Drugs Case: చిక్కుల్లో హీరోయిన్ సంజన, రాగిణి.. డ్రగ్స్ కేసులో కీలక ఆధారాలు

ఏడాది క్రితం శాండల్‌వుడ్‌లో కలకలం రేపిన డ్రగ్స్‌ ఇష్యూ మళ్లీ తెరపైకి వచ్చింది. రాగిణి, సంజన నుంచి శాంపిల్స్ తీసుకున్న సెంట్రల్‌ ఫోరెన్సిక్‌ సైన్స్‌ ల్యాబరేటరీ (CFSL) తాజాగా రిపోర్ట్‌ విడుదల చేసింది.

అవును..రాగిణి, సంజనాలు డ్రగ్స్‌ తీసుకున్నారు

దేశ వ్యాప్తంగా సంచలనం రేపిన శాండిల్ వుడ్ డ్రగ్స్ రాకెట్ లో హీరోయిన్స్ సంజన గల్రానీ - రాగిణి ద్వివేదిలను బెంగుళూరు సెంట్రల్ క్రైమ్ బ్రాంచ్ పోలీసులు అరెస్ట్ చేసిన సంగతి తెలిసిందే. బెయిల్ పై విడుదలైన ఈ ఇద్దరు హీరోయిన్లపై ఈ కేసులో ఉచ్చు బిగుస్తోందని తెలుస్తోంది. రాగిణి - సంజనలు డ్రగ్స్ తీసుకున్నట్లు FSL రిపోర్టులో తేలింది. బెంగళూరు పోలీసులు 2020 అక్టోబర్ లో ఇద్దరి వెంట్రుకలను  FSLకు పంపగా.. ఈ హీరోయిన్లు డ్రగ్స్ సేవించినట్లు నివేదిక ద్వారా స్పష్టమైంది. దీంతో మరోసారి రాగిణి - సంజనలకు సమన్లు జారీ చేయనున్నట్లు బెంగళూరు పోలీసులు తెలిపారని కన్నడ సినీ వర్గాలు చెబుతున్నాయి.

కన్నడ చిత్ర సీమలో ఎంతోమంది ప్రముఖులు నిషేధిత డ్రగ్ యూజర్లేనని బెంగుళూరు సెంట్రల్ క్రైమ్ బ్రాంచ్ పోలీసుల విచారణలో వెలుగులోకి వచ్చింది. రాగిణి ద్వివేది - సంజన గల్రాని లతో పాటు డ్రగ్స్ తో సంబంధం ఉన్న పలువురుని సీసీబీ అరెస్టు చేసింది. మాదకద్రవ్యాల వినియోగం - సరఫరా కేసులో సెప్టెంబర్ 7న రాగిణి ద్వివేదిని.. సెప్టెంబర్ 9న సంజనను అరెస్ట్ చేశారు. ఇద్దరూ 3 నెలలకు పైగా బెంగుళూరులోని పరప్పన అగ్రహార సెంట్రల్ జైల్లో ఉండి బెయిల్ పై బయటికి వచ్చారు.

డ్రగ్స్ కేసులో రాగిణి ద్వివేది - సంజనా గల్రాని తో పాటు మరో 25 మందిపై చార్జిషీట్ ఫైల్ అయింది.  2019 మే 26న రాగిణి ద్వివేది బర్త్ డే పార్టీలో డ్రగ్స్ సరఫరా చేయడం.. ప్రియుడు రవిశంకర్ తో కలసి ఓ హోటల్ లో నిర్వహించిన పార్టీలో ఎక్స్టసీ డ్రగ్ మాత్రలు తీసుకోవడం.. ఇతరులకూ సరఫరా చేయడం వంటి వాటిని ఈ చార్జిషీట్ లో ప్రస్తావించారు. అలానే సంజన కు డ్రగ్స్ వినియోగం, సరఫరాతో సంబంధం ఉన్నట్లు పేర్కొన్నారు. ఈ క్రమంలో ఇప్పుడు FSL రిపోర్టులో హీరోయిన్లు ఇద్దరూ డ్రగ్స్ తీసుకున్నట్లు వెల్లడైంది. తెలుగు ప్రేక్షకులకు రాగిణి పెద్దగా తెలియకపోయినా.. సంజన మాత్రం ప్రభాస్‌ హీరోగా తెరకెక్కిన ‘బుజ్జిగాడు’తో పాటు పలు తెలుగు చిత్రాల్లో నటించింది.