SA vs IND 2023: సఫారీలతో వన్డే సవాల్‌, రాహుల్‌ సారథ్యంలో భారత్‌ సిద్ధం

India vs South Africa : దక్షిణాఫ్రికా పర్యటనలో టీ-20 సిరీస్‌ను సమం చేసిన భారత్.. ఇప్పుడు వన్డే సమరానికి సిద్ధమైంది. ఆదివారం జొహన్నెస్‌బర్గ్‌లోని ది వాండరర్స్ స్టేడియంలో తొలి వన్డే జరగనుంది.

సఫారీలతో వన్డే సవాల్‌ ( Image Source : Twitter )

దక్షిణాఫ్రికా పర్యటనలో టీ-20 సిరీస్‌ను సమం చేసిన భారత్.. ఇప్పుడు వన్డే సమరానికి సిద్ధమైంది. ఆదివారం జొహన్నెస్‌బర్గ్‌లోని ది వాండరర్స్ స్టేడియంలో తొలి వన్డే జరగనుంది. కేఎల్ రాహుల్‌ నేతృత్వంలోని యువ భారత్‌ మూడు వన్డేల సిరీస్‌ను  విజయంతో ఆరంభించాలని పట్టుదలతో ఉంది. వన్డే ప్రపంచకప్‌ తర్వాతటీమిండియా ఆడే తొలి వన్డే సిరీస్‌ ఇదే కావడంతో మ్యాచ్‌పై ఆసక్తి నెలకొంది. ఈ మ్యాచ్‌లో గెలిచి వన్డే సిరీస్‌లో శుభారంభం చేయాలని పట్టుదలగా ఉన్నాయి. వికెట్‌ కీపర్‌ కేఎల్‌ రాహుల్ సారథ్యంలోని భారత్‌ విజయంతో సిరీస్‌ను ఆరంభించాలని చూస్తోంది. మెుదటి వన్డే జరిగే వాండరర్స్ పిచ్‌ బ్యాటింగ్‌కు అనుకూలించే అవకాశం ఉండడంతో భారీ స్కోర్లు నమోదయ్యే అవకాశం ఉంది. వర్ష ప్రభావ సూచనలు ఉండటంతో మ్యాచ్‌ ఆలస్యంగా ప్రారంభం కావచ్చు. వాండరర్స్‌ మైదానంలో భారత్‌ రికార్డు అంత గొప్పగా ఏమీ లేదు. ఇక్కడ ఎనిమిది వన్డేలు ఆడిన టీమిండియా కేవలం మూడు మ్యాచ్‌ల్లో గెలిచి.. ఐదింట్లో పరాజయం చవిచూసింది. ఈ మైదానంలో అతిథ్య జట్టు ఘనమైన రికార్డు ఉండటం టీమిండియాను కలవరపెడుతోంది.

 

స్వదేశంలో జరిగిన ప్రపంచ కప్పులో అద్భుతంగా రాణించిన కేఎల్‌ రాహుల్ ఫామ్‌లో ఉండటం జట్టుకు సానుకూలాంశం. రాహుల్‌, శ్రేయస్‌ అయ్యర్‌, కులీదీప్‌ మినహా వన్డే ప్రపంచకప్పులో బరిలోకి దిగిన ఆటగాళ్లకు ఈ సిరీస్‌లో విశ్రాంతినిచ్చారు. ప్రధాన ఆటగాళ్ల గైర్హాజరీలో కుర్రాళ్ల ప్రదర్శనపైనే విజయావకాశాలు ఆధారపడి ఉన్నాయి. గత ఐపీఎల్‌లో గుజరాత్‌ టైటాన్స్‌ తరఫున రాణించిన సాయి సుదర్శన్‌తో కలిసి రుతురాజ్‌ గైక్వాడ్‌తో ఆరంభించే అవకాశం ఉంది. తిలక్‌ వర్మ, రజత్‌ పటీదార్‌, శ్రేయస్‌ అయ్యర్, సంజూ శాంసన్, కేఎల్‌ రాహుల్, రింకు సింగ్‌లతో బ్యాటింగ్‌ విభాగం బలంగా కనిపిస్తోంది. టీ-20 సిరీస్‌లో రాణించిన రింకు సింగ్‌పై భారీ అంచనాలు ఉన్నాయి. అటు మార్‌క్రమ్  నేతృత్వంలోని సఫారీ జట్టు హిట్టర్లతో నిండిపోయింది. రీజా హెండ్రిక్స్‌,వాండర్‌ డసెన్, డేవిడ్‌ మిల్లర్‌, క్లాసన్‌లతో బ్యాటింగ్‌ విభాగం దుర్బేధ్యంగా కనిపిస్తోంది.

 

తండ్రి అనారోగ్యం కారణంగా పేస్‌ బౌలర్‌ దీపక్ చాహర్‌ దూరంకావడం బౌలింగ్‌ విభాగానికి ఎదురుదెబ్బ. అతడి స్థానంలో ఆకాశ్‌ దీప్‌ను సెలక్షన్ కమిటీ ఎంపిక చేసింది. టీ-20 సిరీస్‌లో విఫలమైన ముకేశ్‌ కుమార్‌, అర్ష్‌దీప్‌ సింగ్‌లకు.... జట్టులో చోటు పదిలం కావాలంటే.... వన్డేల్లో సత్తా చాటాలి.  అవేశ్‌ ఖాన్, ఆకాశ్‌ దీప్‌లో ఒకరు తుది జట్టులో ఉండే అవకాశం ఉంది. కుల్‌దీప్, చాహల్‌ల ద్వయం... స్పిన్ బాధ్యతలను పంచుకోనున్నారు. స్పిన్‌ ఆల్‌రౌండర్‌లు అక్షర్ పటేల్, వాషింగ్టన్ సుందర్‌లో ఒకరికే తుది జట్టులో చోటు దక్కనుంది. మరోవైపు స్టార్‌ పేసర్లు కగిసో రబడా, లుంగి ఎంగిడి లేకపోవడంతో సఫారీ బౌలింగ్‌ విభాగం బలహీనంగా కనిపిస్తోంది. కేశవ్ మహారాజ్‌, షంసీలతో  స్పిన్‌ విభాగం బలంగా ఉన్నా పేస్‌ విభాగం బలహీనంగా ఉంది.

 

భారత జట్టు: కేఎల్ రాహుల్ (కెప్టెన్), రుతురాజ్ గైక్వాడ్, సాయి సుదర్శన్, తిలక్ వర్మ, రజత్ పాటిదార్, రింకూ సింగ్, శ్రేయస్ అయ్యర్, సంజు శాంసన్ , అక్షర్ పటేల్, వాషింగ్టన్ సుందర్, కుల్దీప్ యాదవ్, యుజ్వేంద్ర చాహల్, ముఖేష్ కుమార్, అవేష్ ఖాన్, అర్ష్‌దీప్‌ సింగ్, ఆకాష్ దీప్.

 

దక్షిణాఫ్రికా జట్టు: ఐడెన్ మాక్రమ్‌, ఒట్నీల్ బార్ట్‌మన్, నాండ్రే బర్గర్, టోనీ డి జోర్జి, రీజా హెండ్రిక్స్, హెన్రిచ్ క్లాసెన్, కేశవ్ మహరాజ్, మిహ్లాలీ మ్పోంగ్వానా, డేవిడ్ మిల్లర్, వియాన్ ముల్డర్, ఆండిలే ఫెహ్లుక్వాయో, తబ్రైజ్ షంసీ, ర్లీస్ వాన్డర్, రస్సీ వాన్డర్ , లిజాడ్ విలియమ్స్.