Breaking News Live Telugu Updates: ఆచార్య సెట్ లో భారీ అగ్నిప్రమాదం. భారీగా ఎగసిపడుతున్న మంటలు

ఏపీ, తెలంగాణ సహా జాతీయ, అంతర్జాతీయ స్థాయిలో నేటి బ్రేకింగ్ న్యూస్ అప్‌డేట్స్ ఇక్కడ పొందొచ్చు. ఈ లైవ్ బ్లాగ్ అప్ డేట్ అవుతుంటుంది. తాజా సమాచారం కోసం రీఫ్రెష్ చేస్తుండండి.

Background

పొడి గాలుల ప్రభావంతో తెలుగు రాష్ట్రాలు సహా దేశవ్యాప్తంగా వర్షాలు పడే అవకాశం లేదని వాతావరణ అధికారులు తెలిపారు. ఉత్తర వాయువ్య దిశ నుంచి వస్తున్న పొడిగాలుల వల్ల పగటి ఉష్ణోగ్రతలు మరింత పెరుగుతాయని వారు అంచనా వేశారు. వచ్చే మూడు రోజులు రాత్రి వేళ ఉష్ణోగ్రతలు తగ్గడంతో పాటు పగటిపూట వేడి పెరుగుతుందని అంచనా వేశారు. 

తెలంగాణలో క్రమంగా చలి తగ్గి వేడి పెరుగుతోంది. నేడు తెలంగాణలో ఒకటి లేదా రెండు ప్రాంతాల్లో సాధారణంగా 2 నుంచి 3 డిగ్రీల అధిక ఉష్ణోగ్రతలు నమోదవుతాయని హైదరాబాద్ వాతావరణ విభాగం వెల్లడించింది. మరోవైపు, రాత్రి పూట చలి విషయంలో 7 జిల్లాల్లో ఎల్లో అలర్ట్ జారీ అయింది. ఆదిలాబాద్, కుమ్రంభీం, మంచిర్యాల, నిర్మల్, కామారెడ్డి, మెదక్, సంగారెడ్డి, హైదరాబాద్, రంగారెడ్డి జిల్లాలకు ఎల్లో అలర్ట్ ఉంది. మామూలుగా 5 నుంచి 10 డిగ్రీల మధ్య ఉష్ణోగ్రతలు నమోదయ్యే అవకాశం ఉందనిపిస్తే వాతావరణ విభాగం ఆరెంజ్‌ అలర్ట్‌ జారీ చేస్తుంది. 11 నుంచి 15 డిగ్రీల మధ్య ఉష్ణోగ్రత నమోదయ్యే అవకాశం ఉంటే ఎల్లో అలెర్ట్ జారీ చేస్తుంటారు. రాబోయే ఐదు రోజులకు సంబంధించి తెలంగాణ వాతావరణ విభాగం నమోదు కానున్న ఉష్ణోగ్రతల అంచనాలను వెదర్ బులెటిన్‌లో వివరించింది. నేటి నుంచి నాలుగు రోజుల పాటు తెలంగాణ వ్యాప్తంగా ఏ జిల్లాలోనూ ఎలాంటి అలర్ట్ జారీ చేయలేదు.

హైదరాబాద్ లో ఇలా
‘‘ఆకాశం నిర్మలంగా ఉంటుంది. నగరంలో పొగ మంచు ఉదయం సమయంలో ఏర్పడుతుంది. గరిష్ఠ, కనిష్ఠ ఉష్ణోగ్రతలు వరుసగా 34 డిగ్రీలు, 18 డిగ్రీలుగా ఉండే అవకాశం ఉంది. ఆగ్నేయ దిశ నుంచి గాలులు గంటకు 6 నుంచి 10 కిలో మీటర్ల వేగంతో వీచే అవకాశం ఉంది’’ అని వెదర్ బులెటిన్ లో పేర్కొ్న్నారు. నిన్న గరిష్ఠ ఉష్ణోగ్రత 34.1 డిగ్రీలు, కనిష్ఠ ఉష్ణోగ్రత 18.3 డిగ్రీలుగా నమోదైంది.

ఏపీలో ఇలా
ఆంధ్రప్రదేశ్‌ వాతావరణ విభాగం తెలిపిన వివరాల మేరకు ఆంధ్రప్రదేశ్, యానాం ప్రాంతాల్లో దిగువ ట్రోపోస్ఫిరిక్ స్థాయిల్లో ఆగ్నేయ, నైరుతి దిశలలో గాలులు వీస్తున్నాయని వెదర్ బులెటిన్ లో పేర్కొన్నారు. రాష్ట్రంలో ఒకటి లేదా రెండు చోట్ల పగటిపూట గరిష్ఠ ఉష్ణోగ్రతలు సగటు ఉష్ణోగ్రతల కంటే 2 నుంచి 3 డిగ్రీలు అధికంగా నమోదయ్యే అవకాశం ఉందని తెలిపారు.

