Sachin Vs Kambli: సచిన్ తో విబేధాలపై స్పందించిన వినోద్ కాంబ్లీ.. కపిల్ సవాలుకు సై అన్న మాజీ క్రికెటర్

Sachin Tendulkar: సచిన్ చిన్ననాటి స్నేహితుడైన కాంబ్లీ.. భారత జట్టులోకి వెల్లువగా దూసుకొచ్చాడు. 2009లో సచినతో అతనికి విబేధాలు ఏర్పాడ్డాయి. 

యుక్త వయసులో సచిన్ తో కాంబ్లీ, ఇటీవల సచిన్ ను కలిసిన కాంబ్లీ

Source : X/OTHERS

Vinod Kambli: భారత మాస్టర్ బ్లాస్టర్ సచిన్ టెండూల్కర్ తో విభేదాలపై మాజీ క్రికెటర్ వినోద్ కాంబ్లీ మనసు విప్పాడు. 2009లో అతడిని తప్పుగా అర్థం చేసుకోవడం వల్లనే విభేధాలు వచ్చాయని తెలిపాడు. నిజానికి సచిన్ తనకెంతో సాయం చేశాడని పేర్కొన్నాడు. ఇటీవల తన ఆరోగ్యం చాలా దెబ్బతిందని కాంబ్లి చెప్పుకొచ్చాడు. యూరిన్ సమస్య రావడంతో చాలా ఇబ్బందులు ఎదుర్కొన్నట్లు పేర్కొన్నాడు. కోచ్ రామకాంత్ అచ్రేకర్ స్మారక కార్యక్రమం కోసం ఇటీవల సచిన్, కాంబ్లీ ఒకే వేదికను పంచుకున్నారు. అయితే కనీసం లేచి నిలబడలేని స్థితిలో కాంబ్లీ కనిపించడం అభిమానులకు షాక్ కు గురి చేసింది. బీసీసీఐ మాజీ క్రికెటర్లకు ఇచ్చే రూ.30 వేల పెన్షన్ పైనే బతుకు వెళ్ల దీస్తున్నట్లు వివరించాడు. అయితే కాంబ్లీ దీన స్థితిపై భారత మాజీ కెప్టెన్ కపిల్ దేవ్ స్పందించాడు. 

షరతు విధించిన కపిల్..
కాంబ్లీకి సాయం చేసేందుకు 1983 గెలిచిన భారత జట్టు సభ్యులంతా సిద్ధంగా ఉన్నామని, అయితే కాంబ్లీ ఒక షరతుకు ఒప్పుకోవాలని కపిల్ సూచించాడు. వెంటనే అతను రిహాబిలిటేషన్ సెంటర్ కు వెళ్లాలని కోరాడు. తాగుడు వ్యసనానికి బానిస కావడంతో కాంబ్లీ ఆరోగ్యం క్షీణించిదన్న ప్రచారం ఉంది.  తాజాగా దీనిపై కాంబ్లీ స్పందించాడు. తాను కపిల్ పెట్టిన షరతు ప్రకారం రిహబిలిటేషన్ సెంటర్ కు వెళ్లేందుకు సిద్ధంగా ఉన్నాని తెలిపాడు. ఇటీవల తన ఆరోగ్యం చాలా పాడైపోయిందని, తన భార్య దగ్గరుండి మరీ చూసుకుంటుందని వివరించాడు. ఇప్పటికే మూడు ఆస్పత్రులకు తనను తీసుకెళ్లిందని, మూత్రం ఆగకపోవడమనే సమస్యను తను ఎదుర్కొంటున్నట్లు వెల్లడించాడు. తన కుమారుడు క్రిస్టియానో, పదేళ్ల కూతురు నిత్యం తనను అంటి పెట్టుకుని చూసుకుంటున్నారని తెలిపాడు. 

గతంలో సచిన్ ఎంతో సాయం..
తన చిన్ననాటి స్నేహితుడు సచిన్ ను తాను అపార్థం చేసుకున్నట్లు కాంబ్లీ వెల్లడించాడు. నిజానికి సచిన్ తనకెంతో సాయం చేశాడని, రెండుసార్లు హాస్పిటల్ బిల్లులు కూడా చెల్లించినట్లు తెలిపాడు. ఒకదశలో సచిన్ తన కోసం ఏమీ చేయలేదని నిరాశపడ్డానని, అయితే తనకోసం చేయాల్సిందంతా సచిన్ చేశాడని వివరించాడు. కెరీర్ సమయంలో ఎలా ఆడాలో సచిన్ చెప్పేవాడని గుర్తు చేసుకున్నాడు. తన ప్రొత్సాహం వల్లే జట్టులోకి తొమ్మిది సార్లు కంబ్యాక్ చేసినట్లు వెల్లడించాడు. క్రికెటర్లకు గాయాలు ఆటలో సహజమని, వాటిని తట్టుకుని ముందుకు వెళ్లినవారే నిలబడుతారని పేర్కొన్నాడు.

వాంఖడే వేదికగా తను చేసిన డబుల్ సెంచరీని ఎప్పటికీ మర్చిపోలేనని కాంబ్లీ తెలిపాడు. ఆ సమయంలో అచ్రేకర్ సర్ తనతో ఉండేవారని, క్రికెట్లో ముత్తయ్య మురళీధరన్ తో పోటీ పడేవాణ్ని అని, ఆ యుద్ధం సరదాగా ఉండేదని చెప్పుకొచ్చాడు. 1991-2000 మధ్య అంతర్జాతీయ క్రికెట్ ఆడిన కాంబ్లీ.. 17 టెస్టులు, 104 వన్డేలు ఆడాడు. 17 టెస్టుల్లో 54 సగటుతో 1084 పరుగులు చేశాడు. ఇందుల నాలుగు సెంచరీలు ఉండగా, అత్యధిక స్కోరు 227. ఇక 104 వన్డేల్లో 32.59 సగటుతో 2477 పరుగులు చేశాడు. ఇందులో రెండు సెంచరీలు ఉండగా, అత్యధిక స్కోరు 106 కావడం విశేషం.