Car Price Drop Diwali: ఈ దీపావళి నాటికి చాలా కార్లు చవగ్గా వస్తాయి - GST తగ్గింపు ఎంత ప్రభావం చూపుతుందో తెలుసా?
GST Reduction on Cars: GST నిర్మాణంలో మార్పులు చేయడానికి కేంద్ర ప్రభుత్వం సన్నాహాలు చేస్తోంది. 2025 దీపావళి నాటికి హ్యాచ్‌బ్యాక్‌లు & చిన్న కార్లు చాలా చౌకగా మారవచ్చు.
GST Reduction Impact on Car Prices: కొత్త కారు కొనబోయేవాళ్లకు ఇది కచ్చితంగా బంపర్‌ న్యూస్‌. వస్తువులు & సేవల పన్ను (GST) నిర్మాణంలో విప్లవాత్మక మార్పు తీసుకురావడానికి కేంద్ర ప్రభుత్వం పని చేస్తోంది. ఈ ఆగస్టు 15న, ఎర్రకోట పైనుంచి ప్రసంగించిన ప్రధానమంత్రి మోదీ, దేశంలో పన్ను నిర్మాణాన్ని సులభంగా మార్చడం & ప్రజల ప్రయోజనాలపై మాట్లాడారు. అప్పటి నుంచి, ఇది కార్ల ధరలను ఎంత ప్రభావితం చేస్తుందనే చర్చ మొదలైంది.
చిన్న కారు కొనడానికి దీపావళి సరైన సమయమేనా?
ప్రస్తుతం చిన్న కార్లపై 28 శాతం GST & ప్రత్యేక సెస్ విధిస్తున్నారు, దీనివల్ల మొత్తం పన్ను దాదాపు 29 శాతానికి చేరుకుంది. ఇకపై, పన్ను రేట్లను మార్చడానికి సన్నాహాలు జరుగుతున్నాయి. కొత్త ప్రతిపాదన ప్రకారం, హ్యాచ్‌బ్యాక్‌లు & చిన్న కార్లను 18 శాతం స్లాబ్‌లోకి తీసుకురావాలనే, ఈ ఏడాది దీపావళి (2025 Diwali) నాటికి దీనిని అమల్లోకి తీసుకురావాన్న ప్రణాళిక ఉంది. దీని అర్థం.. హ్యాచ్‌బ్యాక్‌లు & చిన్న కార్లను కొనుగోలు చేసే వాళ్లు దీపావళి నాటికి పెద్ద ఉపశమనం పొందవచ్చు. 4 మీటర్ల కంటే తక్కువ (సబ్‌-4 మీటర్‌) & 1200cc వరకు ఇంజిన్ కెపాసిటీతో పెట్రోల్, CNG లేదా LPG కారును కొనుగోలు చేయాలని ఆలోచిస్తుంటే, దీపావళి మీకు సరైన సమయం కావచ్చు. దీపావళి నాటికి కొత్త పన్ను నిర్మాణాన్ని అమల్లోకి తెచ్చే పని ఇప్పటికే ప్రారంభమైంది కూడా.
SUVలు & లగ్జరీ కార్లపై ప్రభావం ఎంత?
SUVలు & పెద్ద వాహనాల కొనుగోలుపై ప్రస్తుతం 43 శాతం నుంచి 50 శాతం వరకు పన్ను విధిస్తున్నారు. కొత్త GST వ్యవస్థలో, వీటిని 40 శాతం ప్రత్యేక శ్లాబ్‌లో ఉంచవచ్చు. దీని అర్థం SUVలు & లగ్జరీ కార్లపై పెద్దగా ఉపశమనం ఉండదు. కానీ, పన్ను నిర్మాణం మునుపటి కంటే సరళంగా & పారదర్శకంగా మారుతుంది. ఎలక్ట్రిక్ వాహనాల విషయానికొస్తే, అక్కడ ఎటువంటి మార్పు వచ్చే అవకాశం లేదు. ప్రస్తుతం, ఎలక్ట్రిక్ వాహనాలపై 5 శాతం GST మాత్రమే విధిస్తున్నారు & దీనిని భవిష్యత్తులో కూడా కొనసాగించవచ్చు. అంటే, ఎలక్ట్రిక్ కార్ కొనుగోలుదారులు ఎటువంటి అదనపు భారాన్ని మోయాల్సిన అవసరం లేదు & అదనపు ప్రయోజనం కూడా ఉండదు.
వాహనాలపై GST ప్రభావం ఎలా ఉంటుంది?
కేంద్ర ప్రభుత్వం పన్ను వ్యవస్థను కేవలం రెండు ప్రధాన శ్లాబుల్లోకి (5 శాతం & 18 శాతం) తీసుకురావాలని లక్ష్యంగా పెట్టుకుంది. లగ్జరీ వస్తువులు & సిగరెట్లు వంటి కొన్ని ఎంపిక చేసిన వస్తువులపై 40 శాతం పన్ను విధిస్తారు. ఇది పన్ను వ్యవస్థను సులభతరం చేస్తుంది. వాహనాల విషయంలో ఇంజిన్ సామర్థ్యం లేదా పొడవుకు సంబంధించి తలెత్తే గందరగోళాలకు కూడా పరిష్కారం దొరుకుతుంది. ఈ ప్రతిపాదన అమలైతే, చిన్న కార్ల ధరల్లో పెద్ద తగ్గింపును మనం చూడవచ్చు. ఫలితంగా, ప్రజల నుంచి డిమాండ్ పెరుగుతుంది & ఆటోమొబైల్ రంగంలో అమ్మకాలు పెరుగుతాయి. ఇది ఆర్థిక వ్యవస్థకు సానుకూల ప్రోత్సాహాన్ని కూడా ఇస్తుంది.
ఆగస్టు 21న మంత్రుల కమిటీ సమావేశమై, జీఎస్టీ రేటులో మార్పు ప్రతిపాదనను చర్చిస్తుంది. ఆ తర్వాత, సెప్టెంబర్‌లో జరిగే జీఎస్టీ కౌన్సిల్ సమావేశంలో దీనిపై తుది నిర్ణయం తీసుకోవచ్చు. అంతా అనుకున్నట్లు జరిగితే, ఈ దీపావళికి కారు కొనడం లాభదాయకమైన డీల్‌ కావచ్చు.
టాప్ హెడ్ లైన్స్
ట్రెండింగ్ వార్తలు
