Amaravati High Speed Rail: అమరావతి మీదుగానే హైదరాబాద్- చెన్నై హైస్పీడ్ రైలు కారిడార్.. తెలుగు రాష్ట్రాల్లో స్టేషన్లు ఇవే

Hyderabad Chennai High Speed Rail Corridor: హైదరాబాద్ నుంచి చెన్నై హైస్పీడ్ రైలు కారిడార్‌లో అమరావతికే తొలి ప్రాధాన్యమని తేలింది. అమరావతి మీదుగా బుల్లెట్ రైలు దూసుకెళ్లనుంది.

అమరావతి మీదుగానే హైదరాబాద్- చెన్నై హైస్పీడ్ రైలు కారిడార్

Source : AI

Show Quick Read

Key points generated by AI, verified by newsroom

• హైదరాబాద్-చెన్నై బుల్లెట్ రైలు మార్గం అమరావతి మీదుగా నిర్ధారణ.
• మూడు హైస్పీడ్ కారిడార్లలో ఆంధ్రప్రదేశ్‌లో 854 కి.మీ. విస్తరింపు.
• పలమనేరు కౌండిన్య వన్యప్రాణుల అభయారణ్యంలో 11 కి.మీ. సొరంగం.
• హైస్పీడ్ రైలు ప్రాజెక్టు సర్వేలు త్వరగా పూర్తిచేయాలని అధికారులు కసరత్తు.

అమరావతి: తెలుగు రాష్ట్రాల మధ్య బుల్లెట్ రైళ్లు పరుగులు పెట్టేందుకు కొంత సమయం పడుతుంది. కేంద్ర ప్రభుత్వం బడ్జెట్ సమయంలో ఈ హైస్పీడ్ రైలు కారిడార్లను ప్రకటించడం తెలిసిందే. అయితే ప్రతిష్ఠాత్మక హైదరాబాద్‌- అమరావతి- చెన్నై హైస్పీడ్‌ రైల్‌ కారిడార్‌ను ఆంధ్రప్రదేశ్ రాజధాని అమరావతి మీదుగానే నిర్మించనున్నారు. అమరావతికి సమీపం ఉన్న రావెల వద్ద ఇంటర్నేషనల్ ఎయిర్‌పోర్ట్ ఏర్పాటు కానుండటంతో బుల్లెట్ రైలు ఎలైన్‌మెంట్‌ కూడా దానికి ఆనుకొని ఉండాలని ఏపీ ప్రభుత్వం సూచించింది. అయితే, విమానాశ్రయానికి ఆనుకొని కారిడార్ నిర్మిస్తే అది అమరావతి నగరంతో పాటు విజయవాడకు కూడా బాగా దూరమవుతుందని అధికారులు గుర్తించారు. దాంతో మొదట అనుకున్నట్లుగానే అమరావతి మీదుగానే ఈ హైస్పీడ్ రైలు కారిడార్ వెళ్లేలా ఫైనల్‌ లొకేషన్‌ సర్వే (FLS), డీపీఆర్‌ (DPR) రూపొందించాలని రాష్ట్ర ప్రభుత్వం తాజాగా నేషనల్‌ హైస్పీడ్‌ రైల్‌ కార్పొరేషన్‌ (NHSRCL)కు సూచించింది.

తెలంగాణ నుంచి తమిళనాడు వరకు 760 కి.మీ కారిడార్
ఈ హైదరాబాద్‌- అమరావతి- చెన్నై కారిడార్ మొత్తం 760.09 కిలోమీటర్ల పొడవునా తెలంగాణ, ఆంధ్రప్రదేశ్, తమిళనాడు రాష్ట్రాల మీదుగా వెళ్తుంది. ఇందులో మొత్తం 18 స్టేషన్లను ప్రతిపాదించారు. తెలంగాణ పరిధిలో 180.32 కి.మీ. పొడవు ఉండే ఈ మార్గంలో హైదరాబాద్, శంషాబాద్, భారత్‌ సిటీ, డ్రైపోర్ట్, హాలియా, వాడపల్లి వద్ద రైల్వే స్టేషన్లు రానున్నాయి. కారిడార్ సగాని కంటే ఎక్కువ దూరం ఏపీలోనే ఉంటుంది. అత్యధికంగా ఏపీలో 518.54 కి.మీ. మేర ఈ కారిడార్ ఉండనుండగా.. పల్నాడు జిల్లాలోని దాచేపల్లి ఏపీలో మొదటి స్టేషన్‌ అవుతుంది. ఆ తర్వాత వరుసగా అమరావతి, గుంటూరు, చీరాల, ఒంగోలు, కావలి, నెల్లూరు, గూడూరు, తిరుపతి వద్ద స్టేషన్లను నిర్మిస్తారు. ఇక తమిళనాడులో కేవలం 61.23 కి.మీ మార్గంలో తిరువళ్లూరు, చెన్నై ఔటర్‌ రింగ్‌రోడ్‌/ మింజూర్, చెన్నై సెంట్రల్‌ స్టేషన్లు ఉంటాయి.

పలమనేరు అటవీ ప్రాంతంలో సొరంగ మార్గం
మరోవైపు, చెన్నై- బెంగళూరు కారిడార్‌లో భాగంగా చిత్తూరు జిల్లా పలమనేరు సమీపంలోని కౌండిన్య వన్యప్రాణి అభయారణ్యం మీదుగా ఈ మార్గం వెళ్లనుంది. దట్టమైన అటవీ ప్రాంతం కావడంతో వన్యప్రాణులకు ఎలాంటి ఇబ్బంది కలగకుండా ఉండేందుకు ఇక్కడ పలమనేరు అటవీ ప్రాంతంలో 11.8 కి.మీ. మేర సొరంగ మార్గాన్ని (Tunnel) నిర్మించనున్నారు. చెన్నై-బెంగళూరు కారిడార్ మొత్తం 306 కి.మీ. పొడవుండగా, ఇందులో అత్యధికంగా తమిళనాడులో 133 కి.మీ, కర్ణాటకలో 101 కి.మీ, ఏపీలో 72 కి.మీ విస్తరించి ఉండనుంది. 

ఈ మార్గంలో ఏపీలోని చిత్తూరుతో పాటు తమిళనాడు, కర్ణాటక పరిధిలోని స్టేషన్లు కలిపి మొత్తం 7 స్టేషన్లు వస్తాయి. ఈ 2 ప్రధాన కారిడార్లను అనుసంధానిస్తూ తిరుపతి- చిత్తూరు మధ్య ప్రత్యేక లింక్ కారిడార్‌ను కూడా చంద్రబాబు సూచనల మేరకు ఎన్‌హెచ్‌ఎస్‌ఆర్‌సీఎల్‌ పరిశీలిస్తోంది.

ఏపీ మీదుగా వెళ్లనున్న మూడో కారిడార్ అయిన హైదరాబాద్‌- బెంగళూరు హైస్పీడ్‌ కారిడార్ మొత్తం 597 కిలోమీటర్ల మేర నిర్మించనున్నారు. ఈ మార్గం అత్యధికంగా ఏపీలో 264 కి.మీ., తెలంగాణలో 239 కి.మీ, కర్ణాటకలో 94 కి.మీ. మేర ఉండనుంది. ఈ రూట్‌లో 3రాష్ట్రాల్లో కలిపి మొత్తం 15 స్టేషన్లు వచ్చేలా ప్రతిపాదించారు. తెలంగాణలో హైదరాబాద్, శంషాబాద్ సహా 6 స్టేషన్లు రానుండగా.. ఆంధ్రప్రదేశ్ లో కర్నూలు, డోన్, గుత్తి, అనంతపురం, దుద్దేబండ, హిందూపురం మీదుగా బుల్లెట్ రైలు కారిడార్ వెళ్తుంది. ఈ హైస్పీడ్ రైలు కారిడార్ ప్రాజెక్టులకు సంబంధించిన సర్వేలు త్వరగా పూర్తిచేసి తుది నివేదికలు సిద్ధం చేసేందుకు అధికారులు కసరత్తు ముమ్మరం చేశారు.

మరిన్ని చదవండి

ఫిజికల్, మెంటల్ ఫిట్ నెస్ పెంచేది యోగానే.. విజయవాడలో యోగాంధ్ర వేడుకల్లో సీఎం చంద్రబాబు

నేను హోం మినిస్టర్ కాకపోవడం క్రిమినల్స్ అదృష్టం: కాకినాడలో పవన్ కళ్యాణ్ టాప్ 10 పాయింట్స్