Ramayana : శ్రీ‌ రాముడి విల్లు పేరు, విశిష్టత ఏంటో తెలుసా

Ramayana : శ్రీ‌రాముడు త‌న విల్లును ఉప‌యోగించి చాలా మంది రాక్ష‌సులను సంహ‌రించాడు. ఆయన విల్లు ఎంతో అద్భుత‌మైన‌ది. రాముడి విల్లు, రాముడి విలువిద్య ప్రాముఖ్యత గురించి ఈ విష‌యాలు మీకు తెలుసా..?

శ్రీ‌ రాముడి విల్లు పేరు, విశిష్టత ఏంటో తెలుసా? (Representational Image/freepik)

Ramayana : రామాయణంలో రామ‌- రావణ యుద్ధం గురించి ప్రస్తావించినప్పుడు, శ్రీ‌రామచంద్ర‌మూర్తి విలువిద్య నైపుణ్యం కూడా ప్రస్తావించారు. రాముని వద్ద ఉన్న విల్లు ఒక అద్భుతమైన‌ద‌ని వ‌ర్ణించారు. దాని పేరు అది ఎలా తయారు చేశారో మీకు తెలుసా?

శ్రీ‌రాముడు ఆయ‌న‌ ముగ్గురు సోదరులకు వారి గురువు వశిష్ఠుడు ఇతర ఆయుధాలతో పాటు విల్లు- బాణాలను ప్ర‌యోగించడం నేర్పించారు. తర్వాత గురుకులాల్లో వారు ఈ విద్యను అభ్యసించారు. సాధారణంగా విలుకాళ్లంద‌రూ వారి సొంత విల్లులను తయారు చేసుకుంటారు. వారికి విల్లులు తయారు చేసే జ్ఞానం, కళ కూడా తెలుసు. రాముని విల్లు గురించి మీకు తెలియ‌ని కొంత సమాచారం ఇప్పుడు తెలుసుకుందాం.

రాముని విల్లు పేరు
తనతో పాటు విల్లును మోసిన ప్రతి గొప్ప విలుకాడు కొన్ని ప్రత్యేక లక్షణాలను కలిగి ఉన్నాడు. ఆయనకు ప్రత్యేక పేరు కూడా ఉంది. పురాతన కాలంలో, విలుకాళ్లంద‌రూ ఎల్లప్పుడూ తమ విల్లు, బాణాలను తమ వద్ద ఉంచుకునేవారు. శ్రీ‌రాముని విల్లును కోదండం అంటారు. ఇది చాలా ప్రసిద్ధి చెందిన విల్లు. అందుకే శ్రీరాముడిని కోదండపాణి అని కూడా అంటారు. 'కోదండ' అంటే వెదురుతో చేసినది అని అర్థం. ఈ విల్లును ఎవరూ ఎత్తలేరు.

ఈ విల్లు నుంచి సంధించిన బాణం, ఎదురుగా ఉన్న ల‌క్ష్యాన్ని ఛేదించకుండా తిరిగి రాదు. పురాణాల ప్రకారం, ఒకప్పుడు, దేవరాజు ఇంద్రుని కుమారుడు జయంతుడు, శ్రీరాముని బలాన్ని పరీక్షించడానికి అహంకారంతో కాకి రూపాన్ని ధరించాడు. ఈ కాకి సీతాదేవి కాలికి గాయం చేసి అక్కడి నుంచి ఎగరడం ప్రారంభించింది. దీంతో ఆ కాకిని చంపడానికి రాముడు తన విల్లు నుంచి బాణం సంధించినప్పుడు, ఇంద్రుని కుమారుడు జయంతుడు భయపడ్డాడు. త‌న‌ను ఎవరూ రక్షించలేర‌ని తెలుసుకుని రాముని వద్దకు వెళ్లి క్షమించమని అడుగుతాడు. అప్పుడు రాముడు అతనిని క్షమించి పంపిస్తాడు.

శ్రీరాముడు ఉత్తమ విలుకాడు
ఈ విల్లు సహాయంతో రాముడు సముద్రంపై బాణాలు వేసి నీటిని తగ్గించి లంకకు వెళ్లేందుకు మార్గం సుగ‌మం చేశాడు. ఈ విల్లు- బాణంతో, వనవాసంలో ఉన్నప్పుడు ఆయ‌న‌ చాలా మంది రాక్షసులను సంహ‌రించాడు. దాని సహాయంతో రావణుని సైన్యాన్ని మ‌ట్టుబెట్టాడు. రాముడు త‌న‌ కాలంలో ప్రసిద్ధ విలుకాడు. ఆయ‌న‌ తప్ప వేరెవరూ కోదండాన్ని తాకలేరు.

