Rohit Sharma: రోహిత్ శర్మ సాధించిన అరుదైన రికార్డులు.. ఏడేళ్లయినా ఆ రికార్డు ఇంకా సేఫ్!

భారత క్రికెట్ జట్టుకు కొత్త వన్డే కెప్టెన్‌గా బాధ్యతలు స్వీకరించిన హిట్ మ్యాన్ రోహిత్ శర్మకు ఈ ఫార్మాట్‌లో అరుదైన రికార్డులు ఉన్నాయి.

రోహిత్ శర్మ (ఫైల్ ఫొటో)

రోహిత్ శర్మ భారతజట్టుకు కొత్త వన్డే కెప్టెన్‌గా నియమితమైన సంగతి తెలిసిందే. విరాట్ కోహ్లీ నుంచి రోహిత్ శర్మకు ఈ బాధ్యతలను బీసీసీఐ అందించింది. ఇప్పటినుంచి టీమిండియాను టీ20, వన్డే ఫార్మాట్లలో రోహిత్ శర్మ ముందుకు నడిపించనున్నాడు. వన్డే క్రికెట్‌లో రోహిత్ శర్మకు కొన్ని ప్రత్యేకమైన వ్యక్తిగత రికార్డులు ఉన్నాయి.

తన వన్డే కెరీర్‌లో రోహిత్ శర్మ మొత్తంగా 227 వన్డే మ్యాచ్‌లు ఆడాడు. 48.96 సగటుతో 9,205 పరుగులను హిట్ మ్యాన్ తన వన్డే కెరీర్‌లో సాధించాడు. అందులో 29 శతకాలు, 43 అర్థ శతకాలు ఉన్నాయి. వన్డేల్లో 832 ఫోర్లు, 244 సిక్సర్లు రోహిత్ ఖాతాలో ఉన్నాయి. టీమిండియాకు ఆడిన అత్యంత విజయవంతమైన ఆటగాళ్లలో హిట్ మ్యాన్ కూడా ఒకడు.

వన్డేల్లో ఒక మ్యాచ్‌లో అత్యధిక వ్యక్తిగత స్కోరు రోహిత్ పేరు మీదనే ఉంది. 2014లో శ్రీలంకతో జరిగిన వన్డే మ్యాచ్‌లో రోహిత్ ఈ రికార్డు సాధించాడు. ఏడు సంవత్సరాలు అయినా ఆ రికార్డు ఇప్పటికీ బద్దలు కాలేదు. ఆ ఇన్నింగ్స్‌లో రోహిత్ 33 ఫోర్లు కొట్టాడు. ఇది కూడా రికార్డే. దీంతోపాటు వన్డేల్లో రోహిత్ మూడు సార్లు డబుల్ సెంచరీ సాదించాడు. వన్డే వరల్డ్ కప్‌లో ఐదు శతకాలు సాధించిన ఏకైక బ్యాట్స్‌మన్ కూడా రోహితే.

మొత్తం మూడు ఫార్మాట్లలోనూ రోహిత్ సెంచరీలు సాధించాడు. రోహిత్ శర్మను వన్డే కెప్టెన్‌గా నియమిస్తూ బీసీసీఐ తీసుకున్న నిర్ణయాన్ని ఎంతో మంది మాజీ ఆటగాళ్లు సపోర్ట్ చేశారు. మాజీ కోచ్ రవిశాస్త్రి కూడా బీసీసీఐ తీసుకున్న నిర్ణయం సరైనదేనని, టీమిండియాకు మేలు చేస్తుందని అన్నారు.

మరోవైపు రోహిత్ శర్మ మాత్రం విరాట్‌ను ఆకాశానికి ఎత్తేశాడు. తను జట్టుకు మంచి నాయకుడుగా ఉండేవాడని ప్రశంసించాడు. ఒక నాయకుడిగా, బ్యాటర్‌గా తన అవసరం జట్టుకు ఎంతో ఉందన్నాడు. టీ20 ఫార్మాట్‌లో 50 సగటు ఉండటం అనేది ఎంతో గొప్ప విషయం అన్నాడు. ఈ అనుభవంతో విరాట్ ఎన్నో సార్లు జట్టును కష్టాల్లో నుంచి బయటపడేశాడని తెలిపాడు.