CPS Row : "సీపీఎస్" సమస్యకు పరిష్కారమేంటి ? రాజస్థాన్ ప్రభుత్వానికి ఎలా సాధ్యమయింది ?

 
ఆంధ్రప్రదేశ్‌లో పీఆర్సీ కోసం ఉద్యోగులు ఉద్యమించిన తర్వాత ఆ స్థాయిలో సీపీఎస్ రద్దు కోసం ఉద్యోగులు పోరుబాట పట్టారు. ఈ సారి పోలీసులు విజయవంతంగా సీపీఎస్ ఉద్యోగులు పిలుపునిచ్చిన " చలో తాడేపల్లి"ని అడ్డుకోగలిగారు. నిలువరించగలిగారు. కానీ అందు కోసం చేసిన ప్రయత్నాలు చూస్తే.. సీపీఎస్ ఉద్యోగులు విజయం సాధించినట్లే. ప్రభుత్వం సీపీఎస్ రద్దు విషయంలో ఇంత ఒత్తిడి ఎందుకు ఎదుర్కొంటోంది ? చాలా సమస్యకు చూపించినట్లుగా ఇన్‌స్టంట్ పరిష్కారం ఎందుకు చూపించలేకపోతోంది ? రాజస్థాన్ ప్రభుత్వం ఎలా రద్దు చేయగలిగింది ? 

పీఆర్సీ చర్చల్లో మార్చి నెలాఖరు కల్లా "పీఆర్సీ రద్దు"పై రోడ్ మ్యాప్ ఇస్తామని మర్చిపోయిన ప్రభుత్వం !

ఇటీవల  పీఆర్సీ కోసం ఉద్యోగులు రోడ్డెక్కినప్పుడు జరిపిన చర్చల్లో ప్రభుత్వం సీపీఎస్ విషయంలో క్లారిటీ ఇచ్చింది. సీఎం జగన్‌ మార్చి 31లోగా సీపీఎస్‌ రద్దుపై "రోడ్‌ మ్యాప్‌" సిద్ధం చేస్తామని ప్రకటించారు. కానీ ఏప్రిల్ నెలాఖరు వస్తున్నా పట్టించుకోలేదు. ఆంధ్రప్రదేశ్ వైఎస్ఆర్‌సీపీ విజయంలో అత్యంత కీలకమైనది.. కాంట్రిబ్యూటరీ పెన్షన్ స్కీమ్ రద్దు. ప్రభుత్వ ఉద్యోగులకు వర్తిస్తున్న సీపీఎస్‌ను రద్దు చేసి.. పాత పెన్షన్ విధానం తీసుకు వస్తామని ప్రతిపక్ష నేతగా జగన్ హామీ ఇచ్చారు. వారితో కలిసి ప్లకార్డులు పట్టుకుని ఉద్యమంలో నడిచారు.  కానీ మూడేళ్లయింది. ఇప్పటికీ రద్దు చేయలేదు. చేయడానికి దారులు కూడా ప్రభుత్వానికి కనిపించలేదు. ఇప్పటి వరకూ వేచి చూసిన ఉద్యోగులు  ఇక ఆగడం లేదు. రోడ్డెక్కుతున్నారు. 
  
సీపీఎస్ రద్దు ఆషామాషీ కాదు ! 

