AP DGP Comments : ఏపీలో ఫ్రెండ్లీ పోలీసింగ్ - దిశయాప్ సమాచారం భద్రంగా ఉంటుందన్న డీజీపీ !

ఏపీలో ఫ్రెండ్లీ పోలీసింగ్ అమలు చేస్తున్నామని డీజీపీ ప్రకటించారు. కొత్త హోంమంత్రి తానేటి వనితతో డీజీపీ మర్యాదపూర్వకంగా భేటీ అయ్యారు.

ఏపీలో ఫ్రెండ్లీ పోలీసింగ్ అమలు చేస్తామన్న డీజీపీ

 

ఆంధ్రప్రదేశ్‌లో ఖచ్చితంగా ఫ్రెండ్లీ పోలీసింగ్ ( Friendly Policing ) అమలు చేస్తామని ఏపీ డీజీపీ రాజేంద్రనాథ్ రెడ్డి ( AP DGP ) ప్రకటించారు. హోం శాఖ మంత్రిగా బాధ్య‌త‌లు చేప‌ట్టిన తానేటి వనితతో ( Taneti vanita )  డీజీపీతో పాటు ఉన్నతాధికారులు సమావేశం అయ్యారు.  ఈ సంద‌ర్భంగా ప‌లు అంశాల‌పై  చ‌ర్చించారు. ఏపీలో ఫ్రెండ్లీ పోలీసింగ్‌ను ఖచ్చితంగా అమ‌లు చేస్తామ‌ని హోంమంత్రి వనితకు హామీ ఇచ్చారు. పోలీస్ స్టేషన్‌కు ఖచ్చితత్వం ఉన్న కేసులు వస్తే వెంట‌నే ప‌రిష్క‌రించే దిశ‌గా పోలీసులు చూడాల‌ని హోంమంత్రి ఈ సంద‌ర్భంగా డీజీపీకి సూచించారు. క్రైం రేటు త‌గ్గించ‌డం, నాటుసారాను అరిక‌ట్ట‌డంపై కూడా చ‌ర్చించారు.  వైజాగ్ ప్రాంతంలో గంజాయి సాగు, దాడుల అంశం కూడా చ‌ర్చ‌కు వ‌చ్చింద‌ని ఏపీ డీజీపీ తెలిపారు. 

రాష్ట్రంలో శాంతిభద్రతలకు విఘాతం కలిగిస్తే ఎవరినీ ఉపేక్షించేది లేదని డీజీపీ హెచ్చరించారు. నెల్లూరు కోర్టులో  ( Nellore Court Theft ) జరిగిన దొంగతనంపైనా డీజీపీ స్పందించారు. దొంగతనం కేసుకు సంబంధించి ప్రాథమిక విచారణలో లభ్యమైన ఆధారాలను బట్టి ముందుకెళ్తున్నామని తెలిపారు. వాస్తవాలు విచారణలో బయటపడతాయని పేర్కొన్నారు. ప్రత్యేక బృందాలు ఏర్పాటు చేసి దర్యాప్తు చేస్తున్నామని గుర్తు చేశారు. అలాగే అనంతపురంలో మంత్రి ఉషాశ్రీచరణ్ ( Usha Sri Charan ) ర్యాలీ  కారణంగా ట్రాఫిక్ నిలిపివేయడంతో చికిత్సకు వెళ్తున్న ఓ చిన్నారి మరణించిందని వచ్చిన విమర్శలపైనా స్పందించారు. ఆ విషయంలో నిజం లేదన్నారు. మంత్రి ఉష శ్రీ చరణ్ ర్యాలీకి, చిన్నారిని ఆస్పత్రికి తీసుకెళ్లే సమయానికి గంట తేడా ఉందని ఆ విషయం సీసీ టీవీ ఫుటేజీలో ఈ విషయం క్లియర్‌గా ఉందన్నారు.

మహిళ భద్రత కోసం తీసుకు వచ్చిన దిశ యాప్‌ ( Disha App లో సమాచారానికి భద్రత లేదని జరుగుతున్న ప్రచారంపైనా డీజీపీ రాజేంద్రనాథ్ రెడ్డి క్లారిటీ ఇచ్చారు. దిశ యాప్‌లో రిజిస్టర్ చేసుకుంటే మహిళల వ్యక్తిగత సమాచారానికి ఎలాంటి ఇబ్బంది ఉండదని డీజీపీ వెల్లడించారు. శాంతి భద్రతల ( law And Order )  విషయంలో ఎవరినీ ఉపేక్షించేది లేదని.. కఠినంగా వ్యవహరిస్తామని హెచ్చరించారు.