Chandrababu Case : మద్యం కేసులో చంద్రబాబు, కొల్లు రవీంద్రలకు ఊరట - హైకోర్టు కీలక ఆదేశాలు

Chandrababu Case : మద్యం కేసులో చంద్రబాబు, కొల్లు రవీంద్రలపై తీర్పు వచ్చే వరకూ ఎలాంటి చర్యలు తీసుకోవద్దని హైకోర్టు ఆదేశించింది. తీర్పు రిజర్వ్ చేసింది.

మద్యం కేసులో చంద్రబాబుకు ఊరట

Chandrababu Case :  గత ప్రభుత్వంలో మద్యం ప్రివిలేజ్ ఫీజును  అక్రమంగా మాఫీ చేసి  ప్రభుత్వానికి నష్టం కలిగించారంటూ సీఐడీ నమోదు చేసిన కేసులో చంద్రబాబు, కొల్లు రవీంద్రలపై ఎలాంటి తొందరపాటు చర్యలు తీసుకోవద్దని ఏపీ హైకోర్టు ఆదేశించింది.  తప్పుడు కేసు పెట్టారని విధానపరమైన నిర్ణయం తీసుకుంటే.. దానిపై కేసు పెట్టారని ఈ కేసులో  ముందస్తు బెయిల్ మంజూరు చేయాలని వీరు హైకోర్టును ఆశ్రయించారు.  ఈ పిటిషన్లపై విచారణ పూర్తయింది.  లిఖిత పూర్వక వాదనలు కూడా సమర్పించారు. తీర్పు రిజర్వ్ చేసిన హైకోర్టు .. తీర్పు వెల్లడించే వరకూ ఎలాంటి ముందస్తు చర్యలు తీసుకోవద్దని స్పష్టం చేసింది.

విధానపరమైన నిర్ణయంపై కేసులు పెట్టడం ఏమిటని  చంద్రబాబాబు తరపు లాయర్ల వాదన 

ఇంతకు ముందు జరిగిన విచారణలో  చంద్రబాబు తరఫున సీనియర్‌ న్యాయవాదులు నాగముత్తు, దమ్మాలపాటి శ్రీనివాస్‌ వాదనలు వినిపించారు. మద్యం దుకాణాల లైసెన్స్‌దారులకు 2015-17 సంవత్సరాల్లో ప్రివిలేజ్‌ ఫీజు విధింపు నిబంధన తొలగింపునకు ప్రతిపాదించిన ఫైలు అప్పటి సీఎం చంద్రబాబు వద్దకు వెళ్లలేదని కోర్టు దృష్టికి తీసుకెళ్లారు. అప్పటి ఎక్సైజ్‌ శాఖ మంత్రి, కమిషనర్‌ స్థాయిలో నిర్ణయం తీసుకున్నారని పేర్కొన్నారు. ఫైలును ఆర్థిక శాఖకు పంపకపోవడాన్ని సీఐడీ ఆక్షేపించడం సరికాదని, ఈ విషయంలో ప్రత్యేక ప్రధాన కార్యదర్శి నిర్ణయం తీసుకోవాలని తెలిపారు. అందుకు అప్పటి సీఎం, మంత్రిని బాధ్యులను చేయడం సరికాదన్నారు. పిటిషనర్‌పై దురుద్దేశపూర్వకంగా కేసు నమోదు చేశారని, ముందస్తు బెయిల్‌ మంజూరు చేయాలని కోరారు.

ఖజానాకు నష్టం కలిగించారని ప్రభుత్వం తరపు లాయర్ వాదనలు                                  

సీఐడీ తరఫున ఏజీ శ్రీరామ్‌ వాదనలు వినిపించారు.  గత ప్రభుత్వ హయాంలో మద్యం దుకాణాల లైసెన్స్‌దారులకు ప్రివిలేజ్‌ ఫీజు తొలగించడం ద్వారా రాష్ట్ర ఖజానాకు నష్టం జరిగిందన్నారు. వివిధ ఫైళ్లను   కోర్టు ముందు ఉంచారు. వాటిని తమకు అందజేయలేదని చంద్రబాబు తరఫు సీనియర్‌ న్యాయవాది అభ్యంతరం తెలిపారు. న్యాయమూర్తి స్పందిస్తూ వాటిని పిటిషనర్లకు ఇవ్వాలని ఏజీకి సూచించారు.  విచారణలో ఇరువైపులా వాదనలు ముగించిన న్యాయస్థానం.. మౌఖికంగా తెలిపిన వివరాలను రాతపూర్వకంగా కోర్టు ముందుంచాలని పిటిషనర్లకు సూచిస్తూ విచారణను  సోమవారానికి వాయిదా వేశారు.

తీర్పు ఇచ్చే వరకూ చర్యలు తీసుకోవద్దని  హైకోర్టు ఆదేశం                                     

సోమవారం తీర్పును రిజర్వు చేస్తూ తొందరపాటు చర్యలు వద్దని సీఐడీని హైకోర్టు ఆదేశించింది. గత ప్రభుత్వ హయాంలో మద్యం కంపెనీలకు అనుచిత లబ్ధి చేకూర్చేలా నిర్ణయాలు తీసుకున్నారన్న ఆరోపణలతో బెవరేజెస్‌ కార్పొరేషన్‌ ఎండీ వాసుదేవరెడ్డి ఫిర్యాదు ఆధారంగా చంద్రబాబు, కొల్లు రవీంద్ర, ఎక్సైజ్‌ శాఖ కమిషనర్‌పై సీఐడీ కేసు నమోదు చేశారు. జీవోలు ఇచ్చిన వారిపై ఎలాంటి కేసు నమోదు చేయలేదు.