Gaddar Controvery : గద్దర్‌కు పోలీసు లాంఛనాలతో అంత్యక్రియలపై వివాదం - తప్పేం లేదన్న సజ్జనార్ !

గద్దర్‌కు పోలీసు లాంఛనాలతో అంత్యక్రియలపై వివాదం ఏర్పడింది. పోలీసుల్ని అగౌరవపర్చడమేనని కొందరు అంటే.. తప్పేం లేదని సజ్జనార్ అంటున్నారు.

గద్దర్‌కు పోలీసు లాంఛనాలతో అంత్యక్రియలపై వివాదం - తప్పేం లేదన్న సజ్జనార్ !

 

Gaddar Controvery : ప్రజాయుద్ధ నౌక గద్దర్ అంత్యక్రియలను పోలీసు అధికారిక లాంఛనాలతో నిర్వహించడంపై కొంత మంది వ్యతిరేకత వ్యక్తం చేస్తున్నారు. ఇలా చేయడం  నక్సలైట్  వ్యతిరేక పోరాటంలో అమరులైన పోలీసుల, పౌరుల త్యాగాలను అవమానించడమేన‌ని యాంటీ టెర్ర‌రిజం ఫోరం ప్రకటించింది.  గద్దర్ తన విప్లవ పాటల ద్వారా వేలాది మంది యువకులను నక్సలైట్ ఉద్యమం వైపు మళ్లించార‌ని, ప్రజాస్వామ్యానికి వ్యతిరేకంగా తుపాకీ పట్టిన నక్సల్స్ ఉద్యమం వేలాది మంది పోలీసులను బలితీసుకుందని వారు చెబుతున్నారు.  నక్సలిజం  సాధారణ పౌరులపై , జాతీయ వాదులపై కూడా దాడులు జరిపి అనేక మందిని బలితీసుకుందని వెల్ల‌డించారు.               

ప్రజాస్వామ్య వ్యవస్థకు వ్యతిరేకంగా గద్దర్ పోరాాడారన్న యాంటీ టెర్రరిజం ఫోరం

ప్రజాస్వామ్య వ్యవస్థకు వ్యతిరేఖంగా సాయిధ పోరాటాలు చేయడానికి తన సాహిత్యం ద్వారా యువతను దేశ ద్రోహులుగా తయారు చేసిన గద్దర్ లాంటి వ్యక్తికి  తెలంగాణ ప్రభుత్వం అధికారికంగా అంత్యక్రియలు చేయాలని నిర్ణయించడాన్ని తాము తీవ్రంగా ఖండిస్తున్నామ‌ని యాంటీ టెర్ర‌రిజం ఫోరం తెలిపింది. చర్య , ప్రభుత్వ నిర్ణయం ప్రజాస్వామ్య పరిరక్షణలో.. శాంతి భధ్రతల పరిరక్షణలో తమ ప్రాణాలను అర్పించిన పోలీసు అమరవీరుల త్యాగాలను, ప్రజల త్యాగాలను అవమానించడమే అవుతుంద‌ని లేఖ‌లో పేర్కొన్నారు. ప్రభుత్వ నిర్ణయం పోలీసు బలగాల ఆత్మ స్థైర్యాన్ని దెబ్బతీస్తుందని, ప్రభుత్వ నిర్ణయాన్ని ప్రజాస్వామ్య వాదులు ఖండించాలని కోరింది.

నక్సలిజం వల్ల ఎన్నో పోలీసు కుటుంబాలు కుటుంబసభ్యులను కోల్పోయాయన్న ఏటీఎఫ్                                        

పోలీసు అమరవీరుల కుటుంబాలు ప్రభుత్వ నిర్ణయంతో తీవ్రంగా కలత చెందుతున్నాయని, పోలీసు అధికారుల సంఘం కూడా ప్రభుత్వ అనాలోచిత నిర్ణయంపై నోరు విప్పి ప్రభుత్వం తన నిర్ణయాన్ని ఉపసంహరించుకోనేలా చూడాలని కోరింది. దీనిని ఒక వ్యక్తికి జరుగుతున్న అంత్యక్రియలుగా మాత్రమే చూడకూడదని అధికారికంగా అంత్యకియలు జరిపితే ప్రభుత్వం నక్సలైట్ భావజాలానికి పోలీసు బలగాలతో అధికారికంగా సెల్యూట్ చేయించడమే అవుతుందని పేర్కొంది. వెంటనే ప్రభుత్వం తన నిర్ణయాన్ని ఉపసంహరించుకోవాలని  యాంటి టెర్రరిజం ఫోరం  క‌న్వీన‌ర్ రావినూత‌ల శ‌శిధ‌ర్ డిమాండ్ చేశారు.

పోలీసు లాంఛనాలతో అంత్యక్రియలు పోలీసుల్ని అవమానించినట్లు కాదన్న   సజ్జనార్                          

అయితే యాంటీ టెర్రరిజం ఫోరం అభ్యంతరాన్ని  సీనియర్ ఐపీఎస్ అధికారి వీసీ సజ్జనార్ తోసిపుచ్చారు. గద్దర్ కి ప్రభుత్వ లాంచనాలతో అంత్యక్రియలు చేయడం లో తప్పు లేదు.. 
పోలీసులను అగౌరవ పరిచినట్టు కాదన్నారు.  తెలంగాణ ప్రజల సమస్యలను తన గానం రూపంలో చాటి చెప్పారని..  ఓ గౌరవప్రదమైన వ్యక్తికి ప్రభుత్వ లాంచనాలతో అంత్యక్రియలు చేయడం లో తప్పు లేదన్నారు.