Poco X6 Neo: రూ.15 వేలలోపు పోకో 5జీ ఫోన్ - మొట్టమొదటి సారి నియో బ్రాండింగ్‌తో?

Poco New Phone: ప్రముఖ స్మార్ట్ ఫోన్ బ్రాండ్ పోకో తన కొత్త ఫోన్‌ను భారతీయ మార్కెట్లో లాంచ్ చేయనుంది. అదే పోకో ఎక్స్6 నియో.

పోకో ఎక్స్6 నియో మార్కెట్లో లాంచ్ అయింది.

Source : Poco

Poco X6 Neo India Launch: పోకో తన కొత్త స్మార్ట్ ఫోన్‌ను మనదేశంలో లాంచ్ చేయడానికి రెడీ అవుతోంది. ఈ స్మార్ట్ ఫోన్ నియో బ్రాండింగ్‌తో లాంచ్ అయ్యే మొదటి స్మార్ట్ ఫోన్ కానుంది. అదే పోకో ఎక్స్6 నియో. అయితే దీని గురించి ఇంతవరకు ఎటువంటి అధికారిక సమాచారం అందుబాటులో లేదు. దీనికి సంబంధించిన లాంచ్ టైమ్‌లైన్, ధర, స్పెసిఫికేషన్లు మాత్రం ఆన్‌లైన్‌లో లీకయ్యాయి. 

ఈ లీకులను బట్టి పోకో ఎక్స్6 నియో వచ్చే నెలలో మార్కెట్లోకి వచ్చే అవకాశం ఉంది. మీడియాటెక్ డైమెన్సిటీ 6080 ప్రాసెసర్‌పై ఈ ఫోన్ పని చేయనుందని తెలుస్తోంది. అలాగే 33W ఫాస్ట్ ఛార్జింగ్‌ను సపోర్ట్ చేసే 5000 ఎంఏహెచ్ బ్యాటరీని కూడా అందించనున్నట్లు సమాచారం.

ప్రముఖ టిప్‌స్టర్ సంజు చౌదరి తెలుపుతున్న దాని ప్రకారం రూ.15 వేలలోపు ధరతోనే పోకో ఎక్స్6 నియో భారతీయ మార్కెట్లో లాంచ్ అయ్యే అవకాశం ఉంది. 6.67 అంగుళాల అమోఎల్ఈడీ డిస్‌ప్లేను కంపెనీ ఈ ఫోన్‌లో అందించనుందని, దీని స్క్రీన్ రిఫ్రెష్ రేట్ 120 హెర్ట్జ్‌గా ఉండనుందని వార్తలు వస్తున్నాయి. వాటర్ రెసిస్టెన్స్ కోసం ఐపీ54 రేటింగ్ ఉండనున్నట్లు తెలుస్తోంది. 3.5 ఎంఎం ఆడియో జాక్‌ను కూడా అందిస్తున్నారు.

గతంలో లాంచ్ అయిన రెడ్‌మీ నోట్ 13ఆర్ స్మార్ట్ ఫోన్‌కు రీబ్రాండెడ్ వెర్షన్‌గా పోకో ఎక్స్6 నియో మార్కెట్లో లాంచ్ కానుందని తెలుస్తోంది. రెడ్‌మీ నోట్ 13ఆర్ స్మార్ట్ ఫోన్ గతేడాది నవంబర్‌లో చైనాలో లాంచ్ అయింది. ఇందులో 12 జీబీ ర్యామ్, 256 జీబీ స్టోరేజ్ అందించారు.

రెడ్‌మీ నోట్ 13ఆర్ స్పెసిఫికేషన్లు, ఫీచర్లు
ఆండ్రాయిడ్ 13 ఆధారిత ఎంఐయూఐ 14 ఆపరేటింగ్ సిస్టంపై రెడ్‌మీ నోట్ 13ఆర్ పని చేయనుంది. ఈ ఫోన్‌లో 6.67 అంగుళాల ఓఎల్ఈడీ డిస్‌ప్లేను అందించారు. స్క్రీన్ రిఫ్రెష్ రేట్ 120 హెర్ట్జ్‌గా ఉంది. మీడియాటెక్ డైమెన్సిటీ 6080 ప్రాసెసర్‌పై ఈ స్మార్ట్ ఫోన్ రన్ కానుంది.

ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు అందించారు. వీటిలో ప్రధాన కెమెరా సామర్థ్యం 108 మెగాపిక్సెల్ కాగా, దీంతో పాటు 2 మెగాపిక్సెల్ సెన్సార్ కూడా అందుబాటులో ఉంది. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ కెమెరా అందించడం విశేషం.

బ్లూటూత్, గ్లోనాస్, గెలీలియో, ఎన్ఎఫ్‌సీ, యూఎస్‌బీ టైప్-సీ పోర్టు, వైఫై, జీపీఎస్ కనెక్టివిటీ ఆప్షన్లు కూడా అందించారు. దీంతో పాటు లైట్ సెన్సార్, గ్రావిటీ సెన్సార్, డిస్టెన్స్ సెన్సార్లు ఉన్నాయి. ఫోన్ పక్కభాగంలో ఉన్న ఫింగర్ ప్రింట్ సెన్సార్ ద్వారా దీన్ని అన్‌లాక్ చేయవచ్చు. రెడ్‌మీ నోట్ 13ఆర్ బ్యాటరీ సామర్థ్యం 5000 ఎంఏహెచ్ కాగా, 33W ఫాస్ట్ ఛార్జింగ్‌ను సపోర్ట్ చేయనుంది. రెడ్‌మీ నోట్ 13ఆర్ మందం 0.77 సెంటీమీటర్లు కాగా, బరువు 175 గ్రాములుగా ఉంది.