KTR: ఈడీ నోటీసులొచ్చాయి కానీ - కేటీఆర్ ఫస్ట్ రియాక్షన్ - పూర్తిగా లైట్ తీసుకున్నట్లేనా !?
ED Notices: ఈడీ నోటీసులు అందాయని కేటీఆర్ మీడియా ప్రతినిధులతో నిర్వహించిన చిట్ చాట్ లో తెలిపారు. హాజరవుతారా లేదా అన్నదానిపై ఎలాంటి స్పందన వ్యక్తం చేయలేదు.
Formula E Race: ఫార్ములా ఈ రేసు వ్యవహారంలో ఎన్ఫోర్స్మెంట్ డైరక్టరేట్ తనకు నోటీసులు జారీ చేసిందని కేటీఆర్ అంగీకరించారు. తెలంగాణ భవన్లో మీడియా ప్రతినిధులతో ఇష్టాగోష్టిగా మాట్లాడిన ఈడీ నోటీసులపై స్పందించారు. ఏసీబీ నమోదు చేసిన కేసు ఆధారంగా ఈడీ కూడా ఈసీఐఆర్ నమోదు చేసిందన్నారు. తాను హైకోర్టులోక్వాష్ పిటిషన్ దాఖలు చేశానని ఎఫ్ఐఆర్ను ఏసీబీ కొట్టివేస్తే ఏం జరుగుతుందో చూడాలన్నారు. ఏడో తేదీన హాజరు కావాలని కేటీఆర్ను ఈడీ ఆదేశించింది. ఇతర కేసుల్లో మాదిరి కాకుండా ఈ కేసులో ఈడి దూకుడుగా వ్యవహరిస్తోందని కేటీఆర్ అభిప్రాయపడ్డారు.
పసలేని కేసులు పనికిమాలిన కేసులను ప్రభుత్వం పెడుతుందని..అవినీతి జరగనే లేనప్పుడు అవినీతి నిరోధక శాఖ పేరుతో కేసులు పెడుతుందని కేటీఆర్ ప్రశ్నించారు. ఎన్ని అక్రమ కేసులు పెట్టిన న్యాయపరంగా ఎదుర్కొంటామని.. ప్రభుత్వం తమ అధికార యంత్రాంగం చేతిలో ఉందని అడ్డగోలుగా కేసులు పెట్టినా ఎదుర్కొంటామని స్పష్టం చేశారు. నేను మొదటి రోజు చెప్పిన మాటకే కట్టుబడి ఉన్నా... ప్రభుత్వ నిర్ణయంగా ఒక మంత్రిగా నిర్ణయం తీసుకున్న అదే మాటకు నేను కట్టుబడి ఉన్నానని తెలిపారు.
రాష్ట్ర మంత్రి పొన్నం ప్రభాకర్ చెప్పిన మాటల్లోనే అవినీతి జరగలేదని చెప్పారని.. అవినీతి ఎక్కడ ఉందని ముఖ్యమంత్రినీ అడిగితే చెప్పలేని పరిస్థితి ఉందన్నారు. ఫార్ములా ఈ ప్రతినిధులతో కలిసిన ఫోటో బయట పెట్టడంతో ముఖ్యమంత్రి అధికారులను బ్లాక్ మెయిల్ చేస్తున్నాడని ఆరోపించారు. సస్పెండ్ చేస్తాను క్రమశిక్షణ చర్యలు తీసుకుంటానని బెదిరిస్తున్నాడని.. మరి ఫార్ములా ఈ వాళ్లతో కలిసిన రేవంత్ రెడ్డి వాళ్లపైన ఎందుకు కేసు పెట్టలేదని ప్రశ్నించారు.
ఫార్ములా ఈ ప్రతినిధులతో జరిగిన సమావేశాన్ని ఒక సంవత్సరం పాటు దాచి ఉంచాడని.. రేవంత్ రెడ్డి వాళ్ల దగ్గర డబ్బులు తీసుకున్నాడని అనుమానం ఉందని కేటీఆర్ వఅన్నారు. అనుచిత లబ్ధి పొందింది ఫార్ములా ఈ సంస్ధ వాస్తవమైతే వాళ్లపైనే ఎందుకు కేసు పెట్టలేదని ప్రశ్నించారు. ముఖ్యమంత్రి 600 కోట్లు అంటూ అడ్డగోలుగా అబద్ధాలు మాట్లాడుతున్నాడని.. అదానితో కాంటాక్ట్లను రద్దు చేసుకోలేము అని చెబుతున్న ముఖ్యమంత్రి ఫార్ములా ఈ ని ఏ విధంగా రద్దు చేసుకున్నాడని ప్రశ్నించారు. దీనికి ఏమన్నా క్యాబినెట్ అప్రూవల్ ఉన్నదా అని ప్రశ్నించారు.
ప్రొసీజర్ పొరపాట్లు ఉంటే సంబంధిత సంస్థల దగ్గరికి వెళ్ళాలి కానీ అవినీతి కేసులు అని పెట్టడం వృధా అని వ్యాఖ్యానించారు. హైదరాబాద్ పేరు ప్రతిష్ట తెలంగాణ రాష్ట్రాన్ని అంతర్జాతీయ స్థాయిలో నిలిపేందుకు హైదరాబాద్ నుంచి ఫార్ములా ఈ రేసు పోవద్దన్న ఉద్దేశంతోనే డబ్బులు కట్టామన్నారు. ఈ మొత్తం వ్యవహారంలో ఒక్క రూపాయి అవినీతి కూడా అవకాశమే లేదని స్పష్టం చేశారు. ఒక పైసా అవినీతి జరగలేదు కోర్టులో విచారణ జరుగుతున్నందున ఈ అంశం లో మరిన్ని విషయాలు చెప్పలేనన్నారు.
టాప్ హెడ్ లైన్స్
ట్రెండింగ్ వార్తలు
