యమహా బైక్ కొనేవాళ్లకు పండగే! FZ నుంచి R15 వరకు ఆఫర్ల వర్షం.. ఈ రాష్ట్రాల్లో మాత్రం నో ఛాన్స్!
యమహా బైక్‌లు, స్కూటర్లపై పండుగ ఆఫర్లు ప్రకటించింది. FZ సిరీస్‌పై రూ.5,999 వరకు బీమా ప్రయోజనం, తక్కువ డౌన్ పేమెంట్, మోడల్ వారీగా పూర్తి వివరాలు తెలుసుకోండి.
Yamaha Festive Offers 2026: ఈ పండుగ సీజన్‌లో కొత్త బైక్ లేదా స్కూటర్ కొనాలని ప్లాన్ చేస్తున్నవాళ్లకు శుభవార్త. ప్రముఖ ద్విచక్ర వాహన తయారీ సంస్థ యమహా మోటార్ ఇండియా.. తన బైక్‌లు, స్కూటర్లపై ప్రత్యేక పండుగ ఆఫర్లను ప్రకటించింది. ఎంపిక చేసిన మోడళ్లపై బీమా ప్రీమియం ప్రయోజనాలతో పాటు తక్కువ డౌన్ పేమెంట్, సులభమైన ఫైనాన్స్ సదుపాయాలను అందిస్తోంది. కొన్ని మోడళ్లపై రూ.5,999 వరకు బీమా ప్రయోజనం పొందవచ్చు. అయితే అన్ని బైక్‌లకు ఒకే రకమైన ఆఫర్లు లేవు. ఏ మోడల్‌పై ఎంత ప్రయోజనం లభిస్తుందో తెలుసుకుందాం.
FZ సిరీస్‌పై అత్యధిక ప్రయోజనం
యమహా ప్రకటించిన ఆఫర్లలో FZ సిరీస్‌కు అత్యధిక ప్రాధాన్యం లభించింది. ఈ సిరీస్‌లోని ఎంపిక చేసిన మోడళ్లపై రూ.5,999 బీమా ప్రయోజనం అందిస్తున్నారు. డౌన్ పేమెంట్ కేవలం రూ.3,900 నుంచి ప్రారంభమవుతుంది.
FZ సిరీస్‌లో FZ-S Fi Hybrid, FZ-S Fi, FZ-S Fi V4 DLX, FZ-S Fi V4, FZ Rave, FZ-Fi, FZ Blue Flex మోడళ్లు ఉన్నాయి. ఈ మోడళ్లలో ఎంపిక చేసిన వాహనాల కొనుగోలుపై పండుగ ఆఫర్లు వర్తిస్తాయి.
స్కూటర్లపై ఎలాంటి ఆఫర్లు?
Yamaha Fascino 125, RayZR 125 స్కూటర్లపై కూడా ప్రత్యేక ప్రయోజనాలు అందుబాటులో ఉన్నాయి. ఈ రెండు స్కూటర్ల కొనుగోలుపై కనీసం రూ.3,399 బీమా ప్రయోజనం లభిస్తుంది. డౌన్ పేమెంట్ రూ.2,499 నుంచి ప్రారంభమవుతుంది.
తక్కువ ప్రారంభ చెల్లింపుతో స్కూటర్ కొనాలని భావించేవారికి ఈ ఆఫర్లు ఉపయోగపడవచ్చు. బీమా ప్రయోజనం, ఫైనాన్స్ సదుపాయాలు వినియోగదారుల అర్హత, డీలర్‌షిప్ నిబంధనల ఆధారంగా మారవచ్చు.
ఇది కూడా చదవండి: Royal Enfield Guerrilla 450 - Triumph Tracker 400 మధ్య పోటీ.. ఏ బండి ముందుగా 100 కి.మీ. వేగాన్ని అందుకుంది?
XSR155పై రూ.5,555 బెనిఫిట్
XSR155 బైక్ కొనుగోలుపై రూ.5,555 బీమా ప్రయోజనాన్ని యమహా అందిస్తోంది. ఈ బైక్‌కు డౌన్ పేమెంట్ రూ.4,999 నుంచి ప్రారంభమవుతుంది. ప్రత్యేక లుక్‌, ఆధునిక ఫీచర్లు ఉన్న బైక్‌ను కొనాలనుకునేవారు ఈ ఆఫర్‌ను పరిశీలించవచ్చు.
R15, MT-15 కొనేవారికి ముఖ్య గమనిక
యమహా R15, MT-15 మోడళ్లపై బీమా ప్రీమియంలో ప్రత్యేక ప్రయోజనం లేదు. అయితే ఈ రెండు బైక్‌లను రూ.4,999 ప్రారంభ డౌన్ పేమెంట్‌తో కొనుగోలు చేసే అవకాశం ఉంది. అంటే ఈ మోడళ్లపై ప్రయోజనం ప్రధానంగా తక్కువ ప్రారంభ చెల్లింపు రూపంలోనే ఉంటుంది.
ఏ బైక్‌లపై ఆఫర్లు లేవు?
యమహా కంపెనీ అన్ని మోడళ్లకు ఈ పండుగ ప్రయోజనాలను వర్తింపజేయడం లేదు. Aerox 155, R15S, EC-06 ఎలక్ట్రిక్ స్కూటర్ ఈ ఆఫర్ల పరిధిలో లేవు. ఇటీవల పరిచయం చేసిన R2 మోడల్‌పైనా ప్రస్తుతం ఎలాంటి పండుగ ఆఫర్లు ప్రకటించలేదు.
తమిళనాడు, కేరళ రాష్ట్రాల్లో ఈ ఆఫర్లు వర్తించవు. ఇతర రాష్ట్రాల్లో ఎంపిక చేసిన మోడళ్లపై ఆఫర్లు అందుబాటులో ఉంటాయి.
ఇది కూడా చదవండి: పెద్ద చక్రాలు, కొత్త ఇంజిన్‌.. Aprilia SXR GT 125లో ఇంకా ఏం ఉన్నాయో కొనే ముందే తెలుసుకోండి
ఆఫర్లు ఎప్పటి వరకు?
బీమా ప్రయోజనాల విషయంలో యమహా ప్రత్యేక గడువును ప్రకటించింది. సాధారణంగా 2026 అక్టోబర్ 1 నుంచి నవంబర్ 15 వరకు ఈ ప్రయోజనాలు అందుబాటులో ఉంటాయి. మహారాష్ట్రలో మాత్రం అక్టోబర్ 10 నుంచి ఈ ఆఫర్లు అమల్లోకి వచ్చాయి.
తక్కువ డౌన్ పేమెంట్, ఫైనాన్స్ పథకాలు అక్టోబర్ 1 నుంచి ప్రారంభమయ్యాయి. ఇవి నవంబర్ నెలాఖరు వరకు కొనసాగనున్నాయి.
కొనే ముందు ఇవి తెలుసుకోండి
యమహా ప్రకటించిన బీమా ప్రయోజనాలు వినియోగదారులకు లభించే కనీస ప్రయోజనాలుగా పేర్కొంది. తుది ప్రయోజనం, ఫైనాన్స్ నిబంధనలు, అర్హతలు డీలర్‌షిప్‌ను బట్టి మారవచ్చు. అందువల్ల బైక్ లేదా స్కూటర్ కొనుగోలు చేసే ముందు సమీప అధీకృత యమహా షోరూమ్‌లో పూర్తి వివరాలు తెలుసుకోవాలి.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