 

ఈ వాతావరణ పరిస్థితుల వల్ల ఏపీలోని ఉత్తర కోస్తా ఆంధ్ర, యానాం ప్రాంతాల్లో వచ్చే మూడు రోజులు పొడి వాతావరణమే ఉంటుందని అమరావతి వాతావరణ కేంద్రం ప్రకటనలో తెలిపింది. దక్షిణ కోస్తా ఆంధ్రప్రదేశ్ లో కూడా పొడి వాతావరణమే ఉండనుంది. రాయలసీమలో వచ్చే మూడు రోజులు పొడి వాతావరణమే ఉండనుంది. రాయలసీమలో కనిష్ఠ ఉష్ణోగ్రతలు సగటు ఉష్ణోగ్రత కంటే 2 నుంచి 4 డిగ్రీల వరకూ తక్కువగా ఒకటి లేదా రెండు చోట్ల నమోదయ్యే అవకాశం ఉంది. 

ఎల్ నినో ఏర్పడే అవకాశాలు
మరో 3 లేదా 4 రోజుల్లో ఎండల స్థాయి 40 డిగ్రీలకు చేరుతుందని ఆంధ్రప్రదేశ్ వెదర్ మ్యాన్ అంచనా వేశారు. ‘‘ఎల్-నినో ఏర్పడే అవకాశాలు ఈ ఏడాది కనిపిస్తున్నాయి కాబట్టి రానున్న మూడు నెలల్లో ఎండల వేడి బాగా ఎక్కువ ఉండనుంది. పసిఫిక్ మహా సముద్రంలో ప్రస్తుతం కొనసాగుతున్న లా-నినా ఇప్పుడు బాగా బలహీనపడింది. దీని ప్రభావం మరి కొన్ని రోజుల్లో పూర్తిగా తగ్గనుంది. మార్చి నుంచి మే నెలలో మనకు ఎండలు బాగానే కాస్తాయి.

కానీ గత మూడు సంవత్సరాలుగా సాధారణం కంటే తక్కువగానే ఎండలు ఉన్నాయి. చాలా మంది ఇది కోవిడ్ లాక్ డౌన్ వలన ఉష్ణోగ్రతలు తక్కువగా ఉంది అని అనుకున్నారు, కానీ ఇది కోవిడ్ లాక్ డౌన్ వలన కాదు. ఇది పసిఫిక్ లో ఏర్పడిన లా-నినా ప్రభావం. కాబట్టి రానున్న రోజుల్లో లానినా ఉండదు కాబట్టి. ఎండలు సాధారణం కంటే ఎక్కువ ఉండే అవకాశాలు ఎక్కువగా ఉన్నాయి.

2003, 2009, 2012, 2015, 2018 సంవత్సరాల్లో ఎల్-నినో ఏర్పడే తరుణంలో ఎండలు సాధారణం కంటే ఎక్కువగానే ఉండనున్నాయి. దీనికి తోడు మే నెలలో బంగాళాఖాతంలో ఏర్పడే తుపాన్లు బర్మా లేదా బంగ్లాదేశ్ వైపుగా వెళ్లడం జరిగితే వడగాల్పులు ఉండటం సాధారణం. మరి ఈ సారి ఎలా ఉండనుందో చూడాలి’’ అని ఏపీ వెదర్ మ్యాన్ తెలిపారు.

22:36 PM (IST)  •  27 Feb 2023

ఆచార్య సెట్ లో భారీ అగ్నిప్రమాదం, ఎగసిపడుతున్న మంటలు

ఆచార్య సెట్ లో భారీ అగ్నిప్రమాదం చోటుచేసుకుంది. మంటలు భారీగా ఎగసిపడుతున్నాయి. సోమవారం రాత్రి ఈ ఘటన జరిగింది. సినిమాలోని పాదఘట్టం సెట్ హైదరాబాద్ లోని కోకాపేటలో వేశారు. ఈ సెట్ ఇంకా తొలగించలేదు. ఇదే సెట్ లో భారీ అగ్ని ప్రమాదం జరిగింది. సమాచారం అందుకున్న అగ్నిమాపక సిబ్బంది అక్కడికి చేరుకుని మంటలు ఆర్పే ప్రయత్నం చేస్తున్నారు.

19:04 PM (IST)  •  27 Feb 2023

ఢిల్లీ డిప్యూటీ సీఎం సిసోడియా అరెస్టును ఖండించిన సీఎం కేసీఆర్

ఢిల్లీ ఉప ముఖ్యమంత్రి మనీష్ సిసోడియాను సిబిఐ అరెస్టు చేయడాన్ని తీవ్రంగా ఖండిస్తున్నాను. 
ఇది అదానికి ప్రధాని మోడీ కి నడుమనున్న అనుబంధాన్నించి ప్రజల దృష్టిని మల్లించడానికి చేసిన పనే తప్ప మరోటి కాదు.
- బిఆర్ఎస్ అధినేత, ముఖ్యమంత్రి కె.చంద్రశేఖర్ రావు

16:41 PM (IST)  •  27 Feb 2023

హైదరాబాద్ లో గన్ తో కాల్చుకుని డాక్టర్ ఆత్మహత్య

హైదరాబాద్ లో గన్ తో కాల్చుకుని డాక్టర్ ఆత్మహత్య

జూబ్లీహిల్స్ అపోలోకు తరలింపు...
కుటుంబ తగాదాల కారణంగా ఆత్మహత్య ప్రయత్నం చేసిన మజార్..

