Chandrababu Notice : విజయవాడ ప్రభుత్వ ఆసుపత్రి ఘటన, చంద్రబాబు, బోండా ఉమాకు మహిళా కమిషన్ నోటీసులు

Chandrababu Notice : టీడీపీ అధినేత చంద్రబాబు, మాజీ ఎమ్మెల్యే బోండా ఉమాకు మహిళా కమిషన్ నోటీసులు జారీ చేసింది. విజయవాడ ప్రభుత్వ ఆసుపత్రిలో జరిగిన ఘటనపై వివరణ ఇవ్వాలని కోరింది. ఈ నెల 27న విచారణకు హాజరుకావాలని కోరింది.

చంద్రబాబు, బోండా ఉమామహేశ్వరరావు

Chandrababu Notice : టీడీపీ అధినేత చంద్రబాబు, మాజీ ఎమ్మె్ల్యే బోండా ఉమామహేశ్వరరావుకు ఏపీ మహిళా కమిషన్‌ నోటీసులు జారీ చేసింది. విజయవాడ ప్రభుత్వ ఆస్పత్రిలో మహిళా కమిషన్‌ ఛైర్‌పర్సన్‌ పద్మ పట్ల అగౌరవంగా ప్రవర్తించారని ఆరోపణలతో ఈ నోటీసులు ఇచ్చింది. ఈ నెల 27న విచారణకు హాజరుకావాలని ఆదేశాలు జారీ చేసింది. విజయవాడ ప్రభుత్వ ఆసుపత్రిలో చికిత్స పొందుతున్న అత్యాచార బాధితురాలని మహిళా కమిషన్ ఛైర్ పర్సన్ వాసిరెడ్డి పద్మ శుక్రవారం పరామర్శించారు. అయితే ఈ సమయంలో టీడీపీ అధినేత చంద్రబాబు, మాజీ ఎమ్మె్ల్యే బోండా ఉమామహేశ్వరరావు, ఆ పార్టీ నేతలు ఆసుపత్రికి వచ్చారు. ఈ సమయంలో వాసిరెడ్డి పద్మ, చంద్రబాబుకు మధ్వ వాగ్వాదం జరిగింది. అనంతరం తనపై చంద్రబాబు, బోండా ఉమా అనుచిత వ్యాఖ్యలు చేశారని వాసిరెడ్డి పద్మ మీడియాతో మాట్లాడారు. 

అసలేం జరిగిందంటే? 

ప్రతిపక్ష నేత చంద్రబాబు నాయుడు బాధితురాల్ని పరామర్శించేందుకు వెళ్లగా, అక్కడ ఏపీ మహిళా కమిషన్ ఛైర్ పర్సన్ వాసిరెడ్డి పద్మ ఆయనకు ఎదురుపడ్డారు. సామాన్య మహిళకు ఏపీ ప్రభుత్వంలో రక్షణ లేకుండా పోయిందని, మీరు ఏం చేస్తున్నారంటూ వాసిరెడ్డి పద్మను చంద్రబాబు సూటిగా ప్రశ్నించారు. విజయవాడ సంఘటన ఏపీకే అవమానం అని వ్యాఖ్యానించారు. అమ్మాయి తండ్రి ఫిర్యాదు చేసినా పట్టించుకోకపోవడం వల్లే ఈ దారుణం జరిగిందని చంద్రబాబు ఆరోపించారు. కోటి రూపాయాలు బాధితురాలి కుటుంబానికి పరిహారంగా చెల్లించేలా చూడాలని డిమాండ్ చేశారు. వాసిరెడ్డి పద్మను టీడీపీ కార్యకర్తలు అడ్డుకునే ప్రయత్నం చేయడంతో జీజీహెచ్‌లో ఉద్రిక్త పరిస్థితులు చోటుచేసుకున్నాయి. విజయవాడ పాత ప్రభుత్వాసుపత్రిలో చికిత్స పొందుతున్న గ్యాంగ్‌ రేప్ బాధితురాలిని ఆంధ్రప్రదేశ్ మహిళాకమిషనర్‌ ఛైర్‌పర్శన్ వాసిరెడ్డి పద్మ పరామర్శించారు. బాధితురాలితో మాట్లాడి ధైర్యం చెప్పారు. కచ్చితంగా నిందితులకు శిక్ష పడేలా చేస్తామన్నారు. ఫ్యామిలీ మెంబర్స్‌తో మాట్లాడిన ఆమె అండగా ఉంటామన్నారు. 

కరోనా డ్రామాలు అని టీడీపీ ఆరోపణలు

వాసి రెడ్డి పద్మ వచ్చిన సందర్భంగా విజయవాడ ప్రభుత్వాసుపత్రి వద్ద ఉద్రిక్త పరిస్థితులు నెలకొన్నాయి. చంద్రబాబు వస్తున్నారని సమాచారం తెలిసిన తర్వాతే అధికార పార్టీ లీడర్లు మేల్కొన్నారని ఆరోపిస్తోంది టీడీపీ. ఇప్పటి వరకు నిందితులకు అండగా నిలిచిన అధికార పార్టీ లీడర్లు ఇప్పుడు బాధితురాలని పరామర్శించడం ఏంటని ప్రశ్నిస్తోంది టీడీపీ. వాసిరెడ్డి పద్మ పర్యటన అడ్డుకునేందుకు తీవ్రంగా ప్రయత్నించారు టీడీపీ శ్రేణులు. ఆమె రాకను తప్పుపట్టారు. కరోనా వచ్చిందని నిన్నంత డ్రామాలు ఆడిన వాసి రెడ్డి పద్మ ఇప్పుడు ఎలా ఆసుపత్రికి వచ్చారని ప్రశ్నిస్తోంది టీడీపీ. ఒక్కరోజులోనే కరోనా తగ్గిపోయిందా అంటూ నిలదీస్తోంది. చంద్రబాబు వస్తున్నారనే భయంతోనే బాధితురాలిని పరామర్శించారని దుయ్యబట్టారు. బాధితురాలిని వాసిరెడ్డి పద్మ పరామర్శించే సందర్భంలో గోబ్యాక్ వాసిరెడ్డి పద్మ అంటూ నినాదాలు చేశారు టీడీపీ శ్రేణులు. ఆమెకు వ్యతిరేకంగా పెద్ద ఎత్తున ఆందోళన చేశారు.