Personal Loan Death liability: పర్సనల్ లోన్ తీసుకున్న వ్యక్తి చనిపోతే బ్యాంకులు నగదు ఎవరి నుంచి వసూలు చేస్తాయి ?
Personal Loan Death Liability: పర్సనల్ లోన్ తీసుకున్న వ్యక్తి చనిపోతే ఆ వ్యక్తిగత రుణాన్ని తిరిగి చెల్లించే బాధ్యత ఎవరిపై ఉంటుందనే సందేహం చాలా మందిలో ఉంటుంది. తెలుసుకుందాం.
Personal Loan | నగదు అవసరం పడితే ఇతరులను అప్పు అడుగుతుంటాం. కానీ రోజులు మారాయి. నగదు కావాలంటే ఇతరుల వద్ద చేతులు చాపడం కంటే బ్యాంకులు, ఇతర ఫైనాన్షియల్ సంస్థల ద్వారా పర్సనల్ లోన్ తీసుకుంటున్నారు. అర్జంటుగా అవసరం పడినా, ఏదైనా కార్యక్రమానికి చేతిలో డబ్బు లేకపోతే పర్సనల్ లోన్ (Personal Loan) తీసుకోవడానికి ప్రజలు మొగ్గు చూపుతుంటారు. మీరు కొన్ని విషయాలు పాటిస్తే చాలా సందర్భాలలో పర్సనల్ లోన్ సులభంగానే లభిస్తుంది. అయితే దీనిపై వడ్డీ రేట్లు ఎక్కువగా ఉంటాయని తెలిసిందే. కానీ సమయానికి మీకు లోన్ దొరకడం ఒక్కటే రిలీఫ్.
దురదృష్టవశాత్తు పర్సనల్ లోన్ తీసుకున్న వ్యక్తి మరణిస్తే, అప్పుడు బాకీ ఉన్న లోన్ మొత్తాన్ని చెల్లించాల్సిన బాధ్యత ఎవరిది అనే ప్రశ్నఆ కుటుంబసభ్యులకు వస్తుంది. అలాగే బ్యాంకులు ఈ సందర్భాలలో ఎలాంటి చర్యలు తీసుకుంటాయి ? ఈ పరిస్థితుల్లో లోన్ సెటిల్మెంట్ ఎలా జరుగుతుందో అర్థం చేసుకోవాలి. లేకపోతే భవిష్యత్తులో కుటుంబాలు చాలా ఇబ్బందులకు గురవుతాయి. కనుక ఇలాంటి ఆర్థిక పరమైన విషయాలు తెలుసుకోవాలి..
రూల్స్, కండీషన్స్ వర్తిస్తాయి
లోన్ తీసుకున్న వ్యక్తి చనిపోయిన తర్వాత ఆ లోన్ తిరిగి చెల్లించే విషయం లోన్ అగ్రిమెంట్లో పేర్కొన్న రూల్స్, కండీషన్స్పై ఆధారపడి ఉంటుంది. ఒకవేళ లోన్ తీసుకున్న వ్యక్తి మరణిస్తే, బ్యాంకులు లేదా NBFCలు ముందుగా బకాయి మొత్తాన్ని ఎలా తిరిగి పొందవచ్చు అని మార్గాలను అన్వేషిస్తాయి. ఆ తర్వాత, పరిస్థితులకు అనుగుణంగా లోన్ రికవరీ ఎలా చేయాలనే తుది నిర్ణయం తీసుకుంటారు.
కుటుంబంపై ఏ ప్రభావం ఉంటుంది?
పర్సనల్ లోన్ సాధారణంగా అన్సెక్యూర్డ్ (Unsecured) లోన్. అంటే ఈ లోన్ తీసుకోడానికి ఎలాంటి ఆస్తిని లేదా వస్తువులు తాకట్టు పెట్టాల్సిన అవసరం ఉండదు. అందుకే ఒకవేళ లోన్ తీసుకున్న వ్యక్తి చనిపోతే ఆ లోన్ చెల్లించాల్సిన బాధ్యత సంబంధిత వ్యక్తి కుటుంబ సభ్యులపై ఉండదు.
కో-బారోయర్ (Co borrower), గ్యారెంటర్ బాధ్యత
లోన్ తీసుకునే సమయంలో కో-బారోయర్ లేదా గ్యారెంటర్ను చేర్చుకున్న సమయంలో లోన్ చెల్లించే బాధ్యత వారిపై పడుతుంది. కో-బారోయర్ మొదటి నుంచీ లోన్ చెల్లించడంలో సమాన వాటాదారుగా ఉంటారు. కనుక పర్సనల్ లోన్ EMIలు కట్టడంలో కో-బారోయర్కు పూర్తి బాధ్యత ఉంటుంది. మరోవైపు, లోన్ తీసుకున్న ప్రధాన గ్రహీత లోన్ చెల్లించలేని సందర్భంతో ఆ బాధ్యత గ్యారెంటర్పై పడుతుంది. అలాంటి పరిస్థితిలో లోన్ చెల్లించాలని గ్యారెంటర్పై ఒత్తిడి రావచ్చు.
ఆస్తి ద్వారా వసూలు చేయవచ్చు
ఒకవేళ లోన్ తీసుకునే వ్యక్తి దానికి బదులుగా ఏదైనా ఆస్తిని కనుక బ్యాంకులు లేదా సంస్థల వద్ద తాకట్టు పెట్టి ఉంటే, బ్యాంక్ ఆ ఆస్తి నుండి లోన్ మొత్తాన్ని వసూలు చేస్తుంది. ఉదాహరణకు, పర్సనల్ లోన్ తీసుకున్న వ్యక్తి ఇల్లు, భూమి లేదా బంగారాన్ని తాకట్టు పెట్టినట్లయితే, బ్యాంక్ వాటిని విక్రయించి లోన్ మొత్తాన్ని రికవరీ చేసుకోవడానికి చర్యలు తీసుకుంటుంది.
ఇలాంటి సందర్భాలు ఎదురైతే ఆర్థిక నిపుణుల్ని సంప్రదించాలి. లేదా బ్యాంక్ లోన్ సంబంధిత రూల్స్ పూర్తిగా తెలుసుకున్నాకే సంబంధిత కుటుంబసభ్యులు స్పందించాల్సి ఉంటుంది.
టాప్ హెడ్ లైన్స్
ట్రెండింగ్ వార్తలు
