Gudivada Amarnath Controversy: హోంమంత్రి అనితపై గుడివాడ అమర్నాథ్ వివాదాస్పద వ్యాఖ్యలు - పవన్ కల్యాణ్ ఫైర్.. మహిళా కమిషన్ నోటీసులు!
Gudivada Amarnath: ఏపీ హోంమంత్రి అనితపై గుడివాడ అమర్నాథ్ మేకప్, వదిలేసిన కార్లు అంటూ చేసిన వ్యాఖ్యలు రాజకీయ దుమారం రేపాయి. దుస్తులు, రూపంపై వ్యాఖ్యలు అవమానకరమంటూ పవన్ కల్యాణ్ తీవ్రంగా ఖండించారు.
TDP Women Leaders Protest: ఆంధ్రప్రదేశ్ రాజకీయాల్లో మహిళా నేతలను, ముఖ్యంగా అత్యున్నత హోదాలో ఉన్న హోంమంత్రిని లక్ష్యంగా చేసుకుని జరుగుతున్న వ్యక్తిగత విమర్శలు తీవ్ర దుమారం రేపుతున్నాయి. వైఎస్సార్ కాంగ్రెస్ పార్టీ నేత, మాజీ మంత్రి గుడివాడ అమర్నాథ్.. రాష్ట్ర హోంమంత్రి వంగలపూడి అనితను ఉద్దేశించి చేసిన వివాదాస్పద వ్యాఖ్యలు వివాదాస్పదమయ్యాయి. ఈ వ్యవహారంపై అధికార కూటమి శ్రేణులు, మహిళా సంఘాలు తీవ్రస్థాయిలో మండిపడుతున్నాయి.
గుడివాడ అమర్నాథ్ ఏమన్నారు?
విశాఖ జిల్లా చోడవరంలో జరిగిన వైఎస్సార్సీపీ కార్యకర్తల నిరసన సమావేశంలో మాజీ మంత్రి గుడివాడ అమర్నాథ్ ప్రసంగించారు. హోంమంత్రి వంగలపూడి అనితపై తీవ్రమైన వ్యక్తిగత వ్యాఖ్యలు చేశారు. శాంతిభద్రతలను పక్కనబెట్టి హోంమంత్రి కేవలం తన మేకప్ , కట్టుబొట్టుపైనే శ్రద్ధ పెడుతున్నారంటూ చౌకబారుగా విమర్శించారు. అంతేకాకుండా, నేను మంత్రిగా ఉన్నప్పుడు వాడి వదిలేసిన బుల్లెట్ ప్రూఫ్ వాహనాన్ని ఇప్పుడు ఆమె వాడుకుంటున్నారు అంటూ ఎద్దేవా చేశారు. ఒక మహిళా మంత్రి రూపం, అలంకరణను లోకువ చేస్తూ మాజీ మంత్రి స్థాయి వ్యక్తి ఇలా మాట్లాడటం రాజకీయ వర్గాలను విస్మయానికి గురిచేసింది.
గుడివాడ అమర్నాథ్! ప్రజలకు కోపం వచ్చినందుకు గత ఎన్నికల తర్వాత ప్రభుత్వం నీకిచ్చిన కారును వదిలేసుకోవాల్సి వచ్చింది. వాళ్ళకు మళ్ళీ కోపం తెప్పిస్తే ఈసారి రాజకీయాలనే వదులుకుని పోవాల్సి వస్తుంది జాగ్రత్త! మహిళ గురించి అసభ్యంగా, అవమానకరంగా మాట్లాడినందుకు తప్పు ఒప్పుకుని హోమ్ మంత్రి అనిత… pic.twitter.com/9HxiV1Jqeh
— Bandaru Sravani Sree (@bandaru_sravani) June 16, 2026
దుస్తులు, రూపంపై వ్యాఖ్యలు అవమానకరం: పవన్ కల్యాణ్
గుడివాడ అమర్నాథ్ వ్యాఖ్యలపై ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ సోషల్ మీడియా వేదికగా తీవ్రంగా స్పందించారు. రాజకీయ విమర్శలు ఎప్పుడూ ప్రభుత్వ విధానాలు, పరిపాలనపైనే ఉండాలి తప్ప.. ఒక మహిళ దుస్తులు, రూపురేఖలను లక్ష్యంగా చేసుకోకూడదు అని పవన్ స్పష్టం చేశారు. ఇలాంటి చౌకబారు భాష ఏమాత్రం క్షమార్హం కాదని, మహిళలను కించపరిచేలా మాట్లాడటం రాజకీయ సంస్కృతికే విరుద్ధమన్నారు. అలాగే ప్రతిపక్షాల అసభ్య భాషకు కూటమి నేతలు కూడా అదే స్థాయిలో దిగజారకుండా సంయమనంతో, ప్రజలు మెచ్చే రీతిలో బుద్ధి చెప్పాలని హితవు పలికారు.
