VP Poll Result: జగదీప్ ధన్‌ఖడ్‌కు శుభాకాంక్షల వెల్లువ- ఇంటికి వెళ్లిన ప్రధాని మోదీ

VP Poll Result: ఉపరాష్ట్రపతి ఎన్నికల్లో ఘన విజయం సాధించిన జగదీప్ ధన్‌ఖడ్‌కు ప్రధాని నరేంద్ర మోదీ సహా ప్రముఖులు శుభాకాంక్షలు తెలిపారు.

(Image Source: PTI)

VP Poll Result: భారత 16వ ఉపరాష్ట్రపతిగా ఘన విజయం సాధించిన జగదీప్​ ధన్​ఖడ్​కు శుభాకాంక్షలు వెల్లువెత్తాయి. ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, భాజపా చీఫ్ జేపీ నడ్డా ఇలా ప్రముఖులందరూ ఆయనకు శుభాకాంక్షలు తెలిపారు.

నివాసానికి వెళ్లి

Congratulations to Shri Jagdeep Dhankhar Ji on being elected India’s Vice President with resounding support across party lines. I am confident he will be an outstanding Vice President. Our nation will gain tremendously from his intellect and wisdom. @jdhankhar1 pic.twitter.com/YD8BHb512W

— Narendra Modi (@narendramodi) August 6, 2022

జగ్​దీప్​ ధన్​ఖడ్​ నివాసానికి వెళ్లి ప్రధాని మోదీ ప్రత్యేకంగా అభినందనలు తెలియజేశారు. దిల్లీలోని ధన్​ఖడ్​ నివాసానికి మోదీ వెళ్లి పుష్పగుచ్ఛం ఇచ్చి శుభాకాంక్షలు తెలిపారు. భాజపా జాతీయ అధ్యక్షుడు జేపీనడ్డా కూడా ధన్​ఖడ్​ నివాసానికి వెళ్లారు.

భారత రక్షణ శాఖ మంత్రి రాజనాథ్ సింగ్​, హోం మంత్రి అమిత్​ షా, కాంగ్రెస్​ పార్టీ అధినేత్రి సోనియా గాంధీ, రాహుల్​ గాంధీ కూడా ధన్​ఖడ్​కు శుభాకాంక్షలు తెలియజేశారు.

ధన్‌ఖడ్‌ కృతజ్ఞతలు

దేశంలోని సాధారణ రైతు కుటుంబం నుంచి జగదీప్ ఈ స్థాయికి ఎదిగారు. ఇంతటి గొప్ప అవకాశం ఇచ్చిన ప్రధాని మోదీ, సహా భాజపా నాయకత్వానికి ఆయన కృతజ్ఞతలు తెలిపారు.

" నా లాంటి సాధారణ వ్యక్తికి ఇంత గొప్ప అవకాశం వస్తుందని కలలో కూడా అనుకోలేదు. ఓ రైతు బిడ్డ ఈ రోజు ఉపరాష్ట్రపతిగా ఎన్నికయ్యాడు. ఈ అవకాశం ఇచ్చిన ప్రధాని మోదీ సహా నాయకత్వానికి కృతజ్ఞతలు చెబుతున్నాను.                                                                              "

- జగదీప్ ధన్‌ఖడ్‌, నూతన ఉపరాష్ట్రపతి

ఘన విజయం

ఉపరాష్ట్రపతి ఎన్నికల్లో ఎన్డీఏ అభ్యర్థిగా బరిలో నిలిచిన జగదీప్ ధన్‌ఖడ్ విపక్షాల ఉమ్మడి అభ్యర్థి మార్గరెట్ అల్వాపై 346 ఓట్ల తేడాతో విజయం సాధించారు.

• మొత్తం పోలైన ఓట్లు: 725
• జగ​దీప్‌ ధన్‌ఖడ్‌కు: 528 ఓట్లు 
• మార్గరెట్ అల్వాకు: 182 ఓట్లు
• చెల్లుబాటు కానివి: 15 ఓట్లు
• ఓటుహక్కు వినియోగించుకోనివారు: 55 మంది

ఓటమిని అంగీకరించి

ఉమ్మడి విపక్షాల ఉపరాష్ట్రపతి అభ్యర్థిగా పోటీ చేసి ఓడిపోయిన మార్గరెట్​ అల్వా తన ఓటమిని అంగీకరించారు. ఉపరాష్ట్రపతిగా ఎన్నికైన జగ​దీప్​ ధన్​ఖడ్​కు ఆమె శుభాకాంక్షలు తెలిపారు.