రాష్ట్ర ప్రభుత్వ ఉద్యోగులకు అయినా సీపీఎస్ రద్దు చేయడం ఆషామాషీ కాదు కాంట్రిబ్యూటరీ పెన్షన్ స్కీమ్ మొత్తం.. కేంద్రంతో ముడిపడి ఉంది. పెన్షన్ ఫండ్ రెగ్యులేటరీ డెవలప్ మెంట్ యాక్ట్‌లో ఒక్క బెంగాల్ మినహా అన్నీ  రాష్ట్రాలు చేరాయి.  ఈ స్కీమ్ నుండి వైదొలిగేందుకు రాష్ట్ర ప్రభుత్వం సుముఖంగా ఉంటే కేంద్రానికి లేఖ రాస్తే ఆ దిశగా చర్యలు తీసుకొనే అవకాశాలు ఉంటాయి.  సీపీఎస్ అమలుకు కేంద్రంతో రాష్ట్ర ప్రభుత్వాలు కుదుర్చుకున్న ఒప్పందాల నుంచి బయటకు రావాలంటే చాలా ఆర్థిక భారం పడుతుంది.  బయటకు రావాలని నిర్ణయించుకున్నప్పటికీ... నిధుల విత్‌డ్రాలో అనూహ్యమైన, అవాంఛనీయ సమస్యలు ఎదురయ్యే అవకాశం ఉంది. సీపీఎస్ నుండి బయటకు రావడానికి అవకాశాలను పరిశీలించేందుకు చంద్రబాబు ప్రభుత్వం కూడా కమిటీ వేసింది. ఆ కమిటీ రెండు ఆప్షన్లు సూచించింది. ఒకటి ఎంత ఖర్చయినా భరించి సీపీఎస్ రద్దు చేయడం.. రెండు సీపీఎస్ ద్వారా ఉద్యోగులు కోల్పోయే ప్రయోజనాలను కల్పించడం. కానీ ఉద్యోగులు రెండో దానికి అంగీకరించే ప్రశ్నే లేదంటున్నారు. సీపీఎస్ రద్దు చేయాలంటున్నారు. 
  
తెలియక హామీ ఇచ్చారని బయటపడే ప్రయత్నాల్లో ఏపీ ప్రభుత్వం  !

ప్రభుత్వ ముఖ్య సలహాదారు సజ్జల రామకృష్ణారెడ్డి  సీపీఎస్ గురించి తెలియకుండానే సీఎం జగన్ హామీ ఇచ్చారని పీఆర్సీపై చర్చల సమయంలో ఓ ప్రకటన చేశారు.  సీపీఎస్ రద్దు చేయాలంటే  రాష్ట్ర బడ్జెట్ కూడా సరిపోదని లెక్కలు  చెప్పారు. సీపీఎస్‌ రద్దు చేయడం అసాధ్యం కాబట్టి...  వారికి పెన్షన్ సెక్యూరిటీ ఎలా అని ఆలోచిస్తున్నామని ప్రకటించారు.  సీపీఎస్ విషయంలో టెక్నికల్ ఇష్యూస్ తెలియకుండా హామీ ఇచ్చారు కాబట్టి ప్రత్యామ్నాయం ఆలోచిస్తున్నామని ప్రకటించారు.  అప్పుడే ఉద్యోగ సంఘాలు భగ్గమన్నాయి. సీపీఎస్ రద్దు చేసి తీరాల్సిదేనన్నాయి. 

రాజస్థాన్ "సీపీఎస్" రద్దు చేసేసింది.. ఏపీకి కష్టమేంటి ? 

రాజస్తాన్‌లో కాంగ్రెస్ ప్రభుత్వం ఉంది. ముఖ్యమంత్రి అశోక్ గెహ్లాట్  సీపీఎస్ ను రద్దు చేస్తున్నట్లుగా ప్రకటించారు. 2004 తర్వాత చేరిన వారెవరికీ సీపీఎస్ ఉండదని పాత పెన్షన్ విధానమే ఉంటుందని  ప్రకటించారు. నిజానికి రాస్థాన్ ఉద్యోగుల్లో సీపీఎస్ వద్దని పాత పెన్షన్ విధానం కావాలని ఉంది కానీ వారు ఉద్యమాలు  చేయలేదు. వారి ఓట్ల కోసం రాజకీయ పార్టీలు సీపీఎస్‌ను రద్దు చేస్తామని చెప్పలేదు.  కానీ రద్దు చేశారు. రాజస్థాన్‌కు సాధ్యమయింది.. ఏపీకి ఎందుకు సాధ్యం కావట్లేదనేది  ఉద్యోగుల ప్రధాన ప్రశ్న..!