(Source: ECI/ABP News/ABP Majha)
Lionel Messi: మెస్సీనా మజాకా! ఆరు జెర్సీలకు 64 కోట్లు
Lionel Messi: ఫుట్బాల్ సూపర్‌స్టార్ మెస్సీ ధరించిన ఆరు జెర్సీలను ఓ అజ్ఞాత అభిమాని ఏకంగా 64 కోట్ల 86 లక్షల రూపాయలకు ఆ ఆరు జెర్సీలను సొంతం చేసుకున్నాడు.
ఫుట్బాల్ సూపర్‌స్టార్ అర్జెంటీనా కెప్టెన్‌ లియోనల్ మెస్సీ క్రేజ్‌ గురించి ప్రత్యేకంగా చెప్పాల్సిన పని లేదు. మెస్సీ పేరు చెబితే చాలు అభిమానులకు పూన‌కాలు వ‌చ్చేస్తాయి. విశ్వవ్యాప్తంగా లియోనల్ మెస్సీకు కోట్ల సంఖ్యలో అభిమానులు ఉన్నారు. మెస్సీ ప్రపంచంలో ఏ మూలలో ఫుట్బాల్ ఆడినా ఇసకేస్తే రాలనంత మంది జనాలు స్టేడియాలకు తరలి వస్తారు. గ‌తేడాది ఈ దిగ్గజ ఆట‌గాడు తన చిర‌కాల స్వప్నాన్ని నెర‌వేర్చుకున్నాడు. మెస్సీ సార‌థ్యంలోని అర్జెంటీనా 2022లో ఖ‌తార్‌లో జరిగిన ఫిఫా వ‌ర‌ల్డ్ క‌ప్ ఫైన‌ల్ మ్యాచులో ఫ్రాన్స్ ఓడించి విశ్వ విజేతగా నిలిచింది. ఈ మ్యాచులో మెస్సీ రెండు గోల్స్ చేసి విజ‌యంలో కీల‌క పాత్ర పోషించాడు. ఫుట్‌ బాల్‌ ప్రపంచకప్‌లో మెస్సీ ధరించిన ఆరు జెర్సీలను న్యూయార్క్‌లో ఆన్‌లైన్‌ వేలానికి పెట్టగా.. ఓ అజ్ఞాత అభిమాని ఏకంగా 64 కోట్ల 86 లక్షల రూపాయలకు ఆ ఆరు జెర్సీలను సొంతం చేసుకున్నాడు. ఇంత పెద్ద మొత్తంలో ఓ వ్యక్తి ధరించిన జెర్సీలు అమ్ముడుపోవడం క్రీడల చరిత్రలో ఇదే మొదటిసారి అయ్యుంటుందని మార్కెట్‌ విశ్లేషకులు అభిప్రాయపడుతున్నారు. అయితే.. ఎవ్వరూ వీటిని వేలంలో గెలుచుకున్నారు అన్న సంగ‌తిని వేలం నిర్వాహ‌కులు బ‌య‌ట‌కు వెల్ల‌డించ‌లేదు. ఈ మొత్తంలో కొంత భాగాన్ని అరుదైన వ్యాధితో బాధ‌ప‌డుతున్న చిన్న‌పిల్ల‌ల చికిత్స కోసం విరాళంగా ఇవ్వ‌నున్న‌ట్లు మాత్రం తెలిపారు.
అర్జెంటీనా ఫుట్బాల్ స్టార్‌ లియోనల్ మెస్సీ తాజాగా ఒక అరుదైన గౌరవాన్ని అందుకున్నాడు. టైమ్‌ మ్యాగజైన్‌ 2023 సంవత్సరానికి ‘అథ్లెట్‌ ఆఫ్‌ ది ఇయర్‌’గా ఎంపికయ్యాడు. మెస్సీ ఈ ఏడాది జులైలో మియామి క్లబ్‌లో చేరాడు. మొత్తం 14 గేమ్స్‌ ఆడి 11 గోల్స్ కొట్టి జట్టును తొలిసారి లీగ్‌ విజేతగా నిలిపాడు. మెస్సీ వచ్చాక టోర్నీ వీక్షకుల సంఖ్య పెరిగిందని టైమ్‌ ఈ సందర్భంగా పేర్కొంది. అతడు ఇంటర్‌ మియామి జట్టుకు సంతకం చేసి అమెరికాను ఏకంగా సాకర్‌ దేశంగా మార్చేశాడంది. మెస్సీ రాకతో ఎంఎల్‌ఎస్‌ టోర్నీ వీక్షకుల సంఖ్య తో పాటూ టికెట్‌ ధరలు, విక్రయాలు కూడా గణనీయంగా పెరిగాయని తెలిపింది. ఈ అవార్డ్ తో మెస్సీ టైమ్‌ నుంచి గతంలో ఈ అవార్డు అందుకొన్న మైకెల్‌ ఫెల్ప్స్‌ (స్విమ్మింగ్‌), సిమోన్‌ బైల్స్‌ (జిమ్నాస్టిక్స్‌) వంటి వారి సరసన చేరాడు.
ఇంతకుముందు పారిస్‌ సెయింట్‌ జర్మన్‌ క్లబ్‌కు ప్రాతినిధ్యం వహించిన మెస్సీ, ఆ కాంట్రాక్టు ముగియగానే బార్సిలోనా క్లబ్‌లో తిరిగి చేరాలని భావించాడు. కానీ, అతడి ప్రణాళికలు ఫలించకపోవడంతో దీంతో మియామి లేదా సౌదీ లీగ్‌లో ఆడాలని నిర్ణయించుకొన్నాడు. ఈ నేపథ్యంలో 20 మిలియన్‌ డాలర్లకు మియామి అగ్రిమెంట్ కుదుర్చుకుంది. అంతే కాదు రిటైర్మెంట్‌ తర్వాత ఈ క్లబ్‌ యాజమాన్య వాటాలో కొంత భాగం అతడికి కేటాయించేలా ఒప్పందం జరిగినట్లు కథనాలు వెలువడ్డాయి.
ఇటీవలే మెస్సీ ఎనిమిదో సారి బాలన్‌ డి ఓర్‌ అవార్డును దక్కించుకొన్నాడు. 2022-23 గానూ ఉత్తమ ప్రదర్శన కనబర్చడంతోపాటు ఖతర్‌ వేదికగా జరిగిన ఫుట్బాల్ ప్రపంచకప్‌లో తన జట్టును గెలిపించిన మెస్సీ ఈ అవార్డును అందుకున్నాడు. ఇప్పటివరకు అత్యధికంగా 8 సార్లు ఈ అవార్డు అందుకున్న ఆటగాడిగానూ రికార్డు సృష్టించాడు. అత్యధిక బాలన్‌ డి ఓర్‌ అవార్డు పొందిన వారిలో క్రిస్టియానో రొనాల్డో(5) రెండో స్థానంలో ఉన్నాడు.
టాప్ హెడ్ లైన్స్
ట్రెండింగ్ వార్తలు
