Nellore News: వానలు వెలిశాయి.. వ్యాధులు పొంచి ఉన్నాయి... జాగ్రత్తలు పాటించాలని వైద్యుల సూచన

ఇటీవల కురిసిన భారీ వర్షాలకు ప్రజలు అప్రమత్తంగా ఉండాలని వైద్యులు సూచిస్తున్నారు. వానలు తగ్గడంతో నీరు నిల్వలేకుండా చూసుకోవాలని, తాగునీటి విషయంలో జాగ్రత్తలు పాటించాలని సూచిస్తున్నారు.

సంక్రమిత వ్యాధులు(ప్రతీకాత్మక చిత్రం)

వాయుగుండం ప్రభావం తగ్గడంతో దక్షిణ కోస్తాలో వానలు తగ్గి సాధారణ పరిస్థితులు నెలకొంటున్నాయి. అయితే కొన్ని ప్రాంతాల్లో ఇంకా వర్షం పడుతూనే ఉంది. ఇలాంటి పరిస్థితుల్లో ఆహార పదార్థాలు, తాగునీటి విషయంలో మరిన్ని జాగ్రత్తలు పాటించాలని సూచిస్తున్నారు నిపుణులు. కాచి వడపోసిన సురక్షిత మంచినీటిని మాత్రమే తాగాలని చెబుతున్నారు. ఆహార పదార్థాలను కూడా నిల్వ ఉంచకుండా చూసుకోవాలని, ఎప్పటికప్పుడు వండుకుని వేడివేడిగా తినడం అలవాటు చేసుకోవాలని చెబుతున్నారు. 

శ్వాసకోస సమస్యలు

అసలే చలికాలం.. అందులోనూ ఇప్పుడు వర్షాలు వెలిసిన తర్వాత చలిగాలులు మరింత ఎక్కువయ్యాయి. ఈ చలిగాలులతో శ్వాస కోశ సమస్యలు మరింత ఎక్కువ అవుతాయని చెబుతున్నారు వైద్యులు. చలిగాలిలో బయటకు రావొద్దని, ఒకవేళ వచ్చినా చెవులు, ముక్కులోకి చలిగాలి వెళ్లకుండా చూసుకోవాలని సూచిస్తున్నారు. జలుబు, దగ్గు వంటి సమస్యలొస్తే.. కరోనా అనే అనుమానాలు కూడా ఎక్కువ అవుతున్న రోజులివి. అందుకే మరింత జాగ్రత్తగా ఉండాలని చెబుతున్నారు వైద్య నిపుణులు. 

దోమకాటుతో జాగ్రత్త

జలుబు, దగ్గు మూడు రోజులైనా తగ్గకపోతే వెంటనే వైద్యసహాయం పొందాలని సూచిస్తున్నారు. ఏపీలో ప్రస్తుతం ప్రతి సచివాలయ పరిధిలో ఏఎన్ఎంలు, ఆశా వర్కర్లు అందుబాటులో ఉంటున్నారు. వారి సాయంతో మలేరియా, డెంగీ పరీక్షలు చేయించుకోవాలని వైద్యులు సూచిస్తున్నారు. వాన నీరు నిలబడటంతో దోమల ప్రభావం కూడా పెరిగే అవకాశం ఉందని, దోమకాటుకి గురై డెంగీ లాంటి వ్యాధుల బారిన పడితే తీవ్ర ఇబ్బందులు ఎదుర్కోవాల్సి వస్తుందని సూచిస్తున్నారు. దోమకాటుకి దూరంగా ఉండటం, పరిశుభ్రమైన నీటిని తాగడం, వేడిగా అప్పటికప్పుడు వండుకున్న ఆహార పదార్థాలను తీసుకోవడం ద్వారా వ్యాధుల బారిన పడకుండా జాగ్రత్తగా ఉండొచ్చని సూచిస్తున్నారు నిపుణులు. ముఖ్యంగా వరద ప్రభావానికి లోనైన ప్రాంతాల ప్రజలు ఈ జాగ్రత్తలు పాటించాలని చెబుతున్నారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి