Harshit Rana Ruled Out IPL 2026 | హర్షిత్ దూరం, పతిరణ రాక ఆలస్యం. కష్టాల్లో కేకేఆర్ | ABP Desam

కోల్‌కతా నైట్ రైడర్స్ టీమ్ కు వరుస ఎదురుదెబ్బలు తగులుతున్నాయి. పేసర్ హర్షిత్ రాణా మోకాలి గాయం కారణంగా ఈ సీజన్ ఆరంభ మ్యాచ్‌లకు అందుబాటులో ఉండటం లేదు. ఫిబ్రవరిలో దక్షిణాఫ్రికాతో జరిగిన వార్మప్ మ్యాచ్‌లో గాయపడిన హర్షిత్, ఇటీవల శస్త్రచికిత్స చేయించుకున్నారు. అతను తిరిగి మైదానంలోకి రావడానికి మరికొంత సమయం పట్టేలా ఉంది.

మరోవైపు, కేకేఆర్ 18 కోట్లు పెట్టి కొనుగోలు చేసిన లంక పేసర్ మతీషా పతిరణ ఫిట్‌నెస్ కూడా ఆందోళన కలిగిస్తోంది. శ్రీలంక బోర్డు నుంచి ఇంకా క్లియరెన్స్ రాకపోవడంతో, పతిరణ ఏప్రిల్ మధ్యలో టీమ్ తో చేరే అవకాశం కూడా లేదని హెడ్ కోచ్ అభిషేక్ నాయర్ స్పష్టం చేశారు. "హర్షిత్ రాణా లేకపోవడం మాకు పెద్ద దెబ్బ. పతిరణ మ్యాచ్ ఫిట్‌నెస్‌ సాధించడానికి ఏప్రిల్ 15 వరకు సమయం పట్టవచ్చు" అని కోచ్ వెల్లడించారు.

బౌలింగ్ విభాగంలో లోటును భర్తీ చేసేందుకు కేకేఆర్ ఇప్పటికే కసరత్తులు మొదలుపెట్టింది. బంగ్లా పేసర్ ముస్తఫిజుర్ రహ్మాన్ స్థానంలో జింబాబ్వేకు చెందిన బ్లెస్సింగ్ ముజరబానీని జట్టులోకి తీసుకుంది. రచిన్ రవీంద్ర, టిమ్ సైఫర్ట్ వంటి కివీస్ ప్లేయర్లు బ్యాటింగ్‌లో బలాన్ని ఇస్తున్నప్పటికీ, పేస్ అటాక్ మాత్రం బలహీనంగా కనిపిస్తోంది. సరైన బౌలింగ్ కాంబినేషన్‌ను సెట్ చేయడం ఇప్పుడు మేనేజ్‌మెంట్‌కు పెద్ద సవాలుగా మారింది.