Hyderabad Gun Fire: ఓఆర్ఆర్‌పై గన్ ఫైరింగ్ కలకలం, కారులో వచ్చి ట్రక్కు డ్రైవర్‌పై

Gun Fire Hyderabad ORR: ఈ కాల్పుల్లో లారీ అద్దాలు పగిలిపోయాయి. వెంటనే లారీ డ్రైవర్‌ 100 కు ఫోన్ చేసి పోలీసులకు సమాచారం అందించాడు.

కాల్పుల నుంచి తప్పించుకున్న ట్రక్కు డ్రైవర్

హైదరాబాద్ ఔటర్ రింగ్ రోడ్డుపై ఉన్నట్టుండి తుపాకీ కాల్పులు కలకలం రేపాయి. కారులో వచ్చిన ఓ వ్యక్తి ట్రక్కు డ్రైవర్‌పైన కాల్పులు జరిపాడు. గురి తప్పడంతో డ్రైవర్ ప్రాణాలతో బయటపడ్డాడు. శనివారం రాత్రి ఓఆర్ఆర్‌పై ఈ ఘటన చోటు చేసుకుంది. నాగాలాండ్ రిజిస్ట్రేషన్‌తో ఉన్న ఎన్‌ఎల్‌ 01 ఏఎఫ్‌ 3226 ఓ భారీ ట్రక్కు ఓఆర్ఆర్ వెళ్తోంది. దాన్ని వెంటనే వస్తూ స్విఫ్ట్‌ కారులో వచ్చిన ఓ వ్యక్తి ఈ కాల్పులు చేశాడు. రెండు వాహనాలు శంషాబాద్‌ తుక్కుగూడ ఎగ్జిట్‌ 14 వద్దకు రాగానే అకస్మాత్తుగా లారీ డ్రైవర్‌పై కారులో వచ్చిన వ్యక్తి ఒక రౌండ్‌ కాల్పులు జరిపాడు. గురి తప్పటంతో డ్రైవర్‌‌కు ఎలాంటి గాయాలు కాలేదు. డ్రైవర్ పేరు మనోజ్ అని పోలీసులు తెలిపారు.

అయితే, ఈ కాల్పుల్లో లారీ అద్దాలు పగిలిపోయాయి. వెంటనే లారీ డ్రైవర్‌ 100 కు ఫోన్ చేసి పోలీసులకు సమాచారం అందించాడు. ఇనుముతో ఈ భారీ ట్రక్కు మెదక్‌ నుంచి కేరళలోని కొచ్చికి వెళ్తోందని డ్రైవర్ పోలీసులతో చెప్పారు. అయితే, నిందితులు దొంగలు అని పోలీసులు భావిస్తున్నారు. ఘటన జరగ్గానే కారులోనే నిందితులు పరారీ అవ్వగా, అతను కాల్పుల అనంతరం నిందితుడు వరంగల్‌ వైపు పరారై ఉండవచ్చని భావిస్తున్నారు. నిందితుడ్ని పట్టుకునేందుకు పోలీసులు ప్రత్యేక టీమ్‌లను ఏర్పాటు చేశారు. 

ఇందుకోసం ఈ తరహా నేరాలకు పాల్పడ్డ వారి చరిత్రను తిరగవేస్తున్నారు. గతంలోనూ ఔటర్‌ రింగ్ రోడ్డుపై తమిళనాడు, మధ్యప్రదేశ్‌, యూపీకి చెందిన దోపిడీ దొంగలు హల్‌చల్‌ చేశారు. విలువైన వస్తువులు రవాణా చేసే లారీలు, కంటైనర్లను వీరు లక్ష్యంగా చేసుకుంటున్న ఘటనలు గతంలో వెలుగు చూశాయి. డ్రైవర్లను బెదిరించటం, లేదా చంపడం వంటివి చేసి సరకును మాయం చేసేవారు. ఇటీవల లారీ టైర్లు, సబ్బులతో వెళ్తున్న లారీలను అడ్డగించి సరకును దోచుకున్న ఘటనలు కూడా వెలుగు చూశాయి. అలాంటి నిందితులను రాచకొండ పోలీసులు అరెస్టు చేశారు. ఈ ఘటనకు కూడా అలాంటి గ్రూపులే కారణం అని పోలీసులు భావిస్తున్నారు. 

భార్యను చంపిన భర్త

హైదరాబాద్‌లో తెల్లవారు జామున కిరాతకమైన ఘటన జరిగింది. భార్యను భర్త అత్యంత దారుణంగా హత్య చేశాడు. నగరంలోని కులుసుం పుర పోలీస్ స్టేషన్ పరిధిలోని సంజయ్ నగర్ జియాగూడలో ఈ దారుణం చోటు చేసుకుంది. చనిపోయిన వివాహితను సరిత యాదవ్ (26) అనే వ్యక్తిగా పోలీసులు గుర్తించారు.

పోలీసులు వెల్లడించిన వివరాల ప్రకారం.. స్థానికంగా ఉన్న ఓ టిఫిన్ సెంటర్‌లో ఆమె భర్త సంతోష్ పని చేస్తున్నాడు. కొన్నాళ్లుగా తన భార్యపై సంతోష్ అనుమానాన్ని పెంచుకున్నట్లుగా పోలీసులు తెలిపారు. దీంతో కోపం పట్టలేని అతను తన ఇంట్లో సరితను ప్రైవేట్ పార్ట్‌లో కత్తితో పొడిచి హత్య చేశాడు. ఈ హత్యకు కారణం భార్యపై అనుమానమే అయి ఉండవచ్చని పోలీసులు అనుమానిస్తున్నారు. హత్య చేసే సమయంలో దాన్ని ఆపేందుకు మృతురాలి బంధువు అడ్డు రాగా, ఆ వ్యక్తిపై కూడా కత్తితో దాడి చేశాడు.