నాకు అండగా నిలిచిన గౌరవ ఉపముఖ్యమంత్రి @PawanKalyan గారికి నా హృదయపూర్వక ధన్యవాదాలు. మీరిస్తున్న ఈ మద్దతు కేవలం నా ఒక్కరి కోసమే కాదు... ఆత్మగౌరవమే ఊపిరిగా బతుకుతూ, ఎక్కడా తలవంచకూడదని భావించే ప్రతి కూతురికి, ప్రతి తల్లికి, ప్రతి సోదరికి తోడుగా నిలిచే ఒక గొప్ప భరోసా https://t.co/3ouKfTEfP1
— Anitha Vangalapudi (@Anitha_TDP) June 16, 2026
తిరగబడ్డ తెలుగు మహిళలు
మరోవైపు టీడీపీ రాష్ట్ర అధ్యక్షుడు పల్లా శ్రీనివాసరావు సహా పలువురు నేతలు అమర్నాథ్ తీరును తీవ్రంగా ఖండించారు. ఒక దళిత మహిళ స్వశక్తితో, కిందిస్థాయి నుంచి ఎదిగి హోంమంత్రి అయితే ఓర్వలేకనే ఇలాంటి దాడులకు దిగుతున్నారని మండిపడ్డారు. మచిలీపట్నం, తిరుపతి, విశాఖపట్నం సహా రాష్ట్రంలోని పలు ప్రాంతాల్లో తెలుగు మహిళా విభాగం నేతలు రోడ్లపైకి వచ్చి నిరసనలు చేపట్టారు. అమర్నాథ్ ఫొటోలను కోడిగుడ్లు, చెప్పులతో కొట్టి తమ నిరసన వ్యక్తం చేశారు. గతంలో అసెంబ్లీ సాక్షిగా నారా భువనేశ్వరిని కించపరిచినందుకే వైసీపీని ప్రజలు 11 సీట్లకు పరిమితం చేశారని, అయినా ఆ పార్టీ నేతలకు బుద్ధి రాలేదని మహిళా నేతలు ఆగ్రహం వ్యక్తం చేశారు.
What a YSRCP leader said about me on camera, at a public meeting was not merely an insult. It was a vile, casteist attack aimed at humiliating a woman and a Dalit holding a constitutional office.
— Anitha Vangalapudi (@Anitha_TDP) June 16, 2026
The language he used is so disgraceful that it cannot even be repeated in public.… pic.twitter.com/dm7znnCeS3
రంగంలోకి మహిళా కమిషన్.. సమన్లు జారీ!
ఈ వివాదాన్ని రాష్ట్ర మహిళా కమిషన్ సుమోటోగా స్వీకరించింది. ఒక మహిళా ప్రజాప్రతినిధి, పైగా రాష్ట్ర శాంతిభద్రతలను పర్యవేక్షించే హోంమంత్రి వ్యక్తిత్వాన్ని, ఆత్మగౌరవాన్ని దెబ్బతీసేలా మాట్లాడటంపై మహిళా కమిషన్ తీవ్ర అభ్యంతరం వ్యక్తం చేసింది. ఈ మేరకు మాజీ మంత్రి గుడివాడ అమర్నాథ్కు త్వరలోనే సమన్లు జారీ చేసి, కమిషన్ ముందు హాజరై తన వ్యాఖ్యలపై వివరణ ఇవ్వాలని ఆదేశించేందుకు సిద్ధమైంది. చట్టపరంగా కూడా ఆయనపై చర్యలు తీసుకునేలా సిఫార్సు చేయనున్నట్లు తెలుస్తోంది.
ఏపీ రాజకీయాల్లో గత కొన్నేళ్లుగా వ్యక్తిగత దూషణలు మితిమీరిపోతున్నాయనే విమర్శలు ఉన్నాయి. ఒక మహిళా హోంమంత్రి వ్యక్తిగత ప్రాధాన్యతలను, రూపకల్పనను విమర్శల పరిధిలోకి తీసుకురావడం ద్వారా గుడివాడ అమర్నాథ్ స్వయంగా డిఫెన్స్లో పడ్డారు. కూటమి ప్రభుత్వం ఈ అంశాన్ని మహిళల ఆత్మగౌరవ సెంటిమెంట్గా మార్చి వైఎస్సార్సీపీని మరింత ఇరుకున పెట్టే వ్యూహంలో ఉంది. అమర్నాథ్ తన వ్యాఖ్యలను వెనక్కి తీసుకుని బహిరంగ క్షమాపణ చెప్పాలని వస్తున్న డిమాండ్లపై ఆయన తదుపరి అడుగు ఎలా ఉంటుందనేది ఆసక్తికరంగా మారింది.
టాప్ హెడ్ లైన్స్
ట్రెండింగ్ వార్తలు
