హ్యుందాయ్ కారు కొనేవాళ్లకు బిగ్ అలర్ట్.. సెప్టెంబర్ నుంచి ధరలు పెంపు - ఏ మోడల్పై ఎంత పెరుగుతుంది?
హ్యుందాయ్ మోటార్ ఇండియా, సెప్టెంబర్ నుంచి తన అన్ని కార్ల ధరలను పెంచనుంది. మోడల్ & వేరియంట్ను బట్టి రేట్లు గరిష్టంగా 1 శాతం వరకు పెరిగే అవకాశం ఉంది.
Hyundai to hike car prices: కొత్త కారు కొనాలని ప్లాన్ చేస్తున్నారా? అయితే ఈ వార్త మీ కోసమే. హ్యుందాయ్ మోటార్ ఇండియా, తన కార్ల ధరలు మరోసారి పెంచేందుకు సిద్ధమైంది. వచ్చే నెల (సెప్టెంబర్ 2026) నుంచి అన్ని మోడళ్ల ధరలను పెంచనున్నట్లు కంపెనీ ప్రకటించింది.
మోడల్ & వేరియంట్ను బట్టి ఈ హైక్ మారుతుంది. గరిష్టంగా 1 శాతం వరకు ధరలు పెరుగుతాయి. ప్రస్తుతం ఉన్న ధరలను బట్టి చూస్తే.. సుమారు రూ.7,767 నుంచి రూ.23,672 వరకు అదనపు భారం పడే అవకాశం ఉంది. అయితే, ఏ మోడల్ ధరను ఎంత పెంచేదీ హ్యుందాయ్ ఇంకా వెల్లడించలేదు.
ధరల పెంపునకు కారణం ఏంటి?
ఇన్పుట్ ఖర్చులు పెరగడం, ముడి పదార్థాల ధరలు పెరగడం ప్రధాన కారణాలుగా హ్యుందాయ్ తెలిపింది. వీటితో పాటు నిర్వహణ ఖర్చులు కూడా పెరిగాయని వెల్లడించింది. అంతర్జాతీయంగా కొనసాగుతున్న భౌగోళిక రాజకీయ పరిస్థితులు & ఆర్థిక అనిశ్చితులు కూడా కంపెనీపై ప్రభావం చూపుతున్నాయని తెలిపింది.
పెరుగుతున్న ఖర్చుల ప్రభావాన్ని కస్టమర్లపై పూర్తిగా పడకుండా చేసేందుకు ఖర్చులను నియంత్రించే ప్రయత్నం చేస్తున్నామని హ్యుందాయ్ చెప్పింది. కొంత భారాన్ని కంపెనీ స్వయంగా భరిస్తున్నప్పటికీ, ఖర్చుల ఒత్తిడి కొనసాగుతుండటంతో మరికొంత భాగాన్ని వినియోగదారులకు బదిలీ చేయాల్సి వస్తోందని వివరించింది.
ఇది కూడా చదవండి: ఇథనాల్ కలిపిన ఇంధనాన్ని 50 ఏళ్లుగా వాడుతున్న బ్రెజిల్.. ఇప్పుడు అక్కడి కార్లు, బైకుల పరిస్థితి ఏంటి?
ఈ ఏడాదిలో మూడోసారి
హ్యుందాయ్, 2026లో ధరలు పెంచడం ఇది మూడోసారి. ఈ ఏడాది జనవరిలో తొలిసారి ధరలను సవరించింది & ఆ తర్వాత జూన్లో మరోసారి ప్రైస్ హైక్ తీసుకొచ్చింది. ఇప్పుడు, సెప్టెంబర్లో మరోసారి ధరల పెంపును అమలు చేయబోతంది.
హ్యుందాయ్ కార్ల ప్రస్తుత ధరలు
భారత్లో స్థానికంగా తయారవుతున్న హ్యుందాయ్ మోడళ్లలో...
Grand i10 Nios ధర ప్రస్తుతం రూ.5.59 లక్షల నుంచి రూ.8.04 లక్షల వరకు ఉంది.
Aura ధర రూ.5.99 లక్షల నుంచి రూ.8.60 లక్షల వరకు ఉంది.
i20 ధర రూ.5.99 లక్షల నుంచి రూ.11.74 లక్షల వరకు ఉంది.
Exter ధర రూ.5.80 లక్షల నుంచి రూ.9.46 లక్షల వరకు ఉంది.
Venue ధర రూ.7.99 లక్షల నుంచి రూ.15.64 లక్షల వరకు ఉంది.
Creta ధర రూ.10.90 లక్షల నుంచి రూ.19.95 లక్షల వరకు ఉంది.
Verna ధర రూ.10.99 లక్షల నుంచి రూ.18.26 లక్షల వరకు ఉంది.
Alcazar ధర రూ.14.50 లక్షల నుంచి రూ.21.25 లక్షల వరకు ఉంది.
Creta Electric ధర రూ.18.02 లక్షల నుంచి రూ.23.67 లక్షల వరకు ఉంది.
ఇది కూడా చదవండి: రోజూ కాలేజీ, ఆఫీస్కు వెళ్లిరావడానికి బెస్ట్ ఆప్షన్.. రూ.15,000 లోపే వచ్చే ఎలక్ట్రిక్ సైకిళ్లు ఇవే
కొత్త కారు కొనేవారికి కీలకం
ఈ పండుగ సీజన్లో కొత్త హ్యుందాయ్ కారు కొనాలని భావిస్తున్నవాళ్లు కంపెనీ తాజా నిర్ణయాన్ని జాగ్రత్తగా ఫాలో కావడం మంచిది. ముఖ్యంగా ఖరీదైన వేరియంట్ కొనేవాళ్లపై 1 శాతం పెంపు ప్రభావం ఎక్కువగా ఉంటుంది. కంపెనీ అధికారికంగా ప్రకటించిన తర్వాతే ఖచ్చితమైన కొత్త ధరలపై స్పష్టత వస్తుంది.
ఇంకా ఇలాంటి ఆటోమొబైల్ వార్తలు & అప్డేట్స్ కోసం "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
