దాదాపు రెండు నెలల పాటు క్రికెట్ అభిమానులను ఉర్రూతలూగించిన ఇండియన్ ప్రీమియర్ లీగ్ ముగింపు దశకు చేరుకుంది. నేడు అహ్మదాబాద్‌లోని ప్రపంచంలోనే అతిపెద్ద క్రికెట్ స్టేడియమైన నరేంద్ర మోదీ స్టేడియంలో జరగబోయే గ్రాండ్ ఫైనల్‌లో రాయల్ ఛాలెంజర్స్ బెంగళూరు (RCB), గుజరాత్ టైటాన్స్ (GT) జట్లు టైటిల్ పోరుకు సిద్ధమయ్యాయి. కెప్టెన్లుగా శుభ్‌మన్ గిల్, రజత్ పాటిదార్ తమ జట్లను రెండోసారి ఐపీఎల్ ఛాంపియన్‌గా నిలబెట్టాలని వ్యూహప్రతివ్యూహాలు రచిస్తున్నారు. లీగ్ దశలో అద్భుత ప్రదర్శనతో పాయింట్ల పట్టికలో అగ్రస్థానంలో నిలిచిన ఆర్‌సీబీ.. క్వాలిఫైయర్-1లో గుజరాత్‌ను ఓడించి నేరుగా ఫైనల్‌కు దూసుకొచ్చింది. మరోవైపు, క్వాలిఫైయర్-2లో రాజస్థాన్ రాయల్స్ (RR)ను చిత్తు చేసిన గుజరాత్ టైటాన్స్ ఫైనల్స్ చేరింది. క్వాలిఫైయర్-1 ఓటమికి ప్రతీకారం తీర్చుకోవాలని గుజరాత్ భావిస్తుంటే, డిఫెండింగ్ ఛాంపియన్‌గా మరోసారి ఆధిపత్యం చెలాయించి వరుసగా రెండో ఏడాది కూడా ట్రోఫీని ముద్దాడాలని ఆర్‌సీబీ పట్టుదలతో ఉంది.

ఐపీఎల్ ప్రారంభ సీజన్ 2008 నుండి ఆడుతున్న రాయల్ ఛాలెంజర్స్ బెంగళూరు రికార్డు స్థాయిలో ఐదోసారి ఫైనల్‌కు చేరింది. కాగా, 2022లో లీగ్‌లోకి అడుగుపెట్టిన గుజరాత్ టైటాన్స్ కేవలం ఐదు సీజన్లలోనే మూడుసార్లు ఫైనల్‌కు చేరుకుని బలమైన శక్తిగా నిరూపించుకుంది. ఐపీఎల్ ఫైనల్ చరిత్రలో ఈ రెండు జట్లు ముఖాముఖి తలపడటం ఇదే తొలిసారి. వీరిద్దరి మధ్య ఇప్పటివరకు మొత్తం 9 మ్యాచ్‌లు జరగ్గా.. హోరాహోరీ పోరులో ఆర్‌సీబీ 5 విజయాలతో స్వల్ప ముందంజలో ఉండగా, గుజరాత్ 4 మ్యాచుల్లో గెలిచింది. గుజరాత్‌పై ఆర్‌సీబీ అత్యధిక స్కోరు 254 పరుగులు కాగా, దీనిని ఈ సీజన్ క్వాలిఫైయర్-1లోనే రజత్ పాటిదార్ సేన నమోదు చేసింది. అదే సమయంలో బెంగళూరుపై గుజరాత్ అత్యధిక స్కోరు 205 పరుగులు మాత్రమే. గత సీజన్ల రికార్డులను పరిశీలిస్తే 2022లో ఇరు జట్లు చెరో మ్యాచ్ నెగ్గాయి, 2023లో గుజరాత్ గెలవగా, 2024లో రెండు మ్యాచులను ఆర్‌సీబీ కైవసం చేసుకుంది. ఇక 2025లో జరిగిన ఏకైక మ్యాచ్‌లో గుజరాత్ టైటాన్స్ విజయం సాధించింది.

