ట్రాఫిక్ చలానాలు చెల్లించకపోతే వాహన సేవలకు బ్రేక్, లైసెన్స్‌పై వేటు, కరెంటు కట్‌!
ట్రాఫిక్ చలానాల బకాయిల వసూళ్లకు సుప్రీంకోర్టు కీలక ఆదేశాలు ఇచ్చింది. విద్యుత్ బిల్లుల్లో చలానాలు జత చేయడం సహా వాహన సేవలపై ఆంక్షలు విధించాలని సూచించింది.
Traffic challans with electricity bills: ట్రాఫిక్ నిబంధనలు ఉల్లంఘించే వాహనదారుల విషయంలో సుప్రీంకోర్టు కీలక సూచనలు చేసింది. చలానాలు విధించిన తర్వాత వాటిని వసూలు చేయడంలో రాష్ట్రాలు మరింత కఠినంగా వ్యవహరించాలని స్పష్టం చేసింది. బకాయిలను రాబట్టేందుకు కొత్త విధానాలను అమలు చేయాలని రవాణాశాఖ అధికారులను ఆదేశించింది. విద్యుత్ బిల్లుల్లో చలానాలు జత చేయడం, కట్టకపోతే కరెంటు కట్‌ చేయడం సహా వాహన సేవలపై ఆంక్షలు విధించాలని సూచించింది.
ట్రాఫిక్ నిబంధనలు ఉల్లంఘించిన వారికి ఇప్పటివరకు భారీగా ఇ-చలానాలు జారీ అయ్యాయి. ఎలక్ట్రానిక్ పర్యవేక్షణ నిబంధనలు అమల్లోకి వచ్చిన తర్వాత రాష్ట్రాలు & కేంద్రపాలిత ప్రాంతాలు దాదాపు రూ.45 వేల కోట్ల విలువైన చలానాలు జారీ చేసినట్లు కోర్టు దృష్టికి వచ్చింది. అయితే ఇందులో సుమారు రూ.25 వేల కోట్లు మాత్రమే వసూలయ్యాయి. మరో రూ.20 వేల కోట్ల మేర జరిమానాలు ఇంకా బకాయిగా ఉన్నాయని వెల్లడైంది.
కరెంటు బిల్లుతో కలిపి వసూలు
ఈ బకాయిల వసూళ్లపై సోమవారం విచారణ సందర్భంగా జస్టిస్ కె.వి. విశ్వనాథన్ ధర్మాసనం కీలక ఆదేశాలు జారీ చేసింది. ట్రాఫిక్ ఉల్లంఘనలకు విధించిన జరిమానాలను నెలవారీ విద్యుత్ బిల్లులతో కలిపి వసూలు చేసే అంశాన్ని కోర్టు సూచించింది. విద్యుత్ బిల్లు చెల్లించకపోతే సరఫరా నిలిచిపోయే అవకాశం ఉన్నందున, చలానాల వసూళ్లలోనూ ఈ విధానం ప్రభావవంతంగా ఉంటుందని కోర్టు అభిప్రాయపడింది.
సేవలు నిలిపివేత
చలానా బకాయిలు చెల్లించని వాహనదారులపై ఇతర చర్యలు తీసుకోవాలని కూడా సూచించింది. అలాంటి వాహనాలకు సంబంధించిన ఆన్‌లైన్ సేవలను నిలిపివేయాలని పేర్కొంది. వాహన రిజిస్ట్రేషన్ పునరుద్ధరణ, నకిలీ రిజిస్ట్రేషన్ ధ్రువపత్రాల జారీ, యజమాని చిరునామా మార్పు వంటి సేవలను నిలిపివేయాలని ఆదేశించింది.
అలాగే బకాయిలు ఉన్న వాహనాలకు ఫిట్‌నెస్ ధ్రువపత్రాలు జారీ చేయకుండా చూడాలని కోర్టు సూచించింది. అవసరమైన సందర్భాల్లో వాహనాలను స్వాధీనం చేసుకునే చర్యలు కూడా చేపట్టాలని స్పష్టం చేసింది.
ఇది కూడా చదవండి: కేవలం 1500 మంది కొనగలిగే రెనాల్ట్ Renault Rafale Hypnotic, ఈ SUV ఎందుకంత స్పెషల్
డ్రైవింగ్ లైసెన్స్ రద్దు
తరచూ ట్రాఫిక్ నిబంధనలు ఉల్లంఘించే వాహనదారులపై మరింత కఠిన చర్యలు తీసుకోవాలని సుప్రీంకోర్టు పేర్కొంది. పదేపదే నిబంధనలు ఉల్లంఘించే వారికి డ్రైవింగ్ లైసెన్స్ రద్దు లేదా పునరుద్ధరణ నిలిపివేత వంటి చర్యలు తీసుకోవాలని సూచించింది.
రోడ్డు ప్రమాదాలను తగ్గించడం, ప్రజల ప్రాణాలకు భద్రత కల్పించడం కోసం ట్రాఫిక్ నిబంధనలను కచ్చితంగా అమలు చేయాల్సిన అవసరం ఉందని ధర్మాసనం స్పష్టం చేసింది. జరిమానాలు విధించడం మాత్రమే కాకుండా వాటిని వసూలు చేయడం కూడా అంతే ముఖ్యమని పేర్కొంది.
ఈ వ్యవహారం మొత్తం 2012లో దాఖలైన ప్రజాప్రయోజన వ్యాజ్యానికి సంబంధించినది. రోడ్డు ప్రమాదాల నియంత్రణకు తీసుకోవాల్సిన చర్యలపై ఈ కేసులో సుప్రీంకోర్టు విచారణ కొనసాగిస్తోంది.
ఇది కూడా చదవండి: ఫెస్టివ్ సీజన్‌కు ముందే షాకివ్వనున్న Mahindra, ఈ ఏడాది 4వ సారి పెరగనున్న SUV ధరలు
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