 రోడ్ నెంబర్ 12 లో తన ఇంట్లో ఆత్మహత్యానికి పాల్పడ్డ మజార్..

 తీవ్ర గాయాల పాలైన మజారిని ఆస్పత్రులు చేర్పించిన కుటుంబ సభ్యులు..

 ఆసుపత్రిలో చికిత్స పొందుతూ చనిపోయిన మజార్....

మృతుడు మజర్‌ అలీ ఖాన్‌ ఎంపీ అసదుద్దీన్ ఓవైసి సమీప బంధువు

14:27 PM (IST)  •  27 Feb 2023

Tirupati News: తిరుపతిలో సోమువీర్రాజుకి‌ నిరసన సెగ

తిరుపతిలో ఏపీ బీజేపీ అధ్యక్షుడు సోము వీర్రాజుకి చేదు అనుభవం ఎదురైంది. ఎమ్మెల్సీ ఎన్నికల నేపథ్యంలో బీజేపీ అభ్యర్థిని గెలిపించాలంటూ బీజేపీ కార్యాలయంలో ప్రెస్ మీట్ నిర్వహించిన అనంతరం బయటకు వచ్చిన సోము వీర్రాజుకి ఆమ్ ఆద్మీ పార్టీ నాయకుల నుంచి నిరసన సెగ ఎదురైంది. ఢిల్లీ డిప్యూటీ సీఎం మనీష్ సిసొడియా అరెస్టును నిరసిస్తూ సోము వీర్రాజు వాహనానికి అడ్డంగా రోడ్డుపై బైఠాయించిన ఆమ్ ఆద్మీ పార్టీ కార్యకర్తలు, ఢిల్లీ ఉప ముఖ్యమంత్రి సిసోడియాని వెంటనే విడుదల చేయాలంటూ నినాదాలు చేస్తూ రోడ్డు పైనే బైఠాయించారు. సోమువీర్రాజు వాహనానికి అడ్డంగా కూర్చోవడంతో కోపోద్రిక్తులైన బీజేపీ కార్యకర్తలు ఆమ్ ఆద్మీ పార్టీ కార్యకర్తలపై వాగ్వాదానికి దిగారు. ఆమ్ ఆద్మీ పార్టీ కార్యకర్తలు తెచ్చిన ప్లకార్డులకు ఉన్న కట్టెలను తీసుకొని వారిని కొట్టడంతో పాటు అక్కడ నుంచి తరిమివేశారు. సిసోడియా అరెస్ట్ ని నిరసిస్తూ తాము శాంతియుతంగా నిరసన చేస్తుంటే తమపై బీజేపీ నాయకులు దాడికి పాల్పడ్డారని, వెంటనే వారిని అరెస్టు చేయాలని ఆమ్ ఆద్మీ పార్టీ నాయకులు డిమాండ్ చేశారు.

12:43 PM (IST)  •  27 Feb 2023

D Srinivas Health: డి.శ్రీనివాస్‌కు తీవ్ర అస్వస్థత, ఆస్పత్రికి తరలింపు

ఉమ్మడి ఆంధ్రప్రదేశ్ లో పీసీసీ చీఫ్‌గా పని చేసిన సీనియర్ నేత ధర్మపురి శ్రీనివాస్‌ తీవ్ర అస్వస్థతకు గురయ్యారు. ప్రస్తుతం హైదరాబాద్‌లో ఉంటున్న ఆయన్ను.. కుటుంబ సభ్యులు ఆయనను హుటాహుటిన సిటీ న్యూరో ఆసుపత్రికి తీసుకెళ్లారు. ప్రస్తుతం చికిత్స చేస్తున్నారు. ఈ విషయాన్ని ఆయన కుమారుడు, నిజామాబాద్ ఎంపీ ధర్మపురి అరవింద్ ట్విటర్ వేదికగా వెల్లడించారు. తన తండ్రి తీవ్ర అనారోగ్యం బారిన పడ్డారని.. ఆసుపత్రిలో చికిత్స జరుగుతోందని తెలిపారు. కాబట్టి తాను రెండు రోజుల పాటు అధికారిక కార్యక్రమాల్లో పాల్గొనలేనని తెలిపారు. నేడు రేపు తన కార్యక్రమాలన్నింటినీ రద్దు చేసుకుంటున్నట్టు వెల్లడించారు.