ఇస్రో-నాసా సంయుక్త పరిశోధనకు మహూర్తం ఫిక్స్!
భారత అంతరిక్ష పరిశోధన సంస్థ(ఇస్రో), అమెరికా అంతరిక్ష పరిశోధన సంస్థ కలసి సూర్యుడిపై పరిశోధనలు జరుపుతున్నాయి. ఇందులో భాగంగా ఆదిత్యఎల్-1 అనే ఉపగ్రహాన్ని ప్రయోగించడానికి రెండు సంస్థలు సన్నద్ధమయ్యాయి.
భారత అంతరిక్ష పరిశోధన సంస్థ(ఇస్రో), అమెరికా అంతరిక్ష పరిశోధన సంస్థ (నాసా) కలసి సూర్యుడిపై పరిశోధనలు జరుపుతున్నాయి. ఇందులో భాగంగా ఆదిత్యఎల్-1 అనే ఉపగ్రహాన్ని ప్రయోగించడానికి రెండు సంస్థలు సన్నద్ధమయ్యాయి. 2018లో ఈ సంయుక్త ప్రాజెక్ట్ గురించి చర్చలు మొదలయ్యాయి. అన్నీ అనుకున్నట్టు జరిగి ఉంటే 2020లోనే ఈ ప్రయోగం మొదలు కావాల్సింది. కానీ కొవిడ్ కారణంగా అర్థాంతరంగా వాయిదా పడింది. తాజాగా దీనికోసం మరో మహూర్తం ఖరారు చేసే పనిలో ఉన్నారు శాస్త్రవేత్తలు. 2023 జనవరి నెలాఖరులో ఆదిత్య ఎల్-1 ఉపగ్రహాన్ని ప్రయోగించేందుకు నాసా, ఇస్రో శాస్త్రవేత్తలు సన్నాహాలు చేస్తున్నారు.
కొవిడ్ కారణంగా దాదాపు రెండేళ్లుగా ఈ ప్రాజెక్ట్ పక్కనపెట్టారు. ఇప్పుడు మళ్లీ మళ్లీ ఈ ప్రయోగం తెర పైకి వచ్చిందని అంటున్నారు. కొత్తగా చేపట్టబోయే ఈ ప్రయోగం కోసం భారత ప్రభుత్వం నుంచి కూడా అనుమతి వచ్చింది. ఈ ప్రయోగాన్ని ఉమ్మడి నెల్లూరు జిల్లా శ్రీహరికోట షార్ అంతరిక్ష కేంద్రం నుంచి ప్రయోగించాలనుకోవడం మరో విశేషం. 2023 జనవరిలో శ్రీహరికోట నుంచి పీఎస్‌ఎల్వీ–సి 56 రాకెట్‌ ద్వారా ఆదిత్య ఎల్-1 ఉపగ్రహాన్ని ప్రయోగించేందుకు ఏర్పాట్లు చేస్తున్నారు. ఇస్రో దీనికి రంగం సిద్ధం చేస్తుండగా, నాసా ఏర్పాట్లు పర్యవేక్షిస్తోంది. షార్ డైరెక్టర్‌ ఆర్ముగం రాజరాజన్‌ ఆదిత్యఎల్-1 వివరాలు తెలియజేశారు.
ఇప్పటికే జాబిల్లిపై పరిశోధనలకోసం ఇస్రో చంద్రయాన్-1, చంద్రయాన్-2 అంగారకుడిపై ప్రయోగాలకోసం మంగళయాన్-1 ప్రయోగాలు చేపట్టింది. అతి తక్కువ ఖర్చుతో ఈ ప్రయోగాలు చేపట్టిన ఇస్రో అరుదైన ధనత సాధించింది. ఇప్పుడు సూర్యుడిపై ప్రయోగాలకు సిద్దమైంది. అయితే ఇందులో నాసా సాయం తీసుకుంటోంది. నాసాతో కలసి ఇస్రో సూర్యుడి పైకి ఆదిత్య ఎల్-1 ఉపగ్రహాన్ని ప్రయోగించబోతోంది.
ఆదిత్య ఎల్-1 ప్రత్యేకతలు
ఉపగ్రహం బరువు 1,475 కిలోలు
పేలోడ్స్ బరువు 244 కిలోలు
పేలోడ్స్ సంఖ్య 6
ద్రవ ఇంధనం బరువు 1,231 కిలోలు
ప్రయాణ సమయంల 177 రోజులు
భూమినుంచి దూరం 15లక్షల కిలోమీటర్లు..
సూర్యుడి వైపు ఈ ఉపగ్రహాన్ని తీసుకెళ్లడం కోసం ఎక్కువ ద్రవ ఇంధనాన్ని ఉపయోగిస్తున్నారు శాస్త్రవేత్తలు. ముందుగా ఉపగ్రహాన్ని జియో ట్రాన్స్‌ ఫర్‌ ఆర్బిట్‌ లోకి ప్రవేశపెడతారు. ఆ తర్వాత దాన్ని భూమికి 15 లక్షల కిలోమీటర్ల దూరంలోని లాగ్రేంజియన్‌ బిందువు–1కి చేరుస్తారు. దీనికోసం 177రోజుల సమయం పడుతుందని అంచనా. అక్కడినుంచి ఈ ఉపగ్రహం ఎలాంటి అడ్డంకులు లేకుండా తన పని మొదలు పెడుతుంది. అంటే సూర్యుడిపై మార్పులను నిరంతరం పరిశోధిస్తుందనమాట.
ప్రాజెక్ట్ లక్ష్యం..
సూర్యుడి వెలుపల ఉన్న వలయాన్ని కరోనా అంటారు. సౌర గోళానికి కొన్ని వేల కిలోమీటర్ల దూరం వరకు ఈకరోనా విస్తరించి ఉంటుంది. కరోనా వద్ద ఉష్ణోగ్రత పది లక్షల డిగ్రీల కెల్విన్‌ వరకు ఉంటుందని శాస్త్రవేత్తలు నిర్థారించారు. సూర్యుడి అంతర్భాగంలో ఉష్ణోగ్రత 6వేల కెల్విన్‌ డిగ్రీల వరకు ఉంటుంది. ఈ వేడిపైన ఆదిత్య–ఎల్1 పరిశోధనలు చేస్తుంది. సౌర తుపాన్ల సమయంలో భూమిపై సమాచార వ్యవస్థకు ఏర్పడుతున్న అవరోధాలకు గల కారణాలు, వాటి నివారణోపాయాల్ని కూడా ఆదిత్య ఎల్-1 అంచనా వేస్తుంది. ఫోటోస్పియర్, క్రోమో స్పియర్ లపై మరింత అధ్యనం చేసి సమాచారాన్ని సేకరించి భూమికి పంపుతుంది ఆదిత్య ఎల్-1.
టాప్ హెడ్ లైన్స్
ట్రెండింగ్ వార్తలు
