రాయల్ ఎన్‌ఫీల్డ్ క్లాసిక్ 350కి కొత్త అప్‌డేట్‌ - కొనే ముందు మీరు తెలుసుకోవాల్సిన 6 విషయాలు ఇవే!
2026 రాయల్ ఎన్‌ఫీల్డ్ క్లాసిక్ 350 మార్కెట్‌లోకి వచ్చింది. కొత్త ఫీచర్లు, క్లచ్ మార్పులు, వేరియంట్లు & ధరల పూర్తి సమాచారం ఇక్కడ తెలుసుకోండి.
Royal Enfield Classic 350 Price And Features: టూవీలర్‌ తయారీ సంస్థ రాయల్ ఎన్‌ఫీల్డ్, తన పాపులర్ మోడల్ క్లాసిక్ 350ని 2026 సంవత్సరంలో మరింత నవీకరించి మార్కెట్‌లోకి తీసుకువచ్చింది. ఈ రోడ్‌స్టర్ బైక్‌లో ఇంజిన్ పరంగా పెద్దగా మార్పులు లేకపోయినా, రైడర్ల సౌకర్యాన్ని పెంచేలా కొన్ని కీలకమైన అప్‌డేట్లను అందించింది. మీరు ఈ కొత్త రాయల్ ఎన్‌ఫీల్డ్ క్లాసిక్ 350 కొనుగోలు చేయాలని భావిస్తుంటే, అంతకంటే ముందు తెలుసుకోవాల్సిన 6 ముఖ్యమైన విషయాలు ఇక్కడ చూద్దాం.
1. 2026 రాయల్ ఎన్‌ఫీల్డ్ క్లాసిక్ 350లో కొత్తగా వచ్చిన మార్పులేంటి?
ఈ కొత్త బైక్‌లో వచ్చిన అతి పెద్ద మార్పు అసిస్ట్ & స్లిప్పర్ క్లచ్. ఇది క్లచ్ లీవర్ వాడకాన్ని ఈజీగా మార్చడమే కాకుండా, గేర్లు వేగంగా తగ్గించే సమయంలో బైక్ బ్యాలెన్స్ కాపాడటానికి కూడా సాయపడుతుంది. దీనితో పాటు, మొబైల్ ఛార్జింగ్ కోసం ఒక USB టైప్-C ఛార్జింగ్ పోర్ట్ కూడా అందించారు. అయితే ఈ రెండు కొత్త ఫీచర్లు డ్యూయల్ ఛానల్ ABS వేరియంట్లలో మాత్రమే అందుబాటులో ఉంటాయి. బేసిక్ మోడల్ అయిన రెడ్డిచ్ రెడ్ వేరియంట్ ఎలాంటి మార్పులు లేకుండా మునుపటిలాగే కొనసాగుతుంది.
2. ఇంజిన్ లో ఏమైనా మార్పులు ఉన్నాయా?
ఈ బైక్ మెకానికల్ విభాగంలో ఎలాంటి మార్పులు జరగలేదు. ఇందులో సరికొత్త 349 సీసీ, ఎయిర్/ఆయిల్ కూల్డ్, సింగిల్ సిలిండర్ జె-సిరీస్ ఇంజిన్ ఉపయోగించారు. ఇది 20.2 హెచ్‌పీ పవర్ & 27 ఎన్‌ఎమ్ టార్క్‌ను ఉత్పత్తి చేస్తుంది. అలాగే 5-స్పీడ్ గేర్‌బాక్స్ తో వస్తుంది. బైక్ ఛాసిస్, సస్పెన్షన్ & బ్రేకింగ్ సిస్టమ్ అంతా ఇదివరకు ఉన్నట్లే ఉంటుంది.
ఇది కూడా చదవండి: వచ్చే ఏడాది నుంచే CAFE-III నిబంధనలు అమలు - కొత్త కారు కొనేవాళ్లు తప్పనిసరిగా తెలుసుకోవాల్సిన వివరాలు
3. అసిస్ట్ & స్లిప్పర్ క్లచ్ ఏ వేరియంట్లలో లభిస్తుంది?
ఈ అసిస్ట్ & స్లిప్పర్ క్లచ్ ఫీచర్ కేవలం డ్యూయల్ ఛానల్ ఏబీఎస్ కలిగిన క్లాసిక్ 350 వేరియంట్లలోనే లభిస్తుంది. సింగిల్ ఛానల్ ఏబీఎస్ ఉండే రెడ్డిచ్ రెడ్ మోడల్‌కు ఈ కొత్త క్లచ్ కానీ, టైప్-సి ఛార్జింగ్ పోర్ట్ కానీ లభించవు.
4. నిలిపివేసిన కలర్ ఆప్షన్లు ఏవి?
ఈ కొత్త అప్‌డేట్‌లో భాగంగా రాయల్ ఎన్‌ఫీల్డ్ కొన్ని కలర్ ఆప్షన్లకు స్వస్తి చెప్పింది. మద్రాస్ రెడ్ & మెడాలియన్ బ్రాంజ్ షేడ్స్ ఇకపై లభించవు.
ఇది కూడా చదవండి: పెట్రోల్ టెన్షన్‌కు చెక్, 2026లో అత్యధిక మైలేజ్ ఇచ్చే స్కూటర్లు ఇవే
5. 2026 రాయల్ ఎన్‌ఫీల్డ్ క్లాసిక్ 350 ధర ఎంత?
ఆరంభ వేరియంట్ రెడ్డిచ్ రెడ్ ఎక్స్-షోరూమ్ ధర చెన్నైలో రూ. 1.87 లక్షలు. కొత్త ఫీచర్లు జోడించిన డ్యూయల్ ఛానల్ ఏబీఎస్ వేరియంట్ల ఆరంభ ధర రూ. 1.95 లక్షలు (ఎక్స్-షోరూమ్, చెన్నై). హైదరాబాద్ లో ఈ బైక్ ఆన్ రోడ్ ధర సుమారుగా రూ. 2.12 లక్షల నుంచి రూ. 2.52 లక్షల వరకు ఉంటుంది.
6. కంపెనీ లైన్‌అప్‌లో దీని స్థానం ఏంటి?
ఈ తాజా మార్పుతో, క్లాసిక్ 350 కూడా మీటియోర్ 350, హంటర్ 350, గోవాన్ క్లాసిక్ 350 & గెరిల్లా 450 సరసన చేరింది. ప్రసుతం జె-ప్లాట్‌ఫామ్‌పై పనిచేసే రాయల్ ఎన్‌ఫీల్డ్ బైక్లలో బుల్లెట్ 350 మాత్రమే ఇంకా ఈ కొత్త క్లచ్ ఫీచర్ లేని మోడల్‌గా ఉంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
