Anil Kumble-Virat Kohli rift: కుంబ్లే వల్లే డ్రస్సింగ్‌ రూమ్‌లో భయానక వాతావరణం: బీసీసీఐ మాజీ అధికారి వెల్లడి

డ్రస్సింగ్‌ రూమ్‌లో కోచ్‌ అనిల్‌ కుంబ్లేపై కెప్టెన్‌ విరాట్‌ కోహ్లీదే పైచేయిగా ఉండేదని బీసీసీఐ మాజీ అధికారి రత్నాకర్‌ శెట్టి అన్నారు. ఆటగాళ్లకు అతడు మద్దతుగా నిలవకపోవడంతో ఆందోళన మొదలైందని పేర్కొన్నారు.

అనిల్‌ కుంబ్లే, విరాట్‌ కోహ్లీ

టీమ్‌ఇండియా డ్రస్సింగ్‌ రూమ్‌లో కోచ్‌ అనిల్‌ కుంబ్లేపై కెప్టెన్‌ విరాట్‌ కోహ్లీదే పైచేయిగా ఉండేదని బీసీసీఐ మాజీ అధికారి రత్నాకర్‌ శెట్టి అన్నారు. ఆటగాళ్లకు అతడు మద్దతుగా నిలవకపోవడంతో ఆందోళన మొదలైందని పేర్కొన్నారు. అందువల్లే వారిద్దరి మధ్య విభేదాలు తలెత్తాయని వెల్లడించారు. ఈ సంఘటలన్నీ కుంబ్లే రాజీనామాకు దారితీశాయని వివరించారు. ఇవన్నీ ఆయన పుస్తకం 'ఆన్‌బోర్డ్‌: టెస్టు, ట్రయల్‌, ట్రయంప్‌, మై ఇయర్స్‌ ఇన్ బీసీసీఐ'లో వివరించారు.

'2017 ఐసీసీ ఛాంపియన్స్‌ ట్రోఫీలో పాక్‌ చేతిలో టీమ్‌ఇండియా ఘోర పరాజయం తర్వాత అనిల్‌ కుంబ్లే రాజీనామా చేశారు. ఇవన్నీ భారత క్రికెట్లో క్రమంగా పెరుగుతున్న మూర్ఖత్వపు ఛాయలను ఎత్తి చూపించాయి' అని రత్నాకర్‌ శెట్టి అన్నారు. ఆటగాళ్లకు మద్దతుగా నిలవకపోవడం, డ్రస్సింగ్‌ రూమ్‌లో ఆందోళనకర వాతావరణం పెంచడంతో కుంబ్లేపై విరాట్‌ అసంతృప్తిగా ఉన్నాడని తెలిపారు.

'అనిల్‌ కుంబ్లే కోచ్‌గా కొనసాగేందుకు కొందరు ఇష్టపడటం లేదనడంలో సందేహమే లేదు. ఎందుకంటే కెప్టెన్‌, కోచ్‌ ఒకేతాటిపై లేరు. చూస్తుంటే కెప్టెన్‌దే పైచేయిగా అనిపించింది. ఐసీసీ ఛాంపియన్స్‌ ట్రోఫీలో పాక్‌ చేతిలో ఓటమికి ముందు లండన్‌లో ఓ సమావేశం జరిగిందని నాకు తెలిసింది. దానికి విరాట్‌, అనిల్‌, జోహ్రీ, అమితాబ్‌ చౌదరి, డాక్టర్‌ శ్రీధర్‌ హాజరయ్యారు. అప్పుడు ఆటగాళ్లకు అండగా నిలవకుండా, డ్రస్సింగ్‌ రూమ్‌లో ఆందోళనకర వాతావరణం సృష్టించినందుకు కుంబ్లేపై విరాట్‌ అసంతృప్తి వ్యక్తం చేశాడు' అని రత్నాకర్‌ శెట్టి రాశారు.

ఆ ఏడాది ఐసీసీ ఛాంపియన్స్‌ ట్రోఫీలో వరుస విజయాలు సాధించిన టీమ్‌ఇండియా ఫైనల్లో ఘోరంగా ఓడిపోయింది. ఆ తర్వాత భారత క్రికెట్లో అనూహ్య పరిణామాలు మొదలయ్యాయి. అనిల్‌ కుంబ్లే, విరాట్‌ మధ్య విభేదాలు ఉన్నాయన్న వార్తలు బయటకు వచ్చాయి. వారిద్దరి మధ్య సయోధ్య కుదిర్చేందుకు గంగూలీ, సచిన్‌, లక్ష్మణ్‌ చేసిన ప్రయత్నాలు సఫలం కాలేదు. కోహ్లీతో తనకు అభిప్రాయ బేధాలు ఉన్నాయని కుంబ్లే రాజీనామా చేశాడు. ఆ తర్వాత రవిశాస్త్రి కోచ్‌గా వచ్చాడు.