Virat Kohli: ఐపీఎల్‌లో విరాట్ కోహ్లీ ప్రత్యేక రికార్డు - శిఖర్ ధావన్‌ని వెనక్కి నెట్టి!
ఐపీఎల్ 2023లో విరాట్ కోహ్లీ మరో ప్రత్యేక రికార్డును సృష్టించాడు.
Virat Kohli: విరాట్ కోహ్లీ 2023లో తన ఫాంను తిరిగి తెచ్చుకున్నాడు. దాన్ని ఐపీఎల్ 2023లో కూడా కొనసాగించాడు. రాయల్ ఛాలెంజర్స్ బెంగళూరుపై అజేయమైన అర్థ సెంచరీతో జట్టును గెలిపించాడు. కేవలం 49 బంతుల్లోనే 82 పరుగులు సాధించాడు. ఇందులో ఆరు ఫోర్లు, ఐదు సిక్సర్లు ఉన్నాయి.
ఇది విరాట్ కోహ్లీకి ఐపీఎల్‌లో 50కి పైగా పరుగులను సాధించడం ఇది 50వ సారి. ఈ మార్కును అందుకున్న మొదటి భారతీయ బ్యాటర్ విరాట్ కోహ్లీనే. అయితే ఓవరాల్‌గా చూసుకుంటే ఢిల్లీ క్యాపిటల్స్ ఓపెనర్ డేవిడ్ వార్నర్ 60 అర్థ సెంచరీలతో నంబర్ వన్ స్థానంలో ఉన్నాడు. విరాట్ రెండో స్థానంలో ఉండగా, 49 సార్లు ఈ ఫీట్ సాధించిన పంజాబ్ కింగ్స్ కెప్టెన్ శిఖర్ ధావన్ మూడో స్థానంలో ఉన్నాడు. విరాట్ కోహ్లీ 45 అర్థ సెంచరీలు, ఐదు సెంచరీలను ఐపీఎల్‌లో సాధించాడు.
ఇక ఐపీఎల్ 2023ను బెంగళూరు ఘన విజయంతో ప్రారంభించింది. చిన్నస్వామి స్టేడియంలో ముంబై ఇండియన్స్‌తో జరిగిన మ్యాచ్‌లో ఎనిమిది వికెట్లతో భారీ విజయం సాధించింది. మొదట బ్యాటింగ్ చేసిన ముంబై 20 ఓవర్లలో ఏడు వికెట్ల నష్టానికి 171 పరుగులు చేసింది. భారీ ఇన్నింగ్స్ ఆడిన తిలక్ వర్మ (84 నాటౌట్: 46 బంతుల్లో, తొమ్మిది ఫోర్లు, నాలుగు సిక్సర్లు) టాప్ స్కోరర్‌గా నిలిచాడు. ఇక రాయల్ ఛాలెంజర్స్ బెంగళూరు ఆ లక్ష్యాన్ని కేవలం 16.2 ఓవర్లలోనే రెండు వికెట్ల నష్టానికి ఛేదించి విజయాన్ని సాధించింది. ఛేజ్ మాస్టర్ కింగ్ కోహ్లీ (82 నాటౌట్: 49 బంతుల్లో, ఆరు ఫోర్లు, ఐదు సిక్సర్లు) చివరి వరకు క్రీజులో నిలబడ్డాడు. కెప్టెన్, మరో ఓపెనర్ ఫాఫ్ డు ఫ్లెసిస్ (73: 43 బంతుల్లో, ఐదు ఫోర్లు, ఆరు సిక్సర్లు) కూడా అద్భుత ఇన్నింగ్స్ ఆడాడు.
172 పరుగుల లక్ష్యంతో బరిలోకి దిగిన రాయల్ ఛాలెంజర్స్ బెంగళూరుకు ఏ దశలోనూ ముంబై నుంచి పోటీ ఎదురు కాలేదు. ఓపెనర్లు విరాట్ కోహ్లీ (82 నాటౌట్: 49 బంతుల్లో, ఆరు ఫోర్లు, ఐదు సిక్సర్లు), ఫాఫ్ డుఫ్లెసిస్ (73: 43 బంతుల్లో, ఐదు ఫోర్లు, ఆరు సిక్సర్లు) భారీ షాట్లు కొడుతూ స్కోరు బోర్డును పరుగులు పెట్టించారు. విరాట్ కోహ్లీ ఏడు పరుగుల వద్ద ఇచ్చిన రిటర్న్ క్యాచ్‌ను జోఫ్రా ఆర్చర్ అందుకోలేకపోయాడు. అది ముంబై పాలిట శాపంగా మారింది. ఓపెనర్లిద్దరూ బౌండరీలతో చెలరేగిపోయారు.
మొదటి వికెట్‌కు 148 పరుగులు జోడించిన అనంతరం అర్షద్ ఖాన్ బౌలింగ్‌లో భారీ షాట్‌కు ప్రయత్నించి ఫాఫ్ డుఫ్లెసిస్ అవుటయ్యాడు. తర్వాత వచ్చిన దినేష్ కార్తీక్ (0: 3 బంతుల్లో) కూడా ఎక్కువ సేపు క్రీజులో నిలబడలేకపోయాడు. అయితే విరాట్ మాత్రం మ్యాక్స్‌వెల్‌తో (12 నాటౌట్: 3 బంతుల్లో, రెండు సిక్సర్లు) కలిసి టార్గెట్‌ను పూర్తి చేశాడు.
టాస్ ఓడిన ముంబై ఇండియన్స్ మొదట బ్యాటింగ్‌కు దిగింది. కానీ ముంబై టాప్ ఆర్డర్ పూర్తిగా కొలాప్స్ అయింది. రోహిత్ శర్మ (1: 10 బంతుల్లో), ఇషాన్ కిషన్ (10: 13 బంతుల్లో, రెండు ఫోర్లు), కామెరాన్ గ్రీన్ (5: 4 బంతుల్లో, ఒక ఫోర్), సూర్యకుమార్ యాదవ్ (15: 16 బంతుల్లో, ఒక ఫోర్) విఫలం అయ్యారు. దీంతో ముంబై 48 పరుగులకే నాలుగు వికెట్లు కోల్పోయింది. రన్‌రేట్ కనీసం ఆరు పరుగులు కూడా లేదు. ఈ దశలో తిలక్ వర్మ (84 నాటౌట్: 46 బంతుల్లో, తొమ్మిది ఫోర్లు, నాలుగు సిక్సర్లు) ముంబైని ఆదుకున్నాడు.
టాప్ హెడ్ లైన్స్
ట్రెండింగ్ వార్తలు
