KTR on Jobs: తెలంగాణ యువతకు ఇచ్చిన 2 లక్షల ఉద్యోగాల హామీ ఏమైంది? రాహుల్ గాంధీకి కేటీఆర్ సూటి ప్రశ్న

TELANGANA Jobs | తెలంగాణలో అధికారంలోకి రాగానే ఏడాదిలో 2 లక్షల ఉద్యోగాలు భర్తీ చేస్తామని, యువతకు మీరు ఇచ్చిన హామీ ఏమైంది అని రాహుల్ గాంధీని మాజీ మంత్రి కేటిఆర్ ప్రశ్నించారు.

కేటీఆర్, రాహుల్ గాంధీ

KTR questions Rahul Gandhi over 2 lakh jobs in 1 year promise | హైదరాబాద్: తెలంగాణలో 2 లక్షల ఉద్యోగాలు భర్తీ చేస్తామని కాంగ్రెస్ పార్టీ ఇచ్చిన హామీపైన రాహుల్ గాంధీ వైఖరిని రాష్ట్ర మాజీ మంత్రి కేటీఆర్ ప్రశ్నించారు. లోక్‌సభలో ప్రతిపక్షనేత, కాంగ్రెస్ అగ్రనేత రాహుల్ గాంధీ ఎన్నికల ముందు స్వయంగా తెలంగాణలోని యువతను కలిశారు. నిరుద్యోగులను కలిసి 2 లక్షల ప్రభుత్వ ఉద్యోగాలను మొదటి ఏడాదిలోనే భర్తీ చేస్తామని హామీ ఇచ్చిన విషయాన్ని కేటీఆర్ గుర్తు చేశారు. ఈ మేరకు అన్ని ప్రధాన పత్రికల్లో, మీడియాలో పెద్ద ఎత్తున జాబ్ క్యాలెండర్ (Congress Job Calendar) ప్రకటనలను సైతం విడుదల చేశారని గుర్తుచేశారు.

జాబ్ క్యాలెండర్ ఏమైంది ?
కాంగ్రెస్ పార్టీ విడుదల చేసిన ప్రకటనల్లో, ఎన్నికల మేనిఫెస్టోలో తేదీలతో సహా ప్రకటించిన విషయాన్ని BRS పార్టీ వర్కింగ్ ప్రెసిడెంట్ కేటీఆర్ గుర్తు చేశారు. ఇప్పటికే తెలంగాణలో కాంగ్రెస్ ప్రభుత్వం 7 నెలల సమయం గడిచిపోయిందన్నారు. కానీ ఒక్క కొత్త ప్రభుత్వ ఉద్యోగానికి కూడా నోటిఫికేషన్ జారీ కాలేదన్నారు కేటీఆర్. అన్నిటికన్నా ముఖ్యంగా కాంగ్రెస్ పార్టీ ఎన్నికల ముందు ఇచ్చిన 10 నోటిఫికేషన్ తేదీల గడువు ముగిసిపోయినా నేతల్లో ఏ చలనం లేదని విమర్శించారు. 

కాంగ్రెస్ అధికారంలోకి వచ్చి  ఇప్పటికే 7 నెలల కాలం గడిచిపోయినా నోటిఫికేషన్ ఊసే లేదని, మరి మిగిలిన ఈ 5 నెలల కాలంలో హామీ ఇచ్చిన రెండు లక్షల ప్రభుత్వ ఉద్యోగాల భర్తీకి నోటిఫికేషన్లు ఏ విధంగా జారీ చేస్తారని రాహుల్ గాంధీని బీఆర్ఎస్ నేత కేటీఆర్ ప్రశ్నించారు. కాంగ్రెస్ పార్టీ తరఫున ఎన్నికైన ప్రజాప్రతినిధులు కానీ, తెలంగాణ ప్రభుత్వం కానీ ఈ ఉద్యోగాల భర్తీ విషయంలో బాధ్యత తీసుకోవడం లేదని.. రాహుల్ గాంధీని ఈ విషయంలో ప్రశ్నిస్తున్నట్లు  కేటీఆర్ తెలిపారు. నిరుద్యోగులకు న్యాయం చేయాల్సిన ఉద్యోగాల అంశంపైన రాహుల్ గాంధీ స్పందించాలని కేటీఆర్ ఆదివారం నాడు డిమాండ్ చేశారు.

Dear @RahulGandhi Ji,

You had personally met, promised the Telangana youngsters that recruitment of 2 lakh government jobs would be completed within the first one year of Congress assuming office

Your party also published “job calendar” (full page advertisements) in all… pic.twitter.com/VNZL2zyqvu

— KTR (@KTRBRS) June 30, 2024