Volkswagen Tayron కొనాలా వద్దా? ప్లస్‌లు, మైనస్‌లు స్పష్టంగా చెప్పే ఫుల్‌ అనాలిసిస్‌
Volkswagen Tayron R-Line టెక్నాలజీ, ఇంటీరియర్‌, ఇంజిన్‌, సీటింగ్‌, సేఫ్టీ ఎలా ఉన్నాయి? ఈ ప్రీమియం 7 సీటర్‌ SUV మీకు సరిపోతుందా, లేదా తెలిపే పూర్తి రివ్యూ.
Volkswagen Tayron Review: వోక్స్వ్యాగన్ భారత మార్కెట్‌లో మళ్లీ 7 సీటర్‌ SUV సెగ్మెంట్‌లోకి అడుగుపెట్టింది. తాజాగా ఆవిష్కరించిన Volkswagen Tayron R-Lineతో జర్మన్‌ బ్రాండ్‌ మరోసారి తన ప్రీమియం ఇమేజ్‌ను చూపిస్తోంది. ధరలు ఇంకా అధికారికంగా వెల్లడించకపోయినా, బుకింగ్‌లు మాత్రం ప్రారంభమయ్యాయి. ఎక్స్‌పర్ట్‌లు ఈ మూడు వరుసల SUVతో కొంత సమయం గడిపి, ఇంజిన్‌, రైడ్‌, హ్యాండ్లింగ్‌, ఫీచర్లు, సీటింగ్‌ వంటి అంశాలను వివరించారు. ఈ నేపథ్యంలో Tayron మీకు సరిపోతుందా లేదా అనే ప్రశ్నకు సమాధానం చూద్దాం.
ప్రీమియం ఇంటీరియర్‌ అనుభవం
Volkswagen నుంచి ఆశించే స్థాయి ఇంటీరియర్‌ నాణ్యత Tayronలో స్పష్టంగా కనిపిస్తుంది. డ్యాష్‌బోర్డ్‌ డిజైన్‌ Tiguan R-Lineను పోలి ఉంటుంది. మధ్యలో ఉన్న భారీ 15 అంగుళాల టచ్‌స్క్రీన్‌ ఇన్ఫోటైన్‌మెంట్‌ సిస్టమ్‌ పరిమాణంలో పెద్దదిగా ఉన్నా, డ్రైవింగ్‌లో ఇబ్బంది కలిగించదు. రాత్రివేళ డ్యాష్‌బోర్డ్‌ మీద కనిపించే యాంబియంట్‌ లైటింగ్‌ చాలా ఎలిగెంట్‌గా ఉంటుంది.
10.25 అంగుళాల డిజిటల్‌ డ్రైవర్‌ డిస్‌ప్లే, ఫిజికల్‌ బటన్‌లతో వచ్చే 3 స్పోక్‌ స్టీరింగ్‌ వీల్‌ వాడటానికి సౌకర్యంగా ఉంటాయి. కేబిన్‌లో సాఫ్ట్‌ టచ్‌ మెటీరియల్స్‌ ఎక్కువగా వాడటం వల్ల ప్రీమియం ఫీలింగ్‌ వస్తుంది. అయితే డ్యాష్‌బోర్డ్‌ దిగువ భాగాల్లో హార్డ్‌ ప్లాస్టిక్‌ వాడటం కొంచెం హై ఎండ్‌ ఫీలింగ్‌ను తగ్గిస్తుంది.
ఆధునిక ఫీచర్లతో నిండిన SUV
Volkswagen Tayronలో నేటి కాలానికి అవసరమైన దాదాపు అన్ని ఫీచర్లు ఉన్నాయి. పనోరమిక్‌ సన్‌రూఫ్‌, 3 జోన్‌ క్లైమేట్‌ కంట్రోల్‌, వెనుక AC వెంట్స్‌, 11 స్పీకర్‌ హార్మన్‌ కార్డన్‌ సౌండ్‌ సిస్టమ్‌, AR ఆధారిత హెడ్-అప్‌ డిస్‌ప్లే, జెస్చర్‌ కంట్రోల్‌తో పవర్డ్‌ టెయిల్‌గేట్‌ లాంటి అంశాలు ప్రత్యేక ఆకర్షణగా నిలుస్తాయి.
