Vladimir Putin: 'మా జోలికొస్తే తరిమికొడతాం'- విక్టరీ డే పరేడ్‌లో పుతిన్ వార్నింగ్

Vladimir Putin: మాతృభూమిని కాపాడటం కోసమే ఉక్రెయిన్‌పై యుద్ధం చేస్తున్నట్లు రష్యా అధ్యక్షుడు వ్లాదిమిర్ పుతిన్ అన్నారు.

'మా జోలికొస్తే తరిమికొడతాం'- విక్టరీ డే పరేడ్‌లో పుతిన్ వార్నింగ్

Vladimir Putin: రష్యా విక్టరీ డే సందర్భంగా ఉక్రెయిన్‌ యుద్ధంపై కీలక వ్యాఖ్యలు చేశారు అధ్యక్షుడు వ్లాదిమిర్ పుతిన్. ఉక్రెయిన్ మాతృభూమిని కాపాడటం కోసమే ఈ యుద్ధం చేస్తున్నట్లు పుతిన్ పేర్కొన్నారు. రష్యా రాజధాని మాస్కోలో విక్టరీ డే సందర్భంగా పుతిన్ ప్రసంగించారు.

" ఉక్రెయిన్‌లో పశ్చిమ దేశాల దురాక్రమణను నివారించేందుకే ఈ ప్రత్యేక సైనిక చర్య చేపట్టాం. ఉక్రెయిన్ సమగ్రత, భద్రతను కాపాడేందుకు రష్యా బలగాలు ఎప్పుడూ సిద్ధంగా ఉంటాయి. నియో నాజీలతో పొంచి ఉన్న ముప్పు నుంచి 'మాతృభూమి'ని రక్షించుకోవడం కోసమే ఉక్రెయిన్‌లో రష్యా సేనలు పోరాడుతున్నాయి.                                                                          "

-  వ్లాదిమిర్ పుతిన్, రష్యా అధ్యక్షుడు

విక్టరీ డే

రెండో ప్రపంచ యుద్ధంలో నాజీ జర్మనీ ఓటమికి గుర్తుగా రష్యాలో ప్రతి ఏటా  మే 9న 'విక్టరీ డే' పేరుతో భారీగా ఉత్సవాలు నిర్వహిస్తుంటారు. ఈ ఏడాది కూడా మాస్కోలని రెడ్‌ స్క్వేర్‌ వద్ద పరేడ్‌ను చేపట్టారు. ఈ సందర్భంగా యుద్ధంలో ప్రాణాలు కోల్పోయిన రష్యన్‌ సైనికులకు ఆయన నివాళులర్పించారు.

అర గంటలో

రష్యా విక్టరీ డే వేడుకల వేళ ఆ దేశ నేతల వ్యాఖ్యలు ప్రపంచాన్నే కలవర పెడుతున్నాయి. తాజాగా రష్యా అంతరిక్ష సంస్థ రోస్కోస్మోస్ చీఫ్ దిమిత్రి రోగోజిన్ సంచలన వ్యాఖ్యలు చేశారు. తాము కనుక అణు యుద్ధం ప్రారంభిస్తే నాటో దేశాలన్నీ కేవలం అరగంటలో పూర్తిగా ధ్వంసమైపోతాయని ఆయన హెచ్చరించారు.

" శత్రువు (పశ్చిమ దేశాలు)ను ఓడించడమే పుతిన్ లక్ష్యం. నాటో మాపై అనవసరంగా కయ్యానికి కాలు దువ్వుతోంది. మేం కనుక అణు యుద్ధం ప్రారంభిస్తే నాటో దేశాలన్నీ అర గంటలోనే ధ్వంసమైపోతాయి. మాకు ఆ సామర్థ్యం ఉన్నప్పటికీ ప్రస్తుతానికి ఆ ఉద్దేశం లేదు. ఎందుకంటే అణు యుద్ధం కారణంగా ప్రపంచ పరిణామాలతో పాటు భూమి వాతావరణమే మారిపోతుంది. అది మాకు ఇష్టం లేదు. అందుకే శత్రువును ఆర్థిక, సైనిక చర్యలు, సంప్రదాయ యుద్ధాలతోనే ఓడిస్తాం.                                       "

-దిమిత్రి రోగోజిన్‌, రష్యా స్పేస్ ఏజెన్సీ చీఫ్