Sri Sobhakritu Nama Samvatsaram 2023-2024: ఉత్సాహం, ధైర్యం, ఆదాయం, అభివృద్ధి - ఈ ఉగాది నుంచి ఈ రాశివారికి మామూలుగా లేదు!

ఉగాది రాగానే కొత్త ఏడాదిలో ఆదాయ, వ్యయాలు...అనుకూల-ప్రతికూలతలు ఎలా ఉన్నాయో తెలుసుకునే ఆసక్తి చాలామందిలో ఉంటుంది. అలాంటి వారికోసమే ఏ రాశివారికి ఎలా ఉందో ముందుగానే అందిస్తోంది మీ ఏబీపీ దేశం..

Image Credit: Pixabay

Sri Sobhakritu Nama Samvatsaram 2023-2024:  శ్రీ శోభకృత్ నామ సంవత్సరం 2023-2024 వృషభ రాశి ఫలితాలు
(కృత్తిక 2,3,4 పాదాలు, రోహిణి, మృగశిర 1,2 పాదాలు)
ఆదాయం -14  వ్యయం - 11  రాజపూజ్యం-6  అవమానం-1

వృషభరాశివారికి ఈ ఉగాది నుంచి గ్రహాలన్నీ అనుకూలంగా ఉన్నాయి. గురుడు 12 వ స్థానంలో ఉన్నప్పటికీ మిగిలిన గ్రహాల బలం వల్ల అన్నింటా యోగ్యమైన ఫలితాలు పొందుతారు. శని, రాహువు మంచి స్థానంలో ఉండడం వల్ల అన్నింటా ఎదురైన అడ్డంకులు తొలగిపోతాయి. 

• వృషభ రాశివారికి ఈ ఉగాది నుంచి సమయం కలిసొస్తుంది. అనుకున్న కోర్కెలు నెరవేరుతాయి, తలపెట్టిన పనులు పూర్తవుతాయి
• భార్య-భర్త మధ్య అన్యోన్యత పెరుగుతుంది, సంతానం కారణంగా సంతోషంగా ఉంటారు
• ఆదాయం బావుంటుంది, గతంలో చేసిన అప్పులు తీరుస్తారు
• శత్రువులపై మీ ఆధిక్యత కొనసాగుతుంది, ఎంతటివారినైనా వశపరుచుకునే తెలివితేటలు మీ సొంతం
• ఉత్సాహంగా, ధైర్యంగా ఉంటారు...సాహసాలు చేయడానికి అస్సలు వెనకాడరు
• విదేశీ ప్రయాణాలు చేసే అవకాశం ఉంది
• ఉద్యోగులకు ఈ ఏడాది యోగదాయకంగా ఉంటుంది, మీకు అనుకూలమైన బదిలీలు జరుగుతాయి, కష్టానికి తగిన ఫలితం దక్కుతుంది, గుర్తింపు లభిస్తుంది
• ఇల్లు, వాహనం కొనుగోలు చేయాలనే ఆలోచన ఉంటే ఈ ఏడాది అది నెరవేరుతుంది
• నిరుద్యోగులు ఉగాది తర్వాత మంచి ఉద్యోగంలో స్థిరపడే అవకాశం ఉంది
• రాజకీయనాయకులకు కూడా శోభకృత్ నామ సంవత్సరం అత్యద్భుతంగా ఉంటుంది, శత్రువులపై పైచేయి సాధిస్తారు, మంచి పేరు సాధిస్తారు
• కళాకారులకు ఈ ఏడాది బావుంటుంది, టీవీ రంగంలో ఉన్నవారికి, గాయకులు, దర్శకులకు అన్నింటా విజయం, గుర్తింపు లభిస్తుంది
• వ్యాపారులుకు రైజింగ్ హ్యాండ్ అనే చెప్పాలి. కేవలం ఫైనాన్స్ వ్యాపారం చేసేవారికి తప్ప మిగిలిన అన్ని రంగాల వారికీ అనుకూల ఫలితాలున్నాయి. నిర్మాణ రంగంలో ఉన్నవారికి బాగా కలిసొస్తుంది.
• విద్యార్థులకు మాత్రం శోభకృత్ నామసంవత్సరంలో అంతగా కలసిరాదు. ఎందుకంటే..గురుడు 12 వ స్థానంలో ఉండడం వల్ల జ్ఞాపకశక్తి తగ్గుతుంది, పోటీ పరీక్షలు రాసేవారు మంచి  ఫలితాలు పొందలేరు
• క్రీడాకారులకు బావుంటుంది
• ఈ రాశి వ్యవసాయదారులకు కూడా ఒక పంటమాత్రమే కలిసొస్తుంది..మరో పంట వేసినా పెద్దగా ప్రయోజనం ఉండదు. ఆదాయానికి మించిన ఖర్చులు పెట్టాల్సి రావొచ్చు...చేపలు, రొయ్యల చెరువుల వారికి మాత్రం గతేడాది కన్నా మెరుగ్గా ఉంది
• హఠాత్తుగా తీసుకునే మొండినిర్ణయాలను మరోసారి పునః పరిశీలించుకోవడం మంచిది
• జూన్ 18 నుంచి నవంబరు 4 మధ్య...అప్పటి వరకూ రాజ్యస్థానంలో ఉన్న శని వక్రంలో సాగనున్నాడు...ఆ సమయంలో ఉద్యోగులు జాగ్రత్తపడాలి
• శ్రీ శోభకృత్ నామ సంవత్సరంలో కృత్తిక నక్షత్రం వారికి సభాగౌరవం, అవార్డులు
• రోహిణి నక్షత్రం వారికి వివాహాది శుభయోగం
• మృగశిర నక్షత్రం వారికి ఇతరులతో సత్సంబంధాలు

ఏబీపీ దేశం వ్యూయర్స్ అందరకీ శ్రీ శుభకృత్ నామ సంవత్సరం శుభాకాంక్షలు. 

నోట్: పండితుల సూచనలు, కొన్ని పుస్తకాల ఆధారంగా రాసిన విషయాలివి...ఆయా రాశుల్లో ఫలితాలన్నీ ఒక్కరికే వర్తిస్తాయని భావించరాదు. మీ జాతకం, గ్రహస్థితి ఆధారంగా కూడా మారుతాయి. వ్యక్తిగత వివరాల కోసం జ్యోతిష్య పండితులను సంప్రదించగలరు. వీటిని ఎంతవరకూ విశ్వశించాలి అనేది పూర్తిగా మీ వ్యక్తిగతం