స్థిర శక్తిని గతి శక్తిగా మార్చడం
మనం శాస్త్రీయంగా చూస్తే, విల్లు అనేది మనిషి మొదటి ఆవిష్కరణ, ఇది శక్తిని సేకరించడానికి ఉపయోగించబడింది. ఇది బాణం  స్థిర శక్తిని గతి శక్తిగా మార్చి, విపరీతమైన వేగాన్ని ఇచ్చింది. దీనిని దూరంలో ఉన్న జీవుల‌ను వేటాడ‌టానికి ఉపయోగించారు. ఆధునిక విల్లులు, బాణాలు ఇప్పటికీ అనేక దేశాలలో ఆయుధాలుగా ఉపయోగంలో ఉన్నాయి. ఆధునిక క్రీడలలో విలువిద్య ఇప్పటికీ కొన‌సాగుతోంది. పురాతన కాలంలో ప్రపంచంలోని అన్ని ప్రాంతాలలో మానవులు దీనిని విస్తృతంగా ఉపయోగించారు.

వేల సంవత్సరాల నుంచి వాడుక
విల్లు వేల సంవత్సరాల క్రితం కనుగొన్నారు. దీనిని మొదట భారతదేశంలోనే కనుగొన్నార‌ని విశ్వ‌సిస్తారు. ఆ తరువాత ఇరాన్ అనంత‌రం ఇతర దేశాలలో దాని వినియోగించ‌డం ప్రారంభ‌మైంది. పూర్వ‌ కాలంలో సైనిక దళాలను ధనుర్వేదాలు అని పిలిచేవారు. ఇది ఆ రోజుల్లో యుద్ధంలో విల్లు-బాణం ప్రాముఖ్యతను వివరిస్తుంది. ఒక మంచి విలుకాడు తన విల్లు నుంచి 200 నుంచి 250 గజాల దూరం వరకు బాణం వేయగలడని చెబుతారు.

విల్లులు దేనితో తయార‌వుతాయి
విల్లు సాధారణంగా ఇనుము, కొమ్ము, చెక్కతో తయారు చేస్తారు. కానీ, ఇప్పుడు కార్బన్‌ని ఉపయోగించి చాలా తేలికగా తయారు చేస్తున్నారు. విల్లు తీగ వెదురు లేదా ఇతర చెట్ల కొమ్మ‌ల‌తో తయారు చేసేవారు. విల్లు సుమారు 6 అడుగుల పొడవు ఉండగా, చిన్న విల్లు అయితే నాలుగున్నర అడుగుల పొడవు ఉంటుంది. చాణక్యుడి నీతితో ప్రారంభించి చాలా గ్రంథాలు విల్లుల గురించి రాశాయి.

అర్జునుడి విలువిద్య
అర్జునుడి ప్రసిద్ధ గాండీవం వెదురుతో తయారు చేసిన‌ట్టు చెబుతారు. కర్ణుడి విల్లు పేరు విజయ. పరశురాముడు కర్ణునికి ఈ విల్లును బహుమతిగా ఇచ్చాడు. శ్రీకృష్ణుడి విల్లు పేరు 'సారంగ్‌'. సారంగ్ అంటే రంగు రంగుల, అందమైన అని అర్థం. శ్రీకృష్ణుని ఈ విల్లు కొమ్ముతో చేసినదని చెబుతారు.

Disclaimer: ఇక్కడ అందించిన సమాచారం కేవలం మత విశ్వాసాల మీద ఆధారపడి సేకరించింది మాత్రమే. దీనికి సంబంధించిన శాస్త్రీయ ఆధారాలకు సంబంధించి ‘ఏబీపీ దేశం’ ఎలాంటి భాధ్యత తీసుకోదు. ఈ సమాచారాన్ని పరిగణనలోకి తీసుకునే ముందు పండితులను సంప్రదించి పూర్తి వివరాలు తెలుసుకోగలరు. ‘ఏబీపీ దేశం’, ‘ఏబీపీ నెట్‌వర్క్’ ఈ విషయాలను ధృవీకరించడం లేదని గమనించగలరు.