు చూస్తూ ఉండేది. భవిష్యత్‌ ఎలా ఉంటుంది... ఫ్యూచర్‌లో ఏం జరగబోతోంది. మంచి జరుగుతుందా..? చెడు జరుగుతుందా..? అనేది ఎప్పుడు జ్యోతిషం వీడియోలు చూస్తూ తెలుసుకునేది. బబితకు పెళ్లి జరిగి బాబు పుట్టిన తర్వాత కూడా... జ్యోతిషంపై పిచ్చి పోలేదు. ఇటీవల జ్యోతిషం వీడియోలో.... తన జాతకం ప్రకారం దంపతులు విడిపోతారని తెలుసుకుంది బబిత. ఈ విషయాన్ని బలంగా నమ్మి తీవ్ర మనస్తాపం చెందింది. పదేపదే భర్త దగ్గర ఈ విషయాన్ని ప్రస్తావిస్తూ... ప్రశ్నించడం మొదలుపెట్టింది. ఆమె ప్రశ్నలతో విసిగిపోయాడు భర్త రాము. ఒక సమయంలో అందరి ముందు ఆమెపై చేయి చేసుకున్నాడు. భర్త కొట్టాడన్న మనస్తాపంతోనే బబిత ఆత్మహత్య చేసుకుందని అత్తింటి వారు చెప్తున్నారు.

బబిత తల్లిదండ్రులు మాత్రం వరకట్న వేధింపుల వల్లే ఆమె ఉరివేసుకుందని ఫిర్యాదు చేశారు. స్థానికులు, అత్తింటివారు మాత్రం జ్యోతిషం విషయంలో భార్యాభర్తల మధ్య జరిగిన గొడవ కారణంగా ఆత్మహత్య చేసుకుందని అంటున్నారు. ఇరువర్గాల నుంచి సమాచారం సేకరించిన పోలీసులు.. లోతుగా దర్యాప్తు చేస్తున్నారు. అన్ని కోణాల్లో విచారణ జరుపుతున్నారు.