Vehicle Maintenance Guide: మీ కారు ఈ సంకేతాలు ఇస్తోందా? బ్రేక్ ప్యాడ్స్ నుండి బ్యాటరీ దాకా.. వీటిని నిర్లక్ష్యం చేస్తే ప్రమాదమే!
వాహనంలోని బ్రేక్ ప్యాడ్స్, టైర్లు, బ్యాటరీ పాడవుతున్నాయని చెప్పే ముందస్తు సంకేతాలను గుర్తించడం ద్వారా ప్రమాదాలను నివారించవచ్చు. వీటిని సకాలంలో మార్చడం వల్ల భారీ ఖర్చులు తప్పుతాయి.
Vehicle Maintenance Guide Warning Signs for Brake Pads Tyres and Battery: ఇండియాలో వాహనం నడపడం అనేది ఒక సవాలుతో కూడుకున్న పని. ఇక్కడి విపరీతమైన ట్రాఫిక్, గుంతల రోడ్లు, ఎండలు, వర్షాల వల్ల కారు విడిభాగాలు చాలా త్వరగా పాడవుతాయి. ముఖ్యంగా బ్రేక్ ప్యాడ్స్, టైర్లు, బ్యాటరీ వంటి కీలక భాగాలు అరిగిపోతున్నప్పుడు కొన్ని సంకేతాలు ఇస్తాయి. చాలామంది వాహనదారులు వీటిని నిర్లక్ష్యం చేస్తుంటారు. దీనివల్ల ప్రయాణంలో భద్రత తగ్గడమే కాకుండా, తర్వాత భారీగా రిపేర్ ఖర్చులు భరించాల్సి వస్తుంది. మీ కారు పార్ట్స్ మార్చాల్సిన సమయం వచ్చిందని చెప్పే ఆ ముందస్తు హెచ్చరికలు ఏమిటో ఇప్పుడు చూద్దాం.
బ్రేక్ ప్యాడ్స్ - చిన్న శబ్దం వస్తున్నా జాగ్రత్త..
కారు ఆపేటప్పుడు వింత శబ్దాలు రావడం బ్రేక్ ప్యాడ్స్ అరిగిపోయాయని చెప్పడానికి మొదటి సంకేతం. బ్రేక్ వేసినప్పుడు కిర్రుమనే శబ్దం రావడం, బ్రేక్ పెడల్ నొక్కినప్పుడు వైబ్రేషన్స్ రావడం లేదా కారు వెంటనే ఆగకపోవడం వంటివి జరిగితే వెంటనే చెక్ చేయించాలి. బ్రేక్ ప్యాడ్స్ మందం 3 ఎంఎం కంటే తక్కువగా ఉంటే అవి పనికిరావు. కొన్ని కొత్త కార్లలో డ్యాష్బోర్డ్ మీదే దీనికి సంబంధించిన అలర్ట్స్ వస్తాయి. వీటిని పట్టించుకోకపోతే బ్రేక్ డిస్కులు పాడయ్యే అవకాశం ఉంటుంది. సాధారణంగా బ్రేక్ ప్యాడ్లను 25,000 నుండి 40,000 కిలోమీటర్ల మధ్యలో మార్చడం మంచిది.
టైర్లు, గ్రిప్ తగ్గుతోందా?
రోడ్డుపై కారు పట్టు కోల్పోకుండా ఉండాలంటే టైర్లు బాగుండాలి. టైర్ల మీద ఉండే గీతలు (Tread) 1.6 ఎంఎం కంటే తక్కువగా ఉంటే ఆ టైర్లు వాడటం ప్రమాదకరం. టైర్ల మీద పగుళ్లు రావడం, బుడిపెలు కనిపించడం లేదా టైర్లలో గాలి పదేపదే తగ్గిపోతుండటం వంటివి అరిగిపోయిన టైర్ల లక్షణాలు. ముఖ్యంగా వర్షాకాలంలో అరిగిపోయిన టైర్ల వల్ల కారు స్కిడ్ అయ్యే ఛాన్స్ ఎక్కువగా ఉంటుంది. టైర్ల జీవితకాలం సాధారణంగా 40,000 నుండి 60,000 కిలోమీటర్లు లేదా 4 నుండి 5 ఏళ్లు మాత్రమే ఉంటుంది. టైర్ రొటేషన్, వీల్ అలైన్మెంట్ క్రమం తప్పకుండా చేయించడం వల్ల ఇవి ఎక్కువ కాలం మన్నుతాయి.
బ్యాటరీ , స్టార్టింగ్ లో ట్రబుల్ ఇస్తోందా?
కారు స్టార్ట్ చేసేటప్పుడు ఇంజిన్ స్లోగా తిరుగుతున్నట్లు అనిపించినా, హెడ్ లైట్స్ వెలుతురు తగ్గినా బ్యాటరీ వీక్ అయిందని అర్థం. బ్యాటరీ టెర్మినల్స్ మీద తుప్పు పట్టడం, డ్యాష్బోర్డ్ లో బ్యాటరీ వార్నింగ్ లైట్ వెలగడం వంటివి ప్రధాన సంకేతాలు. చాలా బ్యాటరీల లైఫ్ 3 నుండి 5 ఏళ్లు మాత్రమే. ఈ సమయం దాటిన తర్వాత బ్యాటరీ పర్ఫార్మెన్స్ తగ్గిపోతుంది. దీనివల్ల ప్రయాణం మధ్యలో కారు ఆగిపోయే ప్రమాదం ఉంటుంది. విపరీతమైన వేడి, తేమ వంటి వాతావరణ పరిస్థితులలో బ్యాటరీ మరింత త్వరగా డిశ్చార్జ్ అవుతుంది.
మొయింటనెన్స్ చిట్కాలు..
వాహన భాగాల ఆయుష్షు పెరగాలంటే డ్రైవింగ్ స్టైల్ లో మార్పులు చేసుకోవాలి. హఠాత్తుగా బ్రేకులు వేయడం, అతి వేగంగా వెళ్లడం వంటివి తగ్గించాలి. టైర్లలో సరైన గాలి ఒత్తిడి ఉండేలా చూసుకోవాలి. కారును ఎక్కువ కాలం వాడకుండా వదిలేయడం వల్ల కూడా బ్యాటరీ పాడవుతుంది. ఎప్పటికప్పుడు ఈ ముందస్తు హెచ్చరికలను గమనిస్తూ, వెంటనే సర్వీసింగ్ చేయించడం వల్ల భారీ ఖర్చులు తగ్గించుకోవచ్చు. భద్రతతో కూడిన ప్రయాణం కోసం మీ వాహనాన్ని ఎప్పుడూ కండిషన్ లో ఉంచుకోవడం ఉత్తమం.
టాప్ హెడ్ లైన్స్
ట్రెండింగ్ వార్తలు
