Hanamkonda Crime News: కారు డిక్కీలో మహిళ డెడ్‌బాడీ కేసును ఛేదించిన కాజీపేట పోలీసులు.. పరువు కోసం దారుణం!

Elkathurthy Murder Case | హన్మకొండ జిల్లా ఎల్కతుర్తిలో కారు డిక్కీలో లభించిన గోదావరిఖనికి చెందిన మహిళ మృతదేహం కేసును పోలీసులు ఛేదించారు. తండ్రి రాజేశం ఆదేశంతోనే ప్రియుడు వినోద్ ఈ హత్య చేశాడు.

కారు డిక్కీలో మహిళ డెడ్‌బాడీ కేసును ఛేదించిన కాజీపేట పోలీసులు

Source : x.com

Show Quick Read

Key points generated by AI, verified by newsroom

• ఎల్కతుర్తి కారు డిక్కీలోని మృతదేహం మానసగా పోలీసులు గుర్తించారు.
• వివాహిత ప్రియుడు వినోద్‌పై పెళ్లి ఒత్తిడితో గొంతు నులిమి చంపాడు.
• కుమార్తె పరువు తీస్తోందని తండ్రి హత్య చేయమని కోరాడు.
• ప్రధాన నిందితుడు వినోద్ అరెస్ట్; తండ్రిని కూడా అదుపులోకి తీసుకోవచ్చు.

ఎల్కతుర్తి: హన్మకొండ జిల్లా ఎల్కతుర్తి శివారులో కారు డిక్కీలో మహిళ మృతదేహం లభ్యమైన కేసు మిస్టరీ వీడింది. ఈ సంచలన కేసును  కాజీపేట పోలీసులు ఛేదించారు. వివాహిత తండ్రి చెప్పడంతో ప్రియుడే ఆమెను హత్య చేశాడని విచారణలో తేలడంతో పోలీసులే ఆశ్చర్యపోయారు. 

ఆ మృతిచెందిన మహిళ పెద్దపల్లి జిల్లా గోదావరిఖనికి చెందిన మానస (33)గా గుర్తించినట్లు పోలీసులు తెలిపారు. స్వయంగా మానస తండ్రే ఆమెను హత్య చేయమని చెప్పినట్లు విచారణలో దిగ్భ్రాంతికర విషయాలు వెలుగులోకి వచ్చాయి. ఈ ఘటనకు సంబంధించి ఎల్కతుర్తికి చెందిన ఆమె ప్రియుడు వినోద్‌కుమార్‌ను పోలీసులు అరెస్ట్ చేసి విచారణ చేపట్టగా నిజాలు బయటకొచ్చాయి.

కాజీపేట ఏసీపీ పింగళి ప్రశాంత్‌రెడ్డి ఈ కేసు వివరాలను వెల్లడించారు. మానస అనే మహిళకు గతంలో రెండు వివాహాలు కాగా విడాకులు తీసుకుని ప్రస్తుతం పుట్టింట్లోనే ఉంటోంది. ఈ క్రమంలో కరీంనగర్‌కు చెందిన వినోద్‌కుమార్‌తో ఆమెకు పరిచయం ఏర్పడింది. ఆ పరిచయం ప్రేమగా మారింది. ఇటీవల అరుణాచలం వెళ్తున్నానని ఇంట్లో చెప్పిన మానస వినోద్ గదికి వెళ్లి అతడితో గడిపింది. 

తనను ఇప్పుడే పెళ్లి చేసుకోవాలని ప్రియుడు వినోద్‌పై  తీవ్ర ఒత్తిడి తెచ్చింది. దీంతో వినోద్ ఈ విషయాన్ని మానస తండ్రి రాజేశంకు ఫోన్ చేసి చెప్పాడు. కుమార్తె తమ మాట వినకుండా ఇష్టారీతిన తిరుగుతూ కుటుంబ పరువు తీస్తోందని తండ్రి రాజేశం ఆగ్రహం వ్యక్తం చేశారు. ఆమె వల్ల పరువుపోతోందని, చంపేసినా పర్లేదని వినోద్‌కు చెప్పాడు. ఏదో ఒకటి చేసి ఆమె వల్ల కలుగుతున్న ఇబ్బందిని, పరువు సమస్యను తీర్చాలని కోరాడు. 

తాను నచ్చజెప్పినా వినకుండా పెళ్లి చేసుకోవాల్సిందేనని వినోద్‌తో మానస గొడవ పడింది. ఓ వైపు కుటుంబసభ్యులకు టార్చర్ చూపిస్తున్న మానస మరోవైపు పెళ్లి చేసుకోవాలని తనను వేధిస్తుందని ఆగ్రహంతో  గొంతు నులిమి ఆమెను హత్య చేశాడు. అనంతరం మృతదేహాన్ని కారు (TS 03 FF 8094) డిక్కీలో పెట్టి ఎల్కతుర్తిలోని తన ఇంటి ప్రాంగణానికి తీసుకొచ్చాడు. మానస మృతదేహాన్ని పాతిపెట్టేందుకు తవ్వకం ఏర్పాట్లు చేస్తుండగా కారు నుంచి తీవ్ర దుర్వాసన రావడంతో స్థానికులు అనుమానం వచ్చి పోలీసులకు సమాచారం అందించారు. దీంతో రంగంలోకి దిగిన పోలీసులు మానస మృతదేహాన్ని స్వాధీనం చేసుకుని పోస్టుమార్టం కోసం ప్రభుత్వ ఆసుపత్రికి తరలించారు. ఆమెను హత్య చేసిన వినోద్‌కుమార్‌ను అరెస్ట్ చేసి, కోర్టులో హాజరుపరిచి రిమాండ్‌కు తరలించారు. హత్య చేయాలని చెప్పిన ఆమె తండ్రిని అరెస్ట్ చేసే అవకాశం ఉంది.