Warangal Bank Robbery: గూగుల్‌లో చూసి వరంగల్‌ బ్యాంకు దోపిడీ- ఖాతాదారులు నష్టపోవాల్సిందేనా? రూల్స్ ఏం చెబుతున్నాయి?

Warangal Crime News: గూగుల్‌లో చూసి వరంగల్‌లో బ్యాంకును కొల్లగొట్టారని పోలీసులు అనుమానిస్తున్నారు. మరి చోరీ అయిన సొత్తు పరిస్థితి ఏంటీ? ఖాతాదారుల సొత్తుకు ఎవరు గ్యారంటీ ?

గూగుల్‌లో చూసి వరంగల్‌లో బ్యాంకు దోపిడీ

Source : ABPLIVE AI

Warangal News: గుర్తు తెలియని వ్యక్తులంతా ఓ ముఠాగా ఏర్పడి బ్యాంక్‌ను దోపిడీ చేసే సీన్ సినిమాల్లో చూసే ఉంటారు. ఇప్పుడు అలాంటి సీన్‌లు వరంగల్‌లో ఎస్‌బీఐలో కనిపించాయి. రాత్రికి రాత్రే నలుగురైదుగురు వ్యక్తులు రెండు గంటల్లోనే బ్యాంకును లూటీ చేశారు. ఒక్క దెబ్బకు19 కిలోల బంగారాన్ని ఎత్తుకెళ్లిపోయారు. దీంతో ఒక్కసారిగా వరంగల్ వ్యాప్తంగా కలకలం రేగింది. ఖాతాదారులు బ్యాంకులకు పరుగెత్తుతున్నారు.  

పక్కా ప్లాన్‌తో దోపిడీ

బ్యాంకులోని మూడు సేఫ్టీ లాకర్లను దుండగులు గ్యాస్ కటర్‌ను ఉపయోగించి కట్ చేశారు. అందులో ఉన్న బంగారాన్ని ఎత్తుకెళ్లిపోయారు. 497 మంది ఖాతాదారులు తాకట్టు పెట్టిన బంగారం పోవడం సంచలనంగా మారింది. ఈ బంగారం విలువ దాదాపు 15 కోట్ల రూపాయలకుపైగా ఉంటుందని అంటున్నారు. అర్థరాత్రి వేళలో కారులో వచ్చి రెండు మూడు గంటల్లోనే పని పూర్తి చేశారని పోలీసులు అనుమానిస్తున్నారు. 

కేసు ఛేదించేందుకు ఐదు బృందాలు

వరంగల్‌ జిల్లా ఎస్‌బీఐ బ్యాంకులో లూటి చేసింది ఇతర్రాష్ట్రాలకు చెందిన దొంగల ముఠాగా అనుమానిస్తున్నారు. ఈ ముఠాను పట్టుకోవడానికి ప్రత్యేకంగా ఐదు బృందాలను రంగంలోకి దించారు పోలీసులు. గతంలో ఇలాంటి చోరీలు ఎక్కడెక్కడ జరిగాయో ఆరా తీస్తున్నారు. అక్కడ లభించిన సాంకేతిక ఆధారాలతో ఇప్పుడు చోరీ చోట దొరికిన ఆధారాలతో పోల్చి చూస్తున్నారు. 

గూగుల్‌లో చూసి దోపిడీ

వరంగల్‌లో జరిగిన చోరీ కేసు విచారణ చేస్తున్న పోలీసులకు ఆసక్తికరమైన అంశాలు వెలుగులోకి వచ్చాయి. ఈ ముఠా ముందుగా గూగల్ మ్యాప్‌లో బ్యాంకు అడ్రెస్‌లు వెతుకుంతుందని చెబుతున్నారు. పారిపోయేందుకు వీలుగా ఎలాంటి జనసంచారం లేని ప్రాంతంలో ఉన్న బ్యాంకులనే టార్గెట్ చేస్తారు. అలాంటివి సెలెక్ట్ చేసుకొని రెక్కీ నిర్వహిస్తారు. అనంతరం దోపిడీ చేస్తారు. ఇప్పుడు రాయపర్తి బ్యాంకు విషయంలో అదే జరిగిందని అనుమానం వ్యక్తం చేస్తున్నారు. 

రాయపర్తి ఎస్బీఐలో చోరీ జరగడంతో ఖాతాదారులు ఉలిక్కిపడ్డారు. భారీగా జనం బ్యాంకుకు వస్తున్నారు. తమ సొత్తు ఏమైందో అని ఆరా తీస్తున్నారు. భద్రంగా ఉంటాయని కొందరు ఇక్కడ దాచుకుంటారని ఇలాంటివి జరిగితే ఎక్కడ భద్రత ఉందని ఆందోళన వ్యక్తం చేస్తున్నారు. సొత్తు పోయిందనే భయం వద్దని దీనికి తగ్గట్టు బీమా సౌకర్యం ఉంటుందని చోరీకి గురైన బంగారం డబ్బులు వస్తాయని అధికారులు ధైర్యం చెబుతున్నారు.  

ఆర్బీఐ రూల్స్ ఏం చెబుతున్నాయి
బ్యాంకులో చోరీ, అగ్న ప్రమాదం జరిగి దాచుకున్న సొత్తు పోతే ఆప్రైజర్ విలువ కట్టిన పత్రాలు ఆధారంగా వంద శాతం బీమా సౌకర్యం లభిస్తుంది. అది కూడా ఇప్పటి మార్కెట్ ధర ప్రకారం చెల్లిస్తారు. 

బ్యాంకులకు సంబంధించిన ప్రతి శాఖకు అక్కడ జరిగే లావాదేవీలను బట్టి ఏటా బీమా సౌకర్యం చేయిస్తారు. 

వ్యక్తిగత లాకర్లలో పెట్టే సొత్తుకు మాత్రం ఖాతాదారులదే బాధ్యత. అందులో ఏం ఉంచుతారనేది మాత్రం బ్యాంకు అధికారులు చూడరు కాబట్టి వాటికి బ్యాంకుకు సంబంధం ఉండదు.