Telangana News: తెలంగాణలో వారికి గుడ్ న్యూస్.. దసరా నుంచి చేయూత కొత్త పింఛన్లు పంపిణీకి నిర్ణయం

Cheyutha Pension Scheme | తెలంగాణలో సర్టిఫికేట్ల సమస్యల వల్ల చేయూత పెన్షన్ల దరఖాస్తుల పరిశీలనను పొడిగించారు. వచ్చే నెలలో అర్హుల జాబితా రూపొందించి, దసరాకు కొత్త పెన్షన్లు పంపిణీ చేయనున్నారు.

తెలంగాణలో చేయూత కొత్త పింఛన్లు పంపిణీ దరఖాస్తు గడువు పెంపు

Source : AI

Show Quick Read

Key points generated by AI, verified by newsroom

• చేయూత పెన్షన్ల దరఖాస్తు పరిశీలన గడువు నెలాఖరు వరకు పొడిగించారు.
• సర్టిఫికేట్ల సమస్యతో అర్హులెందరో ఇబ్బందులు పడుతున్నారని ప్రభుత్వం గుర్తించింది.
• ఒంటరి మహిళలకు సర్టిఫికేట్లు జారీకి పలువురు అధికారులకు అధికారం.
• అర్హులకు దసరా కానుకగా కొత్త పెన్షన్లు వచ్చే నెల పంపిణీ.

Telangana Cheyutha Pension Scheme | హైదరాబాద్: తెలంగాణలో చేయూత పథకం కింద కొత్త పెన్షన్ల దరఖాస్తుల పరిశీలన ప్రక్రియను ఈ నెలాఖరు వరకు పొడిగించాలని రాష్ట్ర ప్రభుత్వం నిర్ణయించింది. దరఖాస్తుదారులకు ఎదురవుతున్న సర్టిఫికేట్ల సమస్యల కారణంగా ధ్రువీకరణ పత్రాల జారీలో పలు వెసులుబాట్లు కల్పిస్తోంది. ఈ నెలలోనే ప్రక్రియ పూర్తి చేసి లబ్ధిదారులను ఎంపిక చేయాలని భావించినప్పటికీ, సర్టిఫికేట్ల సేకరణలో జాప్యం జరగడంతో ప్రక్రియను కొన్ని రోజులపాటు పొడిగించారు. ఈ నెలాఖరు నాటికి అప్లికేషన్లు పరిశీలించి, వచ్చే నెల మొదటి వారంలో అర్హులైన లబ్ధిదారుల జాబితాను రూపొందించాలని భావిస్తున్నారు. ఎంపిక చేసిన వారికి దసరా పండుగ కానుకగా కొత్త పెన్షన్లను పంపిణీ చేయడానికి రాష్ట్ర ప్రభుత్వం ఏర్పాట్లు చేస్తోంది.

కొత్త పెన్షన్ల మంజూరుకు ప్రభుత్వం చర్యలు
రాష్ట్రంలో 2.5 లక్షల కొత్త పెన్షన్ల మంజూరుకు ప్రభుత్వం ఆమోదం తెలపడం తెలిసిందే. అందుకు అనుగుణంగా సెర్ప్ (SERP) సంస్థ ద్వారా గత నెల 9 నుంచి ఆన్‌లైన్‌లో దరఖాస్తులను స్వీకరిస్తున్నారు. మొదట్లో ఆగస్టు నెలాఖరు వరకు మాత్రమే గడువు ఇచ్చినా, నిబంధనల ప్రకారం దరఖాస్తుతో పాటు సరైన సర్టిఫికేట్లు జత చేయడం చాలామందికి వీలు కావడం లేదు. దీంతో దరఖాస్తుల స్వీకరణ గడువును ఈ నెల 15 వరకు పెంచడమే కాకుండా, దరఖాస్తు సమయంలో సర్టిఫికెట్లు లేకపోయినా పరిశీలన నాటికి సమర్పించేలా సడలింపు ఇచ్చారు.

ముఖ్యంగా రాష్ట్రంలోని ఒంటరి మహిళలు, వితంతువులు, చేనేత, గీత కార్మికులు, డయాలసిస్, ఫైలేరియా బాధితులు అవసరమైన సర్టిఫికెట్లు పొందడంలో తీవ్ర ఇబ్బందులు ఎదుర్కొంటున్నారు. విడాకులు పొందిన ఒంటరి మహిళలకు కోర్టు ఉత్తర్వులు లేదా ఏడాదిగా ఒంటరిగా ఉంటున్నట్లు తహసీల్దార్ (MRO) నివేదిక అవసరం కాగా, వివాహం కాని వారు పంచాయతీ లేదా వార్డు అధికారుల వెరిఫికేషన్ కోరాల్సి వస్తోంది. అలాగే భర్త చనిపోయి 2 ఏళ్లు దాటిన వితంతువులకు మరణ ధ్రువీకరణ పత్రం (Death Certificate) ఇచ్చే అధికారం ఎవరికి ఉందనే దానిపై స్పష్టత లేకపోవడంతో సర్టిఫికేట్ల అందక పంపిణీ నిలిచిపోతోంది. ఈ సమస్యలను తీవ్రంగా పరిగణించిన సెర్ప్ సంస్థ అధికారులకు ప్రత్యేక ఆదేశాలు జారీ చేసింది. 

ఒంటరి మహిళలకు సర్టిఫికేట్లు ఇచ్చే అధికారాన్ని తహసీల్దార్లతో (MRO) పాటు ఎంపీడీఓలు, మున్సిపల్ కమిషనర్లు, డిప్యూటీ కమిషనర్లకు కల్పిస్తూ శుక్రవారం నాడు ఉత్తర్వులు జారీ చేసింది. రెండేళ్లు దాటిన వితంతువుల మరణ ధ్రువీకరణ పత్రాల సమస్యను పరిష్కరించేందుకు, వారికి అవసరమైన వెసులుబాటు కల్పించేందుకు రాష్ట్ర ప్రభుత్వం అనుమతి కోరినట్లు అధికారులు తెలిపారు. ఈ మార్పుల ద్వారా అర్హులైన ప్రతి ఒక్కరికీ సకాలంలో చేయూత పెన్షన్ అందుతుందని, ఏ సమస్య ఉండదని తెలంగాణ ప్రభుత్వం భావిస్తోంది.