ముందు సీట్లు 12-వే పవర్డ్‌ అడ్జస్ట్‌మెంట్‌, మెమరీ, మసాజ్‌, హీటింగ్‌, వెంటిలేషన్‌ ఫంక్షన్లతో వస్తాయి. అయితే క్లైమేట్‌ కంట్రోల్‌, సీట్‌ వెంటిలేషన్‌ సెట్టింగ్స్‌ అన్నీ టచ్‌స్క్రీన్‌ ద్వారానే ఆపరేట్‌ చేయాలి. దీనివల్ల, డ్రైవింగ్‌ సమయంలో కళ్లను రోడ్డుపై నుంచి స్కీన్‌ వైపునకు తిప్పాల్సి రావడం భద్రత పరంగా కొంత అసౌకర్యంగా అనిపిస్తుంది.
సేఫ్టీ
9 ఎయిర్‌బ్యాగ్స్‌, లెవల్‌-2 ADAS, 360 డిగ్రీ కెమెరా, బ్లైండ్‌ స్పాట్‌ మానిటర్‌, TPMS, హిల్‌ హోల్డ్‌ అసిస్ట్‌ వంటి సేఫ్టీ ఫీచర్లు ఉన్నాయి. అయితే 360 డిగ్రీ కెమెరా రిజల్యూషన్‌ ఇంకా మెరుగ్గా ఉంటే బాగుండేది.
ఇంజిన్‌, డ్రైవింగ్‌ అనుభవం
Tayron R-Lineలో వోక్స్వ్యాగన్ ప్రఖ్యాత EA888 2.0 లీటర్‌ టర్బో పెట్రోల్‌ ఇంజిన్‌ ఉంటుంది. ఇది 204hp శక్తి, 320Nm టార్క్‌ ఇస్తుంది. 7-స్పీడ్‌ DCT గేర్‌బాక్స్‌తో పాటు AWD సిస్టమ్‌ అందుబాటులో ఉంటుంది. గేర్‌ మార్పులు స్మూత్‌గా జరుగుతాయి. 0 నుంచి 100 km వేగాన్ని కేవలం 7.3 సెకన్లలో చేరగలగడం దీని శక్తిని చూపిస్తుంది.
హ్యాండ్లింగ్‌ విషయంలో Tayron చాలా స్థిరంగా ఉంటుంది. హైవే స్పీడ్స్‌లో కూడా నమ్మకంగా నడుస్తుంది. సిటీ డ్రైవ్‌లో స్టీరింగ్‌ లైట్‌గా, వేగం పెరిగే కొద్దీ గట్టిగా మారుతుంది. అయితే గుంతలు, రంబుల్‌ స్ట్రిప్స్‌ మీదుగా వెళ్తే కొంచెం స్టిఫ్‌ ఫీలింగ్‌ కేబిన్‌లోకి వస్తుంది.
లోపాలు కూడా ఉన్నాయి
ఈ SUVలో డీజిల్‌ ఇంజిన్‌ ఆప్షన్‌ లేకపోవడం పెద్ద మైనస్‌. అంతర్జాతీయ మార్కెట్‌లో లభించే డీజిల్‌ వెర్షన్‌ భారత్‌లో ఉంటే ఫ్యూయల్‌ ఎఫిషియెన్సీ కోరుకునే వారికి మరింత ఆకర్షణీయంగా ఉండేది.
అలాగే, ఇది పూర్తిస్థాయి 7 సీటర్‌ అని చెప్పుకోవడం కష్టం. మూడో వరుస సీట్లలో పెద్దవాళ్లు కూర్చోవడం కష్టమే. ఎక్కువ ఎత్తు ఉ్నన ప్రయాణికులకు మోకాళ్ల దగ్గర స్థలం, హెడ్‌రూమ్‌ చాలా తక్కువగా ఉంటుంది. కాస్త ముడుచుకుని కూర్చుంటే తక్కువ దూరం ప్రయాణాల చేయొచ్చు, లాంగ్‌ జర్నీలు చేయలేరు. చిన్న పిల్లలకైతే మూడో వరుస సీటు సరిపోతుంది.
Volkswagen Tayron ప్రీమియం ఇంటీరియర్‌, శక్తిమంతమైన ఇంజిన్‌, ఆధునిక టెక్నాలజీతో ఆకట్టుకుంటుంది. అయితే డీజిల్‌ ఆప్షన్‌ లేకపోవడం, మూడో వరుసలో పరిమిత స్థలం దీని బలహీనతలు.
లగ్జరీ ఫీల్‌, పెట్రోల్‌ పవర్‌, బ్రాండ్‌ విలువ కోరుకునేవారికి Tayron మంచి ఎంపిక. పూర్తిస్థాయి ఫ్యామిలీ 7 సీటర్‌ కోరుకునేవారు మాత్రం మరోసారి ఆలోచించాలి.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
