Moto G71 5G: మోటొరోలా కొత్త 5జీ ఫోన్ వచ్చేస్తుంది.. లాంచ్ ఈ నెలలోనే! ధర ఎంతంటే?

మోటొరోలా కొత్త 5జీ స్మార్ట్ ఫోన్ మోటో జీ71 5జీ మనదేశంలో జనవరిలోనే లాంచ్ అయ్యే అవకాశం ఉంది.

మోటొరోలా జీ71 5జీ స్మార్ట్ ఫోన్ మనదేశంలో త్వరలో లాంచ్ కానుంది.

మోటొరోలా జీ71 స్మార్ట్ ఫోన్ మనదేశంలో త్వరలోనే లాంచ్ అయ్యే అవకాశం ఉంది. దీనికి సంబంధించిన అధికారిక ప్రకటన ఇంకా రాలేదు. అయితే తాజాగా వస్తున్న లీకుల ప్రకారం.. ఈ ఫోన్ మనదేశంలో జనవరిలోనే లాంచ్ కానుంది. గతేడాది నవంబర్‌లో మోటో జీ200, మోటో జీ51, మోటో జీ41, మోటో జీ31 స్మార్ట్ ఫోన్లు గ్లోబల్ లాంచ్ అయ్యాయి. వీటిలో మోటో జీ51, మోటో జీ31 స్మార్ట్ ఫోన్లు మనదేశంలో ఇప్పటికే లాంచ్ అయ్యాయి.

ప్రముఖ టిప్‌స్టర్ యోగేష్ బ్రార్ ట్వీటర్‌లో మోటో జీ71 లాంచ్ గురించి ట్వీట్ చేశారు. ఈ ఫోన్ జనవరిలోనే మనదేశంలో లాంచ్ కానుందని ఈ ట్వీట్‌లో తెలిపారు. అయితే సరిగ్గా ఏ రోజు లాంచ్ అవుతుందనే విషయం మాత్రం తెలియరాలేదు. మోటొరోలా కూడా దీని గురించి అధికారిక ప్రకటన చేయలేదు.

చైనాలో ఈ ఫోన్ 1,699 యువాన్ల (సుమారు రూ.18,900) ధరతో లాంచ్ అయింది. ఇందులో కేవలం 8 జీబీ ర్యామ్, 128 జీబీ స్టోరేజ్ మాత్రమే అందుబాటులో ఉంది. మనదేశంలో ఒక్క వేరియంటే లాంచ్ అవుతుందా.. మరిన్ని వేరియంట్లు వస్తాయా అనే విషయం తెలియాల్సి ఉంది.

మోటో జీ71 5జీ స్పెసిఫికేషన్లు
ఈ ఫోన్ ఇప్పటికే చైనాలో లాంచ్ అయింది. ఈ ఫోన్‌లో 6.4 అంగుళాల ఫుల్ హెచ్‌డీ+ ఓఎల్ఈడీ డిస్‌ప్లేను అందించారు. దీని స్క్రీన్ రిజల్యూషన్ 2400 x 1080 పిక్సెల్స్‌గా ఉంది. ఈ స్మార్ట్ ఫోన్ డిస్‌ప్లే రిఫ్రెష్ రేట్ 120 హెర్ట్జ్‌గానూ, టచ్ శాంప్లింగ్ రేట్ 240 హెర్ట్జ్‌గానూ ఉంది. క్వాల్‌కాం స్నాప్‌డ్రాగన్ 695 ప్రాసెసర్‌పై మోటో జీ71 5జీ పనిచేయనుంది. 

8 జీబీ ర్యామ్, 128 జీబీ స్టోరేజ్‌ను ఇందులో అందించారు. ర్యామ్‌ను 3 జీబీ వరకు పెంచుకునే అవకాశం కూడా ఉంది. ఇందులో ఆండ్రాయిడ్ 11 ఆపరేటింగ్ సిస్టంను అందించారు. మోటో జీ71 బ్యాటరీ సామర్థ్యం 5000 ఎంఏహెచ్‌గా ఉంది. 30W ఫాస్ట్ చార్జింగ్‌ను ఈ స్మార్ట్ ఫోన్ సపోర్ట్ చేయనుంది.

ఇందులో వెనకవైపు మూడు కెమెరాలు అందించారు. వీటిలో ప్రధాన కెమెరా సామర్థ్యం 50 మెగాపిక్సెల్ కాగా.. దీంతోపాటు 8 మెగాపిక్సెల్ అల్ట్రా వైడ్ యాంగిల్ లెన్స్, 2 మెగాపిక్సెల్ మాక్రో లెన్స్ కూడా ఇందులో ఉన్నాయి. సెల్ఫీలు, వీడియో కాల్స్ కోసం ముందువైపు 16 మెగాపిక్సెల్ కెమెరాను అందించారు.

ఫోన్ వెనకభాగంలో ఫింగర్ ప్రింట్ సెన్సార్‌ను కూడా అందించారు. ఇందులో ఫేస్ అన్‌లాక్ ఫీచర్ కూడా ఉంది. డ్యూయల్ సిమ్ కార్డు స్లాట్, 5జీ సపోర్ట్, వైఫై 6, బ్లూటూత్ వీ5.2, జీపీఎస్, ఏ-జీపీఎస్, బైదు, గ్లోనాస్ వంటి కనెక్టివిటీ ఫీచర్లు కూడా ఇందులో ఉన్నాయి. దీంతోపాటు ఇందులో ఐపీ52 రెసిస్టెన్స్, యూఎస్‌బీ టైప్-సీ పోర్టు, 3.5 ఎంఎం హెడ్ ఫోన్ జాక్ వంటి ఫీచర్లు కూడా అందించారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి