Kaleshwaram Project: కాళేశ్వరం మొత్తం కేసీఆర్ కడితే ఇప్పుడెందుకు నోరు విప్పరు - రేవంత్ రెడ్డి ట్వీట్

Kaleshwaram Project డిజైన్ నుంచి నిర్మాణం దాకా అన్నీతానై కట్టానని కేసీఆర్ చెప్పుకునేవారని.. మేడిగడ్డ బ్యారేజీ దెబ్బతిని మూడు నెలలు అవుతుంటే ఎందుకు నోరు మెదపడం లేదని రేవంత్ రెడ్డి ప్రశ్నించారు.

మేడిగడ్డలో బీటలు వారిన నిర్మాణాన్ని పరిశీలిస్తున్న సీఎం రేవంత్ రెడ్డి

Revanth Reddy on Kaleshwaram Project: గత ప్రభుత్వం నిర్మించిన కాళేశ్వరం ప్రాజెక్టు గురించి నిజానిజాలు ఇప్పటి ప్రభుత్వానికి తెలియజెప్పాలనే ఉద్దేశంతో తామంతా మేడిగడ్డ బ్యారేజీ పర్యటన చేపట్టామని ముఖ్యమంత్రి రేవంత్ రెడ్డి చెప్పారు. రాష్ట్ర ప్రజల కష్టార్జితంతో కట్టిన కాళేశ్వరం ప్రాజెక్టు కేసీఆర్ ధన దాహానికి బలైందని ఆరోపించారు. దాదాపు రూ.97 వేల కోట్లు ఖర్చు చేసినా కూడా.. ఆ ప్రాజెక్టు వల్ల 97 వేల ఎకరాలకు కూడా నీళ్లు ఇవ్వలేదని రేవంత్ రెడ్డి విమర్శించారు. ప్రాజెక్టు డిజైన్ నుంచి నిర్మాణం దాకా అన్నీతానై కట్టానని కేసీఆర్ చెప్పుకునేవారని గుర్తు చేశారు. అలాంటిది మేడిగడ్డ బ్యారేజీ దెబ్బతిని మూడు నెలలు అవుతున్నప్పటికీ కేసీఆర్ నోరు మెదపడం లేదని అన్నారు. 

మేడిగడ్డ బ్యారేజీ రిపేర్లకు పనికి రాదని అన్నారు. పూర్తిగా దాన్ని కూల్చేసి మళ్లీ నిర్మించాల్సిన అవసరం ఉందని రేవంత్ రెడ్డి వివరించారు. దానికి రిపేర్లు కుదరబోవని.. నేషనల్ డ్యాం సేఫ్టీ అథారిటీనే అభిప్రాయపడిందని అన్నారు. ఈ మేరకు రేవంత్ రెడ్డి ఎక్స్‌లో పోస్ట్ చేశారు.  

‘‘తెలంగాణ ప్రజల కష్టార్జితంతో కట్టిన కాళేశ్వరం ప్రాజెక్టు కేసీఆర్ ధన దాహానికి బలైంది. రూ.97 వేల కోట్లు వ్యయం చేసి, 97 వేల ఎకరాలకు కూడా నీళ్లివ్వలేదని అధికారిక లెక్కలు చెబుతున్నాయి. ప్రాజెక్టు డిజైన్ నుండి నిర్మాణం వరకు అన్నీతానై కట్టానని చెప్పిన కేసీఆర్, మేడిగడ్డ కూలి నెలలు గడుస్తున్నా నోరు విప్పడం లేదు. మేడిగడ్డ బ్యారేజీ మరమ్మతులకు పనికి రాదు. పూర్తిగా పునర్ నిర్మాణం చేయాల్సిందేనని నేషనల్ డ్యాం సేఫ్టీ అథారిటీ అభిప్రాయపడింది. ఈ నేపథ్యంలో వాస్తవాలు తెలంగాణ సమాజానికి తెలిపే ప్రయత్నం ప్రజా ప్రతినిధుల నేటి మేడిగడ్డ పర్యటన. 

కేసీఆర్ తో పాటు బీఆర్ఎస్ ప్రజా ప్రతినిధులను కూడా ఆహ్వానించాం. బీఆర్ఎస్ తో పాటు వారి చీకటి మిత్రులు బీజేపీ శాసన సభ్యులు మేడిగడ్డకు రావడం లేదు. కాళేశ్వరం ప్రాజెక్టు.. చంద్రశేఖర్ రావుకు ఏటీఎంలా మారిందని ప్రధాని మొదలు గల్లీ లీడర్ వరకు లొల్లి చేసే బీజేపీ నాయకులు.. వాస్తవాలు చూడడానికి క్షేత్రస్థాయికి రావడం లేదు. అన్నీ పార్టీల శాసన సభ్యులు ఒకవైపు ఉంటే బీజేపీ, బీఆర్ఎస్ మాత్రం ఒకటిగా మరొకవైపు ఉన్నాయి. మేడిగడ్డ పర్యటనతో తెలంగాణ సమాజం తొమ్మిదిన్నరేళ్లు కేసీఆర్ పాలనలో విధ్వసమైన జలదృశ్యాన్ని కళ్లారా చూడబోతోంది’’ అని రేవంత్ రెడ్డి ఎక్స్ లో పోస్ట్ చేశారు.