గుజరాత్ ఫ్యాన్స్‌ను టెన్షన్ పెడుతున్న 'క్వాలిఫైయర్-1' సెంటిమెంట్
ఐపీఎల్ 2026 ఎడిషన్‌లో ఈ రెండు జట్లు ఇప్పటికే మూడుసార్లు తలపడ్డాయి. ఏప్రిల్ 24న బెంగళూరులో జరిగిన తొలి మ్యాచ్‌లో విరాట్ కోహ్లీ (44 బంతుల్లో 81 పరుగులు) రాణించడంతో ఆర్‌సీబీ 5 వికెట్ల తేడాతో గెలిచింది. ఆ మ్యాచ్‌లో గుజరాత్ బ్యాటర్ సాయి సుదర్శన్ అద్భుత సెంచరీ వృధా అయింది. ఆ తర్వాత ఏప్రిల్ 30న అహ్మదాబాద్‌లో జరిగిన రెండో మ్యాచ్‌లో గుజరాత్ 4 వికెట్ల తేడాతో ప్రతీకారం తీర్చుకుంది. ఇక మూడోసారి అత్యంత కీలకమైన క్వాలిఫైయర్-1లో తలపడగా.. మొదట బ్యాటింగ్ చేసిన బెంగళూరు 254 పరుగుల భారీ స్కోరు సాధించింది. అనంతరం గుజరాత్‌ను 162 పరుగులకే ఆలౌట్ చేసి 92 పరుగుల రికార్డు తేడాతో ఆర్‌సీబీ ఫైనల్‌కు చేరింది.

ఈ మే 31న జరుగుతున్న ఫైనల్ మ్యాచ్‌పై క్రికెట్ వర్గాల్లో ఒక చారిత్రాత్మక సెంటిమెంట్ విపరీతంగా చర్చకు దారితీస్తోంది. ఐపీఎల్ చరిత్రలో గత కొన్నేళ్లుగా 'క్వాలిఫైయర్-1' మ్యాచ్‌లో గెలిచిన జట్టే లీగ్ విజేతగా (ట్రోఫీ విజేతగా) నిలుస్తూ వస్తోంది. ఈ అరుదైన మరియు బలమైన సెంటిమెంట్ ఇప్పుడు గుజరాత్ టైటాన్స్ అభిమానుల్లో తీవ్ర ఉత్కంఠను, టెన్షన్‌ను రేకెత్తిస్తోంది. మరి ఆర్‌సీబీ ఈ చారిత్రాత్మక సెంటిమెంట్‌ను నిజం చేస్తూ వరుసగా రెండోసారి కప్పు కొడుతుందా, లేక శుభ్‌మన్ గిల్ సారథ్యంలోని గుజరాత్ ఈ రికార్డును బ్రేక్ చేసి సరికొత్త చరిత్ర సృష్టిస్తుందా అనేది కొన్ని గంటల్లో తేలనుంది.

23:29 PM (IST) • 31 May 2026

IPL 2026 Final Live Updates: ఐపీఎల్ ఫైనల్లో గుజరాత్ మీద ఆర్సీబీ ఘన విజయం

IPL 2026 Final Live Updates: ఐపీఎల్ ఫైనల్లో గుజరాత్ టైటాన్స్ మీద ఆర్సీబీ 5 వికెట్ల తేడాతో ఘన విజయం సాధించింది. కోహ్లీ విన్నింగ్ షాట్ 6 కొట్టి గెలిపించాడు. కింగ్ కోహ్లీ 75 పరుగులతో నాటౌట్‌గా నిలిచాడు. దాంతో వరుసగా రెండో ఏడాది కప్ నెగ్గి మూడో జట్టుగా ఆర్సీబీ నిలిచింది. మరో 12 బంతులు మిగిలుండగానే 156 పరుగుల టార్గెట్ ఆర్సీబీ ఛేదించింది.

23:23 PM (IST) • 31 May 2026