CPI Narayana Vs Nagababu : సీపీఐ నారాయణ గడ్డి తింటున్నాడు - చిరంజీవిపై కామెంట్లకు నాగబాబు ఘాటు రియాక్షన్ !

చిరంజీవిపై నారాయణ చేసిన కామెంట్లకు నాగబాబు కౌంటర్ ఇచ్చారు. ఆయన అన్నం తినడం మానేసి గడ్డి తింటున్నారని మండిపడ్డారు.

సీపీఐ నారాయణపై నాగబాబు ఫైర్

CPI Narayana Vs Nagababu :  సీపీఐ సీనియర్ నేత నారాయణపై జనసేన నేత నాగబాబు మండిపడ్డారు.  సిపిఐ నారాయణ అనే వ్యక్తి చాలా కాలం నుండి అన్నం తినడం మానేసి కేవలం ఎండి గడ్డి మరియు చెత్తా చెదారం తింటున్నాడు.. అతనితో గడ్డి తినడం మాన్పించి...కాస్త అన్నం పెట్టండి ... అని సలహా ఇచ్చారు. నాగబాబు ట్వీట్ కూడా వైరల్ అవుతోంది. 

ఇటీవలి కాలంలో మెగా అభిమానులు మరియు జనసైనికులు కొంత మంది చేసిన తెలివితక్కువ
వెర్రి వ్యాఖ్యలపై ఆగ్రహం వ్యక్తం చేస్తున్నారు

కానీ మన కుర్రాళ్ళకి నేను చెప్పదలుచుకొందేంటంటే
ఈ సిపిఐ నారాయణ అనే వ్యక్తి చాలా కాలం నుండి అన్నం తినడం మానేసి కేవలం ఎండి గడ్డి మరియు చెత్తా చెదారం తింటున్నాడు..

— Naga Babu Konidela (@NagaBabuOffl) July 19, 2022

సీపీఐ నారాయణపై నాగబాబు ఈ స్థాయిలో విరుచుకుపడటానికి కారణం... సోమవారం చిరంజీవిపై సీపీఐ నారాయణ వ్యాఖ్యలు. అల్లూరి సీతారామరాజు విగ్రహావిష్కరణ కార్యక్రమానికి అల్లూరి సీతారామరాజుగా నటించి ప్రేక్షకులకు అల్లూరిని పరిచయం చేసిన సూపర్ స్టార్ కృష్ణను పిలవకుండా చిల్లర బేరగాడు చిరంజీవిని స్టేజి మీదకు తీసుకువచ్చి పక్కన కూర్చోబెట్టుకున్నారని విమర్శించారు. 

టీడీపీ, వైఎస్ఆర్‌సీపీని కూడా రాష్ట్రపతి ఎన్నికల్లో బీజేపీకి మద్దతు ఇచ్చినందుకు విమర్శించారు. అయితే చిరంజీవి గురించి చేసిన వ్యాఖ్యలు హైలెట్ అయ్యాయి. ఈ మాటలు సహజంగానే మెగా ఫ్యాన్స్‌ను ఆగ్రహానికి గురి చేశాయి. ఉదయం నుంచి మెగా ఫ్యాన్స్ సోషల్ మీడియాలో తిట్ల దండకం అందుకున్నారు. సాయంత్రానికి నాగబాబు కూడా ట్వీట్ చేశారు. 

నారాయణ ఇలా ప్రత్యర్థి రాజకీయ పార్టీ నేతలపై ఘాటు వ్యాఖ్యలు చేస్తూనే ఉంటారు. విమర్శలు ఎదుర్కొంటూనే ఉంటారు. అయితే ప్రస్తుతం చిరంజీవి రాజకీయాల్లో లేరు. ప్రత్యక్ష రాజకీాయల నుంచి విరమించుకున్నానని ఆయన నేరుగానే చెప్పారు. రాజకీయాల్లో లేని చిరంజీవిపై నారాయణ ఇలాంటి వ్యాఖ్యలు చేయడం కరెక్ట్ కాదని ఆయన అభిమానులు అంటున్నారు.  తన వ్యాఖ్యలపై వస్తున్న విమర్శలపై సీపీఐ నారాయణ ఇంకా స్పందించలేదు.