Chanakya Niti : పిల్లల భవిష్యత్ బాగుండాలంటే చాణక్యుడు చెప్పిన సూచ‌న‌లివే
Chanakya Niti : పిల్లలు ప్ర‌యోజ‌కులుగా మారాలంటే, వారి భవిష్యత్ బంగారుమ‌యం కావాలంటే తల్లిదండ్రులు ఎలా పెంచాలో చాణక్యుడు స్ప‌ష్టంగా తెలిపాడు.
Chanakya Niti : ఆచార్య చాణక్యుడు మనకు ఎన్నో విషయాలు చెప్పాడు. మన జీవితంలో ఎదురయ్యే ప్రతిబంధకాలను ఎలా దాటాలో కూడా సూచించాడు. ఆనాడు ఆయ‌న చెప్పిన విషయాలు ఈనాడు మన జీవితాల‌కు సరిగా సరిపోతున్నాయి. ఆయ‌న సూచనలు, సలహాలు మన జీవన మార్గానికి బాసటగా నిలుస్తున్నాయి. జీవితంలో మనం ఎలా ముందుకెళ్లాలి? ఎలాంటి నిర్ణయాలు తీసుకోవాలి? ఎలా నడుచుకోవాలో చాణక్యుడు చ‌క్క‌గా వివరించాడు. పిల్లలు ప్ర‌యోజ‌కులుగా మారాలంటే, వారి భవిష్యత్ బంగారుమ‌యం కావాలంటే తల్లిదండ్రులు ఎలా పెంచాలో స్ప‌ష్టంగా తెలిపాడు. ఆ సూచ‌న‌ల‌ను ఖ‌చ్చితంగా పాటిస్తే మన సంతానం సన్మార్గంలో నడవటం ఖాయమ‌ని వివరించాడు.
సంస్కారం అత్యంత ముఖ్యం
సంస్కారం లేని వాడు వాసన లేని పువ్వు లాంటి వాడు. సంస్కారం లేని వ్య‌క్తికి స‌మాజంలో విలువ ఉండదు. మనిషిలో ఉండే సంస్కారమే అతడిని ఉన్నతంగా తీర్చిదిద్దుతుంది. పిల్లలను పెంచే క్రమంలో వారికి సంస్కారం అలవాటు చేయాలి. ఎదుటి వారితో మనం ప్రవర్తించే తీరునే సంస్కారం అంటారు. సంస్కారం కరువైతే అందరు దూరమవుతారు. మంచి సంస్కారంతో ఉంటే అందరు దగ్గరకొస్తారు. నోరు మంచిదైతే ఊరు మంచిదవుతుందన్నట్లు పిల్లవాడి నైతిక ప్రవర్తన మీదే అతని సంస్కారం ఆధారపడి ఉంటుంది.
విద్యతోనే భవిష్యత్
విద్య లేని వాడు వింత పశువు అన్నారు. విద్యతోనే వినయం కలుగుతుంది. అందుకే అందరూ చదువుకోవాలి. అది మన భ‌విష్య‌త్‌కు ఉపయోగపడాలి. సరిగా చదువుకోకపోతే మనకు విజ్ఞానం ఉండదు. దీంతో తెలివితేటలు ఉండవు. మంచి విద్యావంతుడు అయితేనే గుణవంతుడుగా మారతాడు. విద్య లేకపోతే ఏమి ఉండదు. భవిష్యత్ అంధకారమే. అందుకే అందరూ చదువుకోవాలి. తల్లిదండ్రుల గౌరవం నిలబెట్టాలి. అప్పుడే స‌మాజంలో స‌మున్న‌త స్థానంలో నిలుస్తారు.
అదుపులో ఉంచాలి
పిల్లలను అతిగా ముద్దుచేసి, గారాబం చేయడం మంచిది కాద‌ని చాణక్యుడు ఆనాడే చెప్పాడు. పిల్లలను తల్లిదండ్రులు తమ అదుపులో ఉంచాల‌ని, వారి అదుపులోకి వెళ్లకూడద‌ని స్ప‌ష్టంచేశాడు. సంతానాన్ని లాలించే సమయంలో లాలించాలి. దండించే దండించాలి. అప్పుడే వారికి భ‌విష్య‌త్‌పై ఓ అవగాహన వస్తుంది. అంతేకాని ఒకడే కొడుకు అని ఒకతే కూతురు అని అతిగా గారాబం చేస్తే వారు ఎందుకు పనికి రాకుండా పోతారు. బ్లాక్ మెయిల్‌కు చేసి త‌ల్లిదండ్రుల‌తోనే అన్ని పనులు చేయించుకుంటారు. మొండిగా ఉండే పిల్లలను సైతం తమ దారికి తెచ్చుకుని, తమ మాట వినేలా తల్లిదండ్రులు చేసుకోవాలి.
పనులు అప్పగించాలి
పిల్లలకు అప్పుడప్పుడు కొన్ని పనులు అప్పగించాలి. చిన్న‌చిన్న పనులు అప్ప‌గించ‌డం ద్వారా వారి కార్య‌ద‌క్ష‌త తల్లిదండ్రులు గుర్తించే అవ‌కాశం ఉంటుంది. అయితే అప్పగించిన పనులు ఎలా చేస్తున్నారో తల్లిదండ్రులు గమనించాలి. ఎలాంటి ఆటంకాలు లేకుండా త‌మ‌కు అప్పగించిన పనులు పిల్లలు పూర్తి చేస్తే మంచిదే. కానీ చెప్పిన పని చేయకుండా ఇతర పనులు చేస్తే కచ్చితంగా దారిలో పెట్టాలి. అప్పగించిన పనులు సరిగా చేసేలా చూడాలి. చిన్నప్పటి నుంచే వారిని ఇలా గాడిలో పెడితే పెరిగాక ఎలాంటి సమస్యలు లేకుండా తన పనులు తాము చేసుకుంటే త‌ల్లిదండ్రుల‌కు కూడా ముచ్చటగా ఉంటుంది. ఇలా ఆచార్య చాణక్యుడు పిల్లల పెంపకంలో తల్లిదండ్రులు తీసుకోవాల్సిన జాగ్రత్తల గురించి వివరించాడు.
టాప్ హెడ్ లైన్స్
ట్రెండింగ్ వార్తలు
