Governer Vs TRS : డ్రగ్స్, అవినీతిపై అమిత్ షాకు తమిళిసై నివేదిక - గవర్నర్‌తో పంచాయతీ ఏం లేదన్న కేటీఆర్ !

ఢిల్లీలో తెలంగాణ గవర్నర్ తమిళిసై చేస్తున్న ఆరోపణలపై కేటీఆర్ స్పందించారు. గవర్నర్‌తో తమకు ఎలాంటి పంచాయతీ లేదని ఆమెఏ దేదో ఊహించుకుని ఆరోపణలు చేస్తున్నారని విమర్శించారు.

గవర్నర్ ఆరోపణలపై కేటీఆర్ స్పందన

తెలంగాణ ప్రభుత్వం, గవర్నర్ మధ్య వివాదం అంతకంతకూ ముదురుతున్నట్లుగా కనిపిస్తోంది. తెలంగాణ ప్రభుత్వం తనను తీవ్రంగా అవమానిస్తోందని కనీసం ప్రోటోకాల్ కూడా ఇవ్వడం లేదని తమిళిసై  ప్రధానమంత్రి మోదీ, హోంమంత్రి అమిత్ షాలకు ఫిర్యాదు చేశారు. అమిత్ షాతో ఏం చర్చించామో బయటకు చెప్పలేనని మీడియాతో గవర్నర్ చెప్పినప్పటికీ .. తర్వాత కొన్ని విషయాలు మీడియాకు లీక్ అయ్యాయి. తెలంగాణలో పరిస్థితులపై గవర్నర్ పూర్తి స్థాయి నివేదికను అమిత్ షాకు అందించినట్లుగా తెలుస్తోంది.  ముఖ్యంగా తెలంగాణలో డ్రగ్స్ కేసుల్లో సెలక్టివ్‌గా దాడులు చేస్తున్నారని.. ఈ అంశాన్ని సీరియస్‌గా తీసుకోవడం లేదని అమిత్ షా దృష్టికి తీసుకెళ్లినట్లుగా తెలుస్తోంది. డ్రగ్స్ పిల్లలకు చాలా ప్రమాదకరమైనవని.. ఓ తల్లిగా బాధపడుతూ ఈ విషయం చెబుతున్నానన్నారు. అలాగే తెలంగాణలో అవినీతి ఇతర అంశాలను కూడా నివేదికలో గవర్నర్ ప్రస్తావించినట్లుగా తెలుస్తోంది. 

కౌశిక్ రెడ్డిని గవర్నర్ కోటాలో ఎమ్మెల్సీగా నామినేట్ చేయకపోవడం వల్లనే కక్ష పెంచుకుని తన పట్ల అగౌరవంగా వ్యవహరిస్తున్నారని తమిళిశై భావిస్తున్నారు. ఇదే అంశాన్ని మోదీ, అమిత్ షా దృష్టికి తీసుకెళ్లినట్లుగా తెలుస్తోంది. రాజ్‌భవన్‌లో తన తల్లిచనిపోయినప్పుడు కనీసం పరామర్శించడానికి కూడా రాలేదని.. స్వస్థలానికి తల్లి భౌతిక కాయాన్ని తరలించడానికి ప్రత్యేక ఏర్పాట్లు చేయమని అడిగినా చేయలేదని తమిళిసై భావోద్వేగానికి గురైనట్లుగా తెలుస్తోంది. ప్రస్తుతం తెలంగాణలో డ్రగ్స్ కేసు సంచలనంగా మారింది. అదే సమయంలో ఎన్‌ఫోర్స్‌మెంట్ డైరక్టరేట్ డ్రగ్స్ కేసును విచారణ చేయడానికి ముందుకు వచ్చినా ఆధారాలు ఇవ్వడం లేదు. దీనిపై తెలంగాణ ఉన్నతాధికారులు కోర్టు ధిక్కరణకు  పాల్పడ్డారని ఈడీ పిటిషన్ కూడా వేసింది. ఇలాంటి తరుణంలో గవర్నర్ డ్రగ్స్ కేసు గురించి కూడా కేంద్రానికి నివేదిక ఇవ్వడం సంచలనంగా మారే అవకాశం కనిపిస్తోంది.

ఢిల్లీలో గవర్నర్ చేస్తున్న విమర్శలపై మంత్రి కేటీఆర్ స్పందించారు. గవర్నర్‌తో తమకు ఎలాంటి పంచాయతీ లేదని ఆయన స్పష్టం చేశారు. కౌశిక్ రెడ్డికి ఎమ్మెల్సీ ప్రతిపాదనకు ఆమోదం చెప్పలేదని .. ఇబ్బంది పెడుతున్నారని గవర్నర్ అంటున్నారని.. గత గవర్నర్ నరసింహన్ ఉన్నప్పుడు తమకు ఎప్పుడూ ఇబ్బందులు ఎదురు కాలేదని కేటీఆర్ గుర్తు చేశారు. గవర్నర్ ఏదేదో ఊహించుకుని మాట్లాడుతూంటే తాము ఏం  చేయగలమని కేటీఆర్ ప్రశ్